ប្រទេសតួកគី-ស៊ីរី ៖ ការវាយលុករបស់តួកគី ចាប់ផ្ដើមពីថ្ងៃទី៩តុលាមកលើភាគឦសានស៊ីរី ក្នុងក្របខណ្ឌនៃការវាយលុកមួយរបស់ក្រុងអង់ការ៉ា ប្រឆាំងពួកជីវពលឃើតជួយទ្រទ្រង់ដោយពួកលោកខាងលិចនាថ្ងៃទី១០តុលានាំឲ្យជនស៊ីវិលច្រើនពាន់នាក់រត់ភៀសខ្លួន ប្រឈមមុខនឹងការរុលទៅមុខរបស់កងទ័ពតួកគី។
សហរដ្ឋអាមេរិកដែលមុននេះប្រកាសពីការដកកងទាហានអាមេរិក ចេញពីព្រំដែនស៊ីរី-តួកគីវាយតម្លៃកាលពីថ្ងៃទី១០តុលាថា ក្នុងដំណាក់កាលនេះក្រុងអង់ការ៉ានៅពុំទាន់ឆ្លងហួសពីខ្សែបន្ទាត់ក្រហមនៅឡើយ។ ប្រធានាធិបតីលោកដូណាល់ត្រាំបានឲ្យផ្នែកការទូតអាមេរិកប៉ុនប៉ងសម្របសម្រួល ឲ្យមានបទឈប់បាញ់គ្នាមួយរវាងតួកគីនិងកងកម្លាំងឃើត។
នៅក្រុងញូវយ៉កក្រោយកិច្ចប្រជុំបន្ទាន់មួយ របស់ក្រុមប្រឹក្សាសន្តិសុខអ.ស.ប ប្រទេសអឺរ៉ុប៥គឹ បារាំង អាល្លឺម៉ង់ អង់គ្លេស ប៉ូឡូញនិងបែលហ្ស៊ិក ទាមទារឲ្យបញ្ឈប់សកម្មភាពយោធាជាឯកតោភាគីរបស់តួកគី។ ឆ្លើយតបចំពោះការរិះគន់របស់ពួកលោកខាងលិច ប្រឆាំងការវាយលុកនោះប្រធានាធិបតីតួកគី លោករីស៊ីបតៃយីបអ័រដូហ្គាន បានគំរាមបញ្ជូនពួកអន្តោប្រវេសន៍៣,៦លាននាក់ទៅអឹរ៉ុប។ លោកថ្លែងថាយើងនឹងបើកទ្វារហើយបញ្ជូនពួកអន្តោប្រវេសន៍៣,៦លាននាក់ទៅឲ្យពួកអ្នក ។
បណ្ដាប្រទេសអឺរ៉ុបបានរិះគន់យ៉ាងខ្លាំងក្លាចំពោះប្រតិបត្តិការវាយលុករបស់តួកគី ចូលភាគឦសានស៊ីរីប្រឆាំងពួកជីវពលឃើតស៊ីរី ដែលក្រុងអង់ការ៉ាចាត់ទុកជាក្រុមភេរវកម្ម ព្រោះមានទំនាក់ទំនងជាមួយពួកឃើតតួកគី នៃក្រុមគណបក្សពលករឃើតឌីស្ថានPKK។ អគ្គលេខាធិការអ.ស.បលោកANTONNIO GUTERRES បានសម្ដែងការព្រួយបារម្ភយ៉ាងជ្រាលជ្រៅរបស់លោកចំពោះការវាយលុកនោះ។
អង្គការសិទ្ធិមនុស្សស៊ីរីOSDHមានប្រភពព័ត៌មានច្រើនក្នុងប្រទេសនិយាយថា កងទ័ពតួកគីដណ្ដើមយកបានភូមិ១១នៅជិតទីក្រុង២ ជាមុខសញ្ញានៃការវាយលុកគឺ ទីក្រុងRAS AL AIN និងTAL ABYATនៅព្រំដែន ត្រួតត្រាដោយកងកម្លាំងឃើត។ ទីក្រុងទាំងនោះរងការទម្លាក់គ្រាប់បែកនិងបាញ់ផ្លោងយ៉ាងខ្លាំងក្លា ពីសំណាក់កងទ័ពតួកគី។
យោងតាមOSDHថាយុទ្ធជនឃើតយ៉ាងតិច២៩នាក់និងជនស៊ីវិល១០នាក់ បានត្រូវស្លាប់ដោយការវាយប្រហារតាមអាកាសនិងការបាញ់កាំភ្លើងធំរបស់កងទ័ពតួកគី ចាប់ពីថ្ងៃទី៩តុលាមក។ ហើយតាមអាជ្ញាធរតួកគីថា ជនស៊ីវិល១០នាក់បានត្រូវស្លាប់និងជាច្រើនសិបនាក់រងរបួស ដោយសារគ្រាប់រ៉ុក្កែតរបស់ពួកឃើត បាញ់មកលើបណ្ដាទីក្រុងតាមព្រំដែនតួកគី ដូចជាក្រុងAKCAKALEជាដើម។
ខាងផ្នែកស៊ីរីការវាយលុករបស់តួកគីនាំឲ្យមនុស្សដល់ទៅជាង៦០.០០០នាក់រត់ភៀសខ្លួនចេញពីបណ្ដាតំបន់ព្រំដែន៕ (កែសម្រួលដោយ ៖ បុប្ផា)
ចែករំលែកព័តមាននេះ