ខេត្តព្រះវិហារ ៖ មន្ទីរសុខាភិបាលខេត្តព្រះវិហារបានអះអាងថា ពីមួយឆ្នាំទៅមួយឆ្នាំ ករណីជំងឺគ្រុនចាញ់ នៅខេត្តព្រះវិហារមានការថយចុះជាបន្តបន្ទាប់ ជាក់ស្តែង រយៈពេល៩ខែនៅដើមឆ្នាំ២០១៩នេះ អាត្រាជំងឺគ្រុនចាញ់នៅខេត្តព្រះវិហារ មានការថយចុះជាង២ពាន់ករណី…
ខេត្តព្រះវិហារ ៖ មន្ទីរសុខាភិបាលខេត្តព្រះវិហារបានអះអាងថា ពីមួយឆ្នាំទៅមួយឆ្នាំ ករណីជំងឺគ្រុនចាញ់ នៅខេត្តព្រះវិហារមានការថយចុះជាបន្តបន្ទាប់ ជាក់ស្តែង រយៈពេល៩ខែនៅដើមឆ្នាំ២០១៩នេះ អាត្រាជំងឺគ្រុនចាញ់នៅខេត្តព្រះវិហារ មានការថយចុះជាង២ពាន់ករណី ។
លោកវេជ្ជបណ្ឌិត គួង ឡូ ប្រធានមន្ទីរសុខាភិបាលខេត្តព្រះវិហារ បានឲ្យដឹងថា ស្ថានភាពជំងឺគ្រុនចាញ់ នៅទូទាំងខេត្តព្រះវិហារ កំពុងតែមានការថយចុះយ៉ាងខ្លាំង ម្យ៉ាងវិញទៀតតួលេខអ្នកស្លាប់ដោយសារ
ជំងឺនេះ ចាប់តាំងពីឆ្នាំ២០១២មក ពុំមានទៀតឡើយ ។ លោកថា ដើម្បីអនុវត្តឲ្យមានប្រសិទ្ធភាពចំពោះផែនការយុទ្ធសាស្ត្រក្នុងការលុបបំបាត់ជំងឺគ្រុនចាញ់នេះ មន្ទីរជំនាញបានចុះអប់រំណែនាំផ្សព្វផ្សាយនិងជួសឈាមរកមេរោគគ្រុនចាញ់ នៅគ្រប់មូលដ្ឋានទាំងអស់នៅខេត្តព្រះវិហារ ។
ពិសេសបានព្យាបាលទាន់ពេលវេលាដល់អ្នកដែលកើតជំងឺនេះ ដើម្បីកាត់បន្ថយបានអត្រាអ្នកស្លាប់ដោយ ជំងឺនេះកាន់តែប្រសើរឡើង ។ តែទោះជាបែបនេះក្តី លោកបានបន្ថែមថា មន្ទីរជំនាញនឹងចាត់ឲ្យមន្ត្រីចុះ ធ្វើតេស្តឈាមរកមេរោគគ្រុនចាញ់ ផ្តល់សេវាព្យាបាលឲ្យទាន់ពេលវេលា ចំពោះអ្នកប្រកបរបរក្នុងព្រៃ ក៏ដូចជាមន្ត្រីឧទ្យានុរក្ស និងផ្តល់ប្រឹក្សាពីវិធីសាស្ត្រថែទាំសុខភាព ការពារកុំឲ្យកើតជម្ងឺគ្រុនចាញ់ ។
ជាមួយគ្នានេះ លោកវេជ្ជបណ្ឌិត សុក វាសនា ប្រធានមន្ទីរពេទ្យបង្អែក១៦មករាក្រុងព្រះវិហារ បានឲ្យដឹងថា ជំងឺគ្រុនចាញ់ក្នុងឆ្នាំ២០១៩នេះឃើញថា នៅមន្ទីរពេទ្យបង្អែក អាត្រាអ្នកកើតជំងឺនេះមានការថយចុះច្រើន ។ លោកបញ្ជាក់ថា ជំងឺនេះចែកចេញជាបីប្រភេទ ក្នុងនោះ មានជំងឺគ្រុនចាញ់ប្រភេទ ហ្វ្លាស់ស្មូដ្យូម ហ្វ៉ាស៊ីហ្វ៉ារ៉ូម – នឹងប្រភេទម៉ិច ដែលតែងតែកើតឡើងជាញឹកញាប់ ដែលបង្កឡើងដោយសារមូសដែកគោលញីខាំ ។
លោកបន្តថា អាការៈអ្នកដែលសង្ស័យថា កើតជំងឺនេះ ធ្វើឲ្យអ្នកជំងឺមានអាការៈ រងារញាក់ ក្តៅខ្លួន និងបែកញើសខុសពីធម្មតា ។ ដូច្នេះ ប្រសិនបើប្រជាពលរដ្ឋដែលមានរោគសញ្ញានេះ ត្រូវតែប្រញាប់ទៅធ្វើតេស្តរោគមេរោគគ្រុនចាញ់នេះ តាមរយៈភ្នាក់ងារសុខភាពភូមិ បុស្តិ៍សុខភាព មណ្ឌលសុខភាព ឬមន្ទីរពេទ្យបង្អែកដែលនៅជិតបំផុត ឲ្យបានទាន់ពេលវេលា បើពុំនោះជំងឺនេះអាចធ្វើឲ្យអ្នកជំងឺប្រឈមនឹងការបាត់បង់ជីវិត ។
យោងតាមរបាយការណ៍របស់មន្ទីរសុខាភិបាលខេត្តព្រះវិហារ គិតចាប់ពីខែមករា ដល់ខែកញ្ញា ឆ្នាំ២០១៩នេះ បង្ហាញថាជ ំងឺគ្រុនចាញ់នៅខេត្តព្រះវិហារ កើតឡើងចំនួន១០៧០ករណី ក្នុងនោះ ជំងឺគ្រុនចាញ់ប្រភេទហ្វ្លាស់ស្មូដ្យូម ហ្វ៉ាស៊ីហ្វ៉ារ៉ូម មានចំនួន២២ករណី ហ្វ្លាស់ស្មូដ្យូម វីវ៉ាក់ មានចំនួន១០៣៧ករណី និងប្រភេទម៉ិច មានចំនួន២២ករណី បើធៀបនឹងរយៈពេលដូចគ្នាឆ្នាំ២០១៨ ជំងឺគ្រុនចាញ់ទាំង៣ប្រភេទនេះ ថយចុះ២២៨៨ករណី ។
ចែករំលែកព័តមាននេះ