ខេត្តបន្ទាយមានជ័យ ៖ បុរសម្នាក់បានស្លាប់ក្នុងចំណោមបុរសចំនួន៣នាក់ ក្រោយពីជួបជុំគ្នាផឹកស៊ីរួច ជនរងគ្រោះទាំង៣នាក់ស្ថិតក្នុងស្ថានភាពស្រវឹង ក៏បបួលគ្នាចុះទៅក្នុងអាងទំនប់អូរខៃដនដើម្បីបេះត្រកួន លុះពេលចុះបេះត្រកួននោះស្រាប់តែជនរងគ្រោះទាំង៣នាក់បានលង់ទឹកអាងទំនប់ ខណៈនោះជនរងគ្រោះក៏ស្រែកហៅឲ្យគេជួយ ។ ពេលនោះត្រូវបានអ្នកនេសាទនៅក្បែរកន្លែងកើតហេតុចេញទូកទៅជួយសង្គ្រោះបានតែ២នាក់ ចំណែកម្នាក់ទៀតបានលិចបាត់ទៅក្នុងទឹកអស់រយៈពេលជាច្រើនម៉ោង ទើបរាវរកសពឃើញ។
ហេតុការណ៍ខាងលើនេះបង្កឲ្យភ្ញាក់ផ្អើលនេះបានកើតឡើងនៅវេលាម៉ោង៥និង៥០នាទីល្ងាចថ្ងៃទី១១ ខែតុលា ឆ្នាំ២០១៩ នៅចំណុចទំនប់អាងអូរខៃដន ក្នុងភូមិកូនដំរី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
ជនរងគ្រោះម្នាក់ដែលស្លាប់បាត់បង់ជីវិតត្រូវបានគេស្គាល់ឈ្មោះ ម៉េង មុំ ភេទប្រុស អាយុ២៥ឆ្នាំ រស់នៅក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ។ ចំណែកជនរងគ្រោះ២នាក់ផ្សេងទៀតដែលរួចផុតពីគ្រោះថ្នាក់ដល់ជីវិត មិនស្គាល់អត្តសញ្ញាណនោះទេ ។
បើយោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញបុរសទាំង៣នាក់ខាងលើនេះបានមកជួបជុំគ្នាអង្គុយផឹកស៊ីនៅលើទំនប់អាងអូរខៃដន លុះផឹកស្រវឹង ពួកគេក៏បានបបួលគ្នាចុះហែលទឹកទៅបេះត្រកួននៅក្នុងអាងដែលចំងាយប្រហែល៤០ម៉ែត្រ ។
តាមប្រភពដដែលបានបន្តថា ពេលពួកគេកំពុងហែលទឹកទាំងក្នុងស្ថានភាពស្រវឹង និងអស់កម្លាំងផងនោះក៏ហែលទៅមុខលែងរួច ស្រាប់តែលង់ទឹក និងស្រែកហៅឲ្យគេជួយ ត្រូវបានអ្នកនេសាទនៅក្បែរនោះចេញទូកទៅជួយសង្គ្រោះបាន២នាក់ ចំណែកម្នាក់ទៀត ជួយមិនទាន់ ក៏បានលិចបាត់ទៅក្នុងទឹក ។ លុះនាំគ្នារាវរកសពចំណាយពេលរហូតដល់វេលាម៉ោងប្រមាណ៩និង២០នាទីយប់ថ្ងៃដដែល ទើបរកសពឃើញ រួចបានប្រគល់សពទៅឲ្យសាច់ញាតិដើម្បីរៀបចំធ្វើបុណ្យតាមប្រពៃណី។
សូមបញ្ជាក់ថា ជារៀងរាល់ឆ្នាំនៅអាងទំនប់អូរខៃដន ក្រុងប៉ោយប៉ែត តែងតែមានមនុស្សលង់ទឹកស្លាប់ជាបន្តបន្ទាប់។ ពាក់ព័ន្ធនឹងករណីនេះខាងលើសមត្ថកិច្ចក៏ដូចអាជ្ញាធរមូលដ្ឋានបានអំពាវនាវដល់ប្រជាពលរដ្ឋសូមមានការប្រុងប្រយ័ត្ននៅពេលចុះលេងទឹកអាងទំនប់អូរខៃដននេះផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ