ខេត្តមណ្ឌលគិរី ៖ ទីបំផុត យុត្តិធម៌ត្រូវបានផ្តល់ជូនក្រុមគ្រួសារជនរងគ្រោះក្នុងករណីបាញ់ប្រហារដ៏ឃោរឃៅលើមន្ត្រីការពារព្រៃឈើចំនួន៣នាក់នៅខេត្តមណ្ឌលគិរី ដោយចៅក្រមសាលាដំបូងរាជធានីភ្នំពេញ បានសម្រេចផ្ដន្ទាទោសជនដៃដល់ដាក់គុកអស់មួយជីវិតម្នាក់ និងបក្ខពួក៥នាក់ទៀត ម្នាក់ៗជាប់ទោស៣០ឆ្នាំ ។
សេចក្ដីរាយការណ៍បានឲ្យដឹងថា កាលពីថ្ងៃទី៨ ខែតុលា សាលាដំបូងរាជធានីភ្នំពេញបាន ផ្ដន្ទាទោសដាក់ពន្ធនាគារអស់មួយជីវិតចំពោះជនដៃដល់ឈ្មោះ ផល ពេញ ដែលជាអ្នកបាញ់សម្លាប់ជនរងគ្រោះដោយផ្ទាល់ ។ ចំណែកបក្សពួកដទៃទៀតដែលពាក់ព័ន្ធនឹងការសម្លាប់នេះត្រូវបានផ្ដន្ទាទោសដាក់ពន្ធនាគារម្នាក់ៗ៣០ឆ្នាំ គិតពីថ្ងៃចាប់ឃុំខ្លួន ។
ជនដៃដល់ក្នុងករណីបាញ់សម្លាប់ ឈ្មោះ ផល ពេញ ជាអតីតនាយប៉ុស្តិ៍នគរបាលអូររលែវរៈការពារព្រំដែនគោកលេខ៦២១ នៃស្នងការដ្ឋាននគរបាលខេត្តមណ្ឌលគិរី ត្រូវបានចាប់ខ្លួននាព្រឹកថ្ងៃទី២ ខែកុម្ភៈ ឆ្នាំ២០១៨ នៅហាងគុយទាវមួយកន្លែង ក្នុងស្រុកមេមត់ ខេត្តត្បូងឃ្មុំ គឺជាអ្នកបាញ់ផ្ទាល់ទៅលើជនរងគ្រោះទាំង៣នាក់ ។
ចំណែកឯជនពាក់ព័ន្ធមាន៥នាក់គឺ ៖
១-ឈ្មោះ កើត វេហា ហៅឆៃ ជាទាហានការ
ពារព្រំដែន ត្រូវបានចាប់ខ្លួន នាយប់ថ្ងៃទី៣១ ខែមករា ឆ្នាំ២០១៨ ជាជនពាក់ព័ន្ធ
២-ឈ្មោះ កើត វេតា ជាទាហានការពារព្រំដែន
៣-ឈ្មោះ ឡាយ សាវី ជាទាហានការពារព្រំដែន
៤-ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូររលែ
អ្នកទាំង៣នាក់នេះ ត្រូវបានចាប់ខ្លួននៅយប់ថ្ងៃទី១ ខែកុម្ភៈ ឆ្នាំ២០១៨ និង៥-ឈ្មោះ ឈាង វ៉ាន់និត ប្អូនថ្លៃរបស់ឈ្មោះ ផល ពេញ ត្រូវបានចាប់ខ្លួននារសៀលថ្ងៃទី២ ខែកុម្ភៈ ឆ្នាំ២០១៨ ។
សូមរំឭកថា ការបាញ់ប្រហារនេះបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិ ពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះពីម៉ោង៤ទៅម៉ោង៥ល្ងាចថ្ងៃទី៣០ ខែមករា ឆ្នាំ២០១៨ បណ្ដាលឲ្យស្លាប់មនុស្ស៣នាក់រួមមាន មន្ដ្រីអាវុធហត្ថលើផ្ទៃប្រទេសម្នាក់ឈ្មោះ សេក វឌ្ឍនា មន្ដ្រីឧទ្យានុរក្សនៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគមអភិរក្សសត្វព្រៃ Wildlife Conservation Society (WCS) ឈ្មោះ ថុល ខ្នា ។ ការបាញ់ប្រហារនេះ ផ្តើមចេញពីគំនុំនៃបទល្មើសព្រៃឈើ ៕
ចែករំលែកព័តមាននេះ