ខេត្តបន្ទាយមានជ័យ ៖ កងកម្លាំងនៃស្នងការដ្ឋាននគរបាលខេត្តបន្ទាយមានជ័យចំនួនជាង៣០០នាក់ បានប្រមូលផ្តុំទទួលផែនការពង្រឹងសន្តិសុខ និងបំពាក់អាវុធ ដើម្បីត្រៀមអនុវត្តបទបញ្ជាថ្នាក់លើចាប់ទណ្ឌិត សម រង្ស៊ី និងបក្សពួក តាមសាលក្រមតុលាការពីបទអំពើក្បត់ជាតិ…
ខេត្តបន្ទាយមានជ័យ ៖ កងកម្លាំងនៃស្នងការដ្ឋាននគរបាលខេត្តបន្ទាយមានជ័យចំនួនជាង៣០០នាក់ បានប្រមូលផ្តុំទទួលផែនការពង្រឹងសន្តិសុខ និងបំពាក់អាវុធ ដើម្បីត្រៀមអនុវត្តបទបញ្ជាថ្នាក់លើចាប់ទណ្ឌិត សម រង្ស៊ី និងបក្សពួក តាមសាលក្រមតុលាការពីបទអំពើក្បត់ជាតិ និងត្រៀមចាត់ការក្រុមជ្រុលនិយមគាំទ្រទណ្ឌិតសម រង្ស៊ី ដែលមានផែនការធ្វើរដ្ឋប្រហារផ្តួលរំលំរាជរដ្ឋាភិបាលកម្ពុជាស្របច្បាប់ ខណៈដែលទណ្ឌិតសម រង្ស៊ី ប្រកាសខ្លួនឯងពីក្រៅប្រទេសឱ្យដឹងថា នឹងឆ្លងដែនចូលមកស្រុកខ្មែរនៅថ្ងៃទី៩ វិច្ឆិកា ឆ្នាំ២០១៩ ខាងមុខនេះ។
ការប្រមូលផ្តុំត្រួតពិនិត្យកម្លាំង បានធ្វើឡើងនៅថ្ងៃទី១១ តុលា ក្រោមវត្តមានលោកឧត្តមសេនីយ៍ទោ អាត់ ខែមស្នងការនគរបាលខេត្តបន្ទាយមានជ័យ ។ ថ្លែងក្នុងឱកាសនោះ ស្នងការនគរបាលខេត្តបន្ទាយមានជ័យ លោកឧត្តមសេនីយ៍ទោ អាត់ ខែម បានលើកឡើងថា តាមបទបញ្ជារបស់ប្រមុខរាជរដ្ឋាភិបាលកម្ពុជាសម្តេចតេជោសែន បានមានប្រសាសន៍កន្លងទៅថ្មីៗនេះឱ្យដឹងថា សកម្មភាពរបស់ទណ្ឌិត សម រង្ស៊ី បានឆ្លងផុតពីបន្ទាត់ក្រហមនោះហើយ មានន័យថាបានប៉ុនប៉ងធ្វើរដ្ឋប្រហារ ផ្តួលរំលំរាជរដ្ឋាភិបាលកម្ពុជាស្របច្បាប់ និងបានប្រមាថដល់ព្រះមហាក្សត្រ ជាទីគោរពសក្ការៈ ដែលជាទង្វើមួយមិនអាចអត់អោនបាននោះឡើយ ។
ក្នុងករណីដែលទណ្ឌិត សម រង្ស៊ី និងបក្សពួកមួយចំនួនទៀត ដែលជាមុខសញ្ញាតុលាការចេញដីកាឱ្យចាប់ខ្លួននៅពេលឆ្លងដែនចូលស្រុកខ្មែរ ដើម្បីយកទៅផ្តន្ទាទោសតាមផ្លូវច្បាប់។ ដោយឡែក សម្រាប់អ្នកទៅចូលរួមគាំទ្រនិងចាំទទួលទណ្ឌិត សម រង្ស៊ី ក៏ត្រូវច្បាប់ចាត់ទុកជាអំពើសមគំនិត ក៏ត្រូវចាប់ខ្លួនផងដែរ ។ ក្នុងនាមជាកងកម្លាំប្រដាប់អាវុធត្រូវតែចាត់វិធានការអ្នកចូលរួមគាំទ្រទាំងនោះ ដោយមិនអនុញ្ញាតឱ្យពួកគេធ្វើភ្លៀងធ្វើព្យុះបានតាមទំនើងចិត្តនោះឡើយ។
លោកឧត្តមសេនីយ៍ស្នងការ ក៏បានលើកឡើង និងណែនាំដល់កងកម្លាំងនគរបាល ទាំងអស់ត្រូវស្មោះត្រង់គោរពរដ្ឋធម្ម ការពារជាតិ សាសនា ព្រះមហាក្សត្រនិងការពារ រាជរដ្ឋាភិបាលកម្ពុជាស្របច្បាប់ ហើយកុំឲ្យចាញ់បោកឧបាយកលរបស់ក្រុមឧន្ទាម ដែលមានគំនិតញុះញង់និងអូសទាញឱ្យកងកម្លាំងប្រដាប់អាវុធនិងប្រជាជនប្រឆាំងនិងរាជរដ្ឋាភិបាលកម្ពុជា។
លោកឧត្តមសេនីយ៍ទោ អាត់ ខែម ក៏បានជម្រុញដល់តាមបណ្តាការិយាល័យជំនាញ តាមអធិការដ្ឋាននគរបាលស្រុក-ក្រុង ទាំង៩និងអង្គភាពវរៈនគរបាលការពារព្រំដែន ត្រូវតាមដាននិងក្តាប់សភាពការណ៍សន្តិសុខឱ្យបានគ្រប់ជ្រុងជ្រោយនៅក្នុងភូមិសាស្ត្រខ្លួនទទួលខុសត្រូវ ដើម្បីទប់ស្កាត់ឆ្លើយតបទាន់ពេលវេលា ក្នុងការចេញដោះស្រាយសភាពការណ៍ដែលបម្រុងកើតឡើងនិងកើតឡើងណាមួយនោះ៕
ចែករំលែកព័តមាននេះ