រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា មន្ត្រីយោធាម្នាក់បានស្លាប់ក្នុងហេតុការណ៍គ្រោះថ្នាក់ចរាចរណ៍រវាងរថយន្តដឹកទឹកកកមួយគ្រឿងបុកពីក្រោយម៉ូតូមួយគ្រឿង បណ្តាលឱ្យកិនអ្នកបើកបរម៉ូតូស្លាប់នៅនឹងកន្លែង ។ ហេតុការណ៍ខាងលើបានកើតឡើងកាលពីវេលាម៉ោង៧និង១០នាទីព្រឹកថ្ងៃទី៩ តុលា ឆ្នាំ២០១៩ នៅចំណុចមុខវត្តអង្គក្រពើ…
រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា មន្ត្រីយោធាម្នាក់បានស្លាប់ក្នុងហេតុការណ៍គ្រោះថ្នាក់ចរាចរណ៍រវាងរថយន្តដឹកទឹកកកមួយគ្រឿងបុកពីក្រោយម៉ូតូមួយគ្រឿង បណ្តាលឱ្យកិនអ្នកបើកបរម៉ូតូស្លាប់នៅនឹងកន្លែង ។
ហេតុការណ៍ខាងលើបានកើតឡើងកាលពីវេលាម៉ោង៧និង១០នាទីព្រឹកថ្ងៃទី៩ តុលា ឆ្នាំ២០១៩ នៅចំណុចមុខវត្តអង្គក្រពើ តាមបណ្តោយមហាវិថីឈ្នះឈ្នះ ក្នុងភូមិត្រពាំងវែង សង្កាត់គោករកា ខណ្ឌព្រែកព្នៅ ។
ភាគីខាងរថយន្តដឹកទឹកកកមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ ២AA-៣១៦៤ បើកបរដោយឈ្មោះប៊ន វីញ ភេទប្រុស អាយុ២៤ឆ្នាំ រស់នៅភូមិចំបក់ ឃុំល្វែងឫស្សី ស្រុកជីក្រែង ខេត្តសៀមរាប ត្រូវបានសមត្ថកិច្ចឃាត់ខ្លួន ។ ចំណែកភាគីខាងម៉ូតូមួយគ្រឿងម៉ាកហុងដា ពណ៌ខ្មៅ ពាក់ស្លាកលេខ ភ្នំពេញ ១GD-៩៧០៣ បើកបរដោយឈ្មោះណៃ នី ភេទប្រុស អាយុ៤៣ឆ្នាំ ជាមន្ត្រីយោធាថ្នាក់វរសេនីយ៍ទោនៅក្រសួងការពារជាតិ មានទីលំនៅផ្ទះលេខ២១៧ ផ្លូវទន្លេសាប សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ បានស្លាប់នៅនឹងកន្លែងកើតហេតុ ។
តាមសេចក្តីរាយការណ៍បានបន្តថា មុនពេលកើតហេតុ គេឃើញជនរងគ្រោះជិះម៉ូតូមួយគ្រឿងម៉ាកហុងដា ធ្វើតាមបណ្តោយមហាវថីឈ្នះឈ្នះ ក្នុងទិសដៅពីត្បូងទៅជើង លុះមកដល់ចំណុចកើតហេតុខាងលើ ស្រាប់តែមានរថយន្តដឹកទឹកកកមួយគ្រឿងដែលធ្វើដំណើរស្របទិសគ្នាមកពីក្រោយម៉ូតូ បានបុកម៉ូតូយ៉ាងពេញទំហឹង បណ្តាលឱ្យខ្ទាតប្រមាណជា៥០ម៉ែត្រ ហើយរថយន្តបានកិនជនរងគ្រោះស្លាប់ភ្លាមៗនៅនឹងកន្លែង ចំណែកម៉ូតូបានប៉ើងចម្ងាយប្រមាណពី៣០ទៅ៤០ម៉ែត្រពីសពជនរងគ្រោះ ។ បន្ទាប់ពីកើតហេតុ សមត្ថកិច្ច និងប្រជាពលរដ្ឋបានចាប់ឃាត់ខ្លួនអ្នកបើកបររថយន្តបានភ្លាមៗផងដែរ ។
តាមសេចក្តីរាយការណ៍បានបន្តទៀតថា មុនពេលកើតហេតុ ជនរងគ្រោះបានចេញពីហាងលក់ដូរនៅឯបែកចាន ក្នុងគោលបំណងធ្វើដំណើរទៅធ្វើការនៅវិមានឈ្នះឈ្នះ ស្រាប់តែជួបគ្រោះថ្នាក់រហូតបាត់បង់ជីវិតបែបនេះតែម្តង ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕ (កែសម្រួលដោយ ៖ ធីតា)
ចែករំលែកព័តមាននេះ