រាជធានីភ្នំពេញ ៖ ដើម្បីបញ្ជ្រាបការយល់ដឹងបន្ថែមដល់ម្ចាស់អាជីវកម្ម អ្នកគ្រប់គ្រងសេវាកម្ម មណ្ឌលកម្សាន្ត និងម្ចាស់អាហារដ្ឋាន ភោជនីយដ្ឋាន ផ្ទះសំណាក់ ដែលកំពុងបើកដំណើរក្នុងដែនសមត្ថកិច្ចរបស់រដ្ឋាភិបាលខណ្ឌច្បារអំពៅបានជ្រាប់ច្បាស់អំពីលិខិតបទដ្ឋានគតិយុត្តរបស់ក្រសួងទេសចរណ៍នោះ ។…
រាជធានីភ្នំពេញ ៖ ដើម្បីបញ្ជ្រាបការយល់ដឹងបន្ថែមដល់ម្ចាស់អាជីវកម្ម អ្នកគ្រប់គ្រងសេវាកម្ម មណ្ឌលកម្សាន្ត និងម្ចាស់អាហារដ្ឋាន ភោជនីយដ្ឋាន ផ្ទះសំណាក់ ដែលកំពុងបើកដំណើរក្នុងដែនសមត្ថកិច្ចរបស់រដ្ឋាភិបាលខណ្ឌច្បារអំពៅបានជ្រាប់ច្បាស់អំពីលិខិតបទដ្ឋានគតិយុត្តរបស់ក្រសួងទេសចរណ៍នោះ ។
មន្ទីរទេសចរណ៍រាជធានីភ្នំពេញសហការរៀបចំបើកវគ្គបណ្តុះបណ្តាលស្តីពីច្បាប់ទេសចរណ៍ និងបដិសណ្ឋារកិច្ចល្អជាមួយរដ្ឋបាលខណ្ឌច្បារអំពៅ ដោយមានការចូលរួមពីលោក គឹម ចាន់សាវុធ អនុប្រធានមន្ទីរទេសចរណ៍រាជធានីភ្នំពេញ លោក ហ៊ត គឹមនី អភិបាលរងខណ្ឌច្បារអំពៅ និងម្ចាស់អាជីវកម្ម និងអ្នកគ្រប់គ្រង មណ្ឌលកម្សាន្ត ផ្ទះសំណាក់ អាហារដ្ឋានយ៉ាងច្រើនកុះករ កាលពីររសៀលថ្ងៃទី៧ ខែតុលាកន្លងទៅ ។ ក្រោយពីបានស្តាប់របាយការណ៍ សង្ខេបរបស់លោក ហ៊ត គឹមនី អភិបាលរងខណ្ឌច្បារអំពៅរួចមកលោកគឹម ចាន់សាវុធ អនុប្រធានមន្ទីរទេសចរណ៍រាជធានីភ្នំពេញបានគូសបញ្ជាក់ថា វគ្គបណ្ដុះបណ្ដាល និងផ្សព្វផ្សាយច្បាប់ស្ដីពីទេសចរណ៍ និងបដិសណ្ឋារកិច្ចល្អ គឺមានសារសំខាន់ ដើម្បីពង្រឹងការយកចិត្តទុកដាក់ខ្ពស់លើការងារបដិសណ្ឋារកិច្ច និងការស្វាគមន៍ភ្ញៀវដោយភាពរួសរាយរាក់ទាក់ក៏ដូចជា ការពង្រឹងការអនុវត្តច្បាប់ស្ដីពីទេសចរណ៍ឲ្យកាន់តែល្អប្រសើរ ដល់ម្ចាស់អាជីវកម្ម អ្នកគ្រប់គ្រងសេវាកម្មកម្សាន្តទាំងអស់ទូទាំងខណ្ឌច្បារអំពៅ ជាពិសេសការចូលរួមសហការពីអាជ្ញាធរដែលដីមានសមត្ថកិច្ចគ្រប់លំដាប់ថ្នាក់ក្នុងការអនុវត្តលិខិតបទដ្ឋានគតិយុត្តិ ដែលពាក់ព័ន្ធក្នុងការគ្រប់គ្រងអាជីវកម្មទេសចរណ៍ ។
លោកអនុប្រធានមន្ទីរបន្តថា ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជារក្សាបាននូវសន្តិភាព ស្ថិរភាពនយោបាយ និងសុខសន្តិភាពយ៉ាងល្អប្រសើរ ព្រមទាំងសម្រេចបានជោគជ័យយ៉ាងធំធេង ក្នុងការបន្តអភិវឌ្ឍប្រទេសជាតិ ឲ្យកាន់តែរីកចម្រើនលើគ្រប់វិស័យ ព្រមទាំងបានលើកស្ទួយនូវកិត្យានុភាពជាតិទាំងនៅថ្នាក់តំបន់ និងពិភពលោកជាបន្តបន្ទាប់ ដោយឡែកវិស័យទេសចរណ៍ត្រូវបានរាជរដ្ឋាភិបាលចាត់ទុកជាមានបៃតងក៏បានបោះជំហានរីកចម្រើនទៅមុខ ជាលំដាប់ដោយរក្សាបានកំណើនវិជ្ជមានជារៀងរាល់ឆ្នាំ និងបានរួមចំណែកប្រមាណ១២.៧%នៃផលទុនសរុបក្នុងស្រុក ។
ប្រធានមន្ទីររូបនេះបានបន្តថា ផលប្រយោជន៍ដែលបានមកពីការរីកចម្រើននៃវិស័យទេសចរណ៍បានចូលរួមលើកស្ទួយកម្រិតជីវភាពរស់នៅរបស់ប្រជាពលរដ្ឋកាត់បន្ថយភាពក្រីក្រ បង្កើតការងារដល់ប្រជាជនលើសពីនេះទៀតវិស័យទេសចរណ៍ រួមចំណែកថែរក្សាអភិរក្ស បរិស្ថានធម្មជាតិ វប្បធម៌ប្រពៃណី និងលើកតម្កើងកិត្តិយសកម្ពុជា នៅលើឆាកអន្តរជាតិផងដែរ ។
ដូច្នេះការរួមចំណែកពីគ្រប់ផ្នែកពាក់ព័ន្ធ ពិតជាមានសារៈសំខាន់ ដើម្បីជួយដល់ការរីកចម្រើនក្នុងវិស័យទេសចរណ៍ ជាក់ស្ដែងវគ្គបណ្ដុះបណ្ដាល និងផ្សព្វផ្សាយច្បាប់ស្ដីពីទេសចរណ៍នៅថ្ងៃនេះក៏បានឆ្លុះបញ្ចាំងពីការរួមចំណែកក្នុងការពង្រឹងកំណើនទេសចរណ៍ស្របតាមយុទ្ធសាស្ត្រអភិវឌ្ឍន៍វិស័យទេសចរណ៍ តាមរយៈការណែនាំគន្លឹះល្អៗក្នុងការធ្វើបដិសណ្ឋារកិច្ចដល់ភ្ញៀវទេសចរក៏ដូចជា ការយល់ដឹងអំពីការស្នើសុំច្បាប់បើកអាជីវកម្មទេសចរណ៍នៅទូទាំងរាជធានីភ្នំពេញ ពិសេសក្នុងខណ្ឌច្បារអំពៅនេះតែម្តង ៕
ចែករំលែកព័តមាននេះ