ខេត្តកណ្តាល ៖ បុរសម្នាក់ដែលហ៊ានចាប់ឱបថើបស្ត្រីម្នាក់ទាំងកណ្តាលថ្ងៃ បានត្រូវលោកគឹម រ័ត្នណារិន ចៅក្រមសើបសួរសាលាដំបូងខេត្ត នាល្ងាចថ្ងៃទី៧ ខែតុលាសម្រេចចេញដីកាឃុំខ្លួនក្នុងពន្ធនាគារជាបណ្តោះអាសន្ន ពីបទប្រទូស្តកេរ្តិ៍ខ្មាស ប្រព្រឹត្តនៅភូមិពោធិ៍លើ…
ខេត្តកណ្តាល ៖ បុរសម្នាក់ដែលហ៊ានចាប់ឱបថើបស្ត្រីម្នាក់ទាំងកណ្តាលថ្ងៃ បានត្រូវលោកគឹម រ័ត្នណារិន ចៅក្រមសើបសួរសាលាដំបូងខេត្ត នាល្ងាចថ្ងៃទី៧ ខែតុលាសម្រេចចេញដីកាឃុំខ្លួនក្នុងពន្ធនាគារជាបណ្តោះអាសន្ន ពីបទប្រទូស្តកេរ្តិ៍ខ្មាស ប្រព្រឹត្តនៅភូមិពោធិ៍លើ ឃុំត្រើយស្លា ស្រុកស្អាង កាលពីថ្ងៃទី៥ ខែតុលាកន្លងទៅ យោងតាមមាត្រា២៤៦នៃក្រមព្រហ្មទណ្ឌ ។
ជនត្រូវចោទឈ្មោះ អឿ គីមយាង អាយុ៤០ឆ្នាំ រស់នៅភូមិព្រែកតាឯក ឃុំត្រើយស្លា ជាកម្មករ ។ ចំណែកស្ត្រីរងគ្រោះ អាយុ៤៦ឆ្នាំ ជាកសិករ រស់នៅក្នុងឃុំខាងលើដែរ ។ មន្ត្រីនគរបាលឲ្យដឹងថា នៅថ្ងៃកើតហេតុស្ត្រីរងគ្រោះបានជិះម៉ូតូពីផ្ទះរបស់ខ្លួនទៅផ្ទះឈ្មោះ ឃុន ណេង ភេទស្រី នៅភូមិពោធិ៍លើ ដើម្បីប្រមូលលុយតុងទីន ។ ពេលកំពុងឈរនិយាយគ្នាជាមួយស្ត្រីឈ្មោះ ឃុន ណេង ស្រាប់តែឈ្មោះ
អឿ គីមយាង បានមកចាប់ឱបថើបឆៅៗតែម្តងក៏មានការប្រវាយប្រតប់គ្នា និងទាញយកខ្សែភ្លើងវាយទៅលើឈ្មោះ អឿ គីមយាង ។
ក្រោយពីបានទទួលព័ត៌មានខាងលើ នគរបាលប៉ុស្តិ៍ត្រើយស្លា បានទៅដល់កន្លែងកើតហេតុហើយឃាត់ខ្លួនឈ្មោះ អឿ គីមយាង នាំមកសាកសួរដើម្បីចាត់ការតាមនីតិវិធី ។ តាមព័ត៌មានពីក្រុមគ្រួសាររបស់ឈ្មោះ អឿ គីមយាង ដែលមានប្រពន្ធកូនទៅហើយនោះថា បុរសរូបនេះមានសតិមិនប្រក្រតីទេ ។ ទោះជាបែបណា សមត្ថកិច្ចថាគេមិនអាចនិយាយតែមាត់ថាអ្នកនេះឆ្កួត អ្នកនោះមិនឆ្កួតបានទេ បើមិនមានលិខិតស្នាមបញ្ជាក់ច្បាស់លាស់នោះ ៕
ចែករំលែកព័តមាននេះ