រាជធានីភ្នំពេញ ៖ បន្ទាប់ពីអាក់ខានផ្សាយ២សប្តាហ៍ ការប្រកួតប្រដាល់នៅលើសង្វៀនប៉ុស្តិ៍លេខ៥ បានដំណើរការវិញហើយ កាលពីល្ងាចថ្ងៃទី១២ ខែតុលា ឆ្នាំ២០១៩នេះ ដោយការប្រកួតជាថ្មីនេះ គឺកីឡាករជើងចាស់…
រាជធានីភ្នំពេញ ៖ បន្ទាប់ពីអាក់ខានផ្សាយ២សប្តាហ៍ ការប្រកួតប្រដាល់នៅលើសង្វៀនប៉ុស្តិ៍លេខ៥ បានដំណើរការវិញហើយ កាលពីល្ងាចថ្ងៃទី១២ ខែតុលា ឆ្នាំ២០១៩នេះ ដោយការប្រកួតជាថ្មីនេះ គឺកីឡាករជើងចាស់ ស៊ឹម ប៊ុនឆៃ បរាជ័យទាំងមិននឹកស្មាន ក្រោមដៃបង្គោលខៀវ សន រ៉ាគីម ដែលទើបតែឈានឡើងក្នុងវិស័យប្រដាល់។
នៅក្នុងថ្ងៃនោះ ក៏មានវត្តមានគូពិសេស និងគូអន្តរជាតិ ប្រកួតគ្នាយ៉ាងស្វិតស្វាញផងដែរ ទម្រាំរកឃើញចាញ់ឈ្នះ។ ការប្រកួតក្នុងសប្តាហ៍ទី១១នេះ នៅតែជាការប្រកួតជ្រើសរើសជើងឯកក្នុងប្រភេទ៦០គីឡូក្រាម រដូលកាលទី៦ របស់ការប្រកួតប្រដាល់កំពូលជើងឯកTV5 BOXING KNOCK OUT SERIES (K-Cement) ដដែល ក្នុងចំណោម២គូ ដែលប្រកួតគ្នាដណ្ដើមកៅអី៨នាក់ រវាង កីឡាករ ស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបង ប៉ះជាមួយកីឡាករ ស៊ន រ៉ាគីម មកពីក្លិបរាហ៊ូកីឡាខេត្តបាត់ដំបង ដោយទទួលបានការចាប់អារម្មណ៍ជាងគេ។
អ្វីដែលធ្វើឲ្យគេមិននឹកស្មាន គឺ រ៉ាគីម បានវាយចំគោលដៅចំណុចបានពិន្ទុធ្វើឲ្យដៃគូដាច់ផ្ងារម្តង ហើយម្តងទៀតទប់មិនរួច។ ក្នុងទឹកទី២ រ៉ាគីម វាយសម្រុកបន្ថែមរហូតទាល់តែដៃគូសន្លប់ដាច់ផ្ងារ បណ្ដាលឱ្យលោកអាជ្ញាកណ្តាលរាប់ ហើយដោយសារទម្ងន់នៃការវាយត្រូវ មានកម្លាំងមិនធម្មតា ទើបសុំចុះចាញ់។
កីឡាករបង្គោលខៀវ ស៊ន រ៉ាគីម និយាយថា លោកនៅមិនទាន់ស្រឡះចិត្តនោះទេ កាលណាគោលដៅសម្រាប់ឡើងទៅកាន់ជុំពាក់កណ្ដាលផ្ដាច់ព្រ័ត្រនៅមិនទាន់ដឹងស.ខ្មៅ។ នោះគឺដោយសារមើលទៅគូប្រកួតសុទ្ធតែកម្លាំង និងវាយល្អមិនខុសគ្នា។អ៊ីចឹងហើយ លោកមានតែការតស៊ូហ្វឹកហាត់រកក្បាច់គុនប្លែកៗ សម្រាប់តតាំងជាមួយដៃគូនាវគ្គបន្ទាប់ដែលមិនអាចប្រហែស។ (កែសម្រួលដោយ ៖ បុប្ផា)
ចែករំលែកព័តមាននេះ