រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានគូសបញ្ជាក់ថា ការកម្ចាត់មេឧទ្ទាមក្រៅច្បាប់ សម រង្ស៊ី ដែលចូលមកស្រុកវិញគឺជាភារកិច្ចរបស់សម្តេចពិជ័យសេនា ទៀ បាញ់ ឧបនាយកដ្ឋមន្ត្រី រដ្ឋមន្ត្រីក្រសួងការពារជាតិ ដោយសារតែពួកគេបានដើរហួសបន្ទាត់ក្រហមហើយ ។
សម្តេចតេជោ បានថ្លែងក្នុងពិធីជួបសំណេះសំណាលនិងផ្តល់រង្វាន់លើកទឹកចិត្តជាមួយ សិស្សានុសិស្សដែលប្រឡងជាប់សញ្ញាបត្រមធ្យមសិក្សាទុតិយភូមិ(បាក់ឌុប) ដែលទទួលបាននិទ្ទេសAចំនួន៤៤៣នាក់ នាព្រឹកថ្ងៃទី៧ខែតុលា នៅវិមានសន្តិភាពថា ៖ «មេឧទ្ទាមក្រៅច្បាប់និយាយឡើងសុទ្ធតែមានមនុស្សរាប់លាននាក់អមដំណើរខ្លួន តើអាហ្នឹងវាមកតាម ហ្នឹង ហើយដឹកពីកូរ៉េផង ដឹកពីថៃផង ។ បើមកពីកូរ៉េទាល់តែយន្តហោះ៥០០គ្រឿង គេគិតថាកម្មករនៅថៃគាំទ្រទាំងអស់ឬម៉េច ? មកពីថៃបើមកខុសកន្លែងក្រែងត្រូវមីនងាប់ទៀត ព្រោះដោះមីនមិនទាន់អស់ទេនៅព្រំដែនកម្ពុជា-ថៃ។ ក្រៅពីមីន នៅមានកងទ័ពសងខាងទៀតតើអ្នកណាឲ្យមក?» ។
តបនឹងការកាន់លិខិតបារាំងចូលកម្ពុជាវិញត្រូវបានសម្តេចតេជោ ហ៊ុន សែន បញ្ជាក់ថា៖ «មេឧទ្ទាមក្រៅច្បាប់បានទាត់សញ្ជាតិខ្មែរចោលហើយ ដូច្នេះនៅពេលចូលស្រុកខ្មែរវិញកាន់តែស្រួលនិងកាន់តែត្រូវ កាន់ប៉ាស្ព័របារាំងចូលស្រុកខ្មែរត្រូវហើយ» ។ សម្តេចតេជោបានគូសបញ្ជាក់ទៀតថា ៖ «មេឧទ្ទាមក្រៅច្បាប់មិនចាំបាច់និយាយច្រើននោះទេ ។ អាហ្នឹងគឺភារកិច្ចរបស់ ទៀ បាញ់ ហើយក្នុងការចាត់ការព្រោះឆ្លងកាត់បន្ទាត់ក្រហមហើយ ។ មេឧទ្ទាមនេះបានប្រមាថព្រះមហាក្សត្រ ដែលជារឿងមិនធម្មតានោះទេ ។ ប្រើពាក្យប្រមាថព្រះមហាក្សត្រសុទ្ធតែពាក្យ«វា» ឲ្យព្រះមហាក្សត្រធ្វើជាស្តេចល្ខោនឲ្យព្រះមហាក្សត្រដាក់រាជ្យទៅ ដែលជាទង្វើព្រហើនហួស ។
សម្តេចតេជោសង្កត់ធ្ងន់ថា ៖ «អីុចឹងគោលដៅរបស់វា មិនមែនត្រឹមតែដក ហ៊ុន សែន ពីតំណែងទេ គឺដកព្រះមហាក្សត្រចេញ«…» វានិយាយទៀត អុីចឹងស្នើឲ្យព្រះមហាក្សត្រដាក់រាជ្យទៅកុំនៅធ្វើស្តេចល្ខោន
នៅឲ្យហ៊ុន សែនប្រើ ដើម្បីហ៊ុន សែន យកលម្អរបបព្រៃផ្សៃ ។ យើងគិតថា រដ្ឋធម្មនុញ្ញចែងថាបើអត់ព្រះមហាក្សត្រគេទុករយៈពេល៧ថ្ងៃទេ ។
ដូច្នេះ គោលដៅរបស់មេឧទ្ទាមក្រៅច្បាប់មិនសំដៅតែហ៊ុន សែន ទេ សំដៅដូររបបបច្ចុប្បន្ននេះចោលតែម្តង (របបរាជានិយមអាស្រ័យរដ្ឋធម្មនុញ្ញ) ប្រទេសគ្មានច្បាប់» ។ សម្តេចប្រមុខរាជរដ្ឋាភិបាលបានគូសបញ្ជាក់ទៅកាន់ក្រុមប្រឆាំងថា ៖ «ទង្វើនេះមិនអាចអត់ឱនឲ្យបានទេ ។ អ្នកទាំងឡាយដែលចូលពាក់ព័ន្ធ សុំកុំចាត់ទុករាជរដ្ឋាភិបាលបំពានសិទ្ធិរបស់អ្នក ។ បន្ទាត់ក្រហមគឺបានឆ្លងហើយ ឃើញមួយចាប់មួយ ហើយកាត់ទោសអត់ទាមទារអ្វីនោះទេ» ។
ជាមួយគ្នានេះ សម្តេចតេជោក៏បានចំអកទៅកាន់ក្រុមឧទ្ទាមក្រៅច្បាប់(ក្រុមលោក សម រង្ស៊ី)ថា បើចិត្ត សឿង ឬក្លាហាន យុទ្ធនាការម្រាមដៃ៩ គួរណាស់កាត់ម្រាម១ចោលតែម្តងទៅ ។ ខ្វះថ្ងៃរើសអី មកយកថ្ងៃទី៩ ខែវិច្ឆិកា ជាថ្ងៃបុណ្យឯករាជ្យជាតិមកធ្វើយុទ្ធនាការ ។ ប៉ុន្តែឥឡូវយើងប្រែក្លាយថ្ងៃ៩ ខែវិច្ឆិកា ដែលជាថ្ងៃកំណើតកងយោធពលខេមរភូមិន្ទ ឲ្យទៅជាថ្ងៃទទួលទានអំបុកទាំងអស់គ្នា ។ សម្តេចតេជោថ្លែងថា ៖ «អំបុកថ្ងៃ៩ វិច្ឆិកា គឺអំបុកការពារជាតិ សាសនា និងព្រះមហាក្សត្រ»។ បាវនាទាំង៣នេះយើងការពាររួចហើយ តែដោយសារមានការប៉ុនប៉ងធ្វើរដ្ឋប្រហារ អុីចឹង អំបុកនៅថ្ងៃនោះគឺជាអំបុកការពារជាតិ សាសនា និងព្រះមហាក្សត្រតែម្តង ។
សម្តេចតេជោបានលើកឡើងថា អ្នកកំពុងវាយតម្លៃប្រជាជនកម្ពុជាទាបពេកហើយ បានវាយតម្លៃផ្ទៃក្នុងគណបក្សប្រជាជនកម្ពុជាទាបពេកហើយ ក៏វាយតម្លៃហ៊ុន សែនទាបពេកដែរ ។ សម្តេចតេជោ ហ៊ុន សែន ថ្លែងទៀតថា កងកម្លាំងប្រដាប់អាវុធនិងកងទ័ពបានត្រៀមរួចហើយ ក្នុងការបង្ក្រាបប្រសិនមានករណីបះបោរនៅថ្ងៃ៩ ខែវិច្ឆិកាខាងមុខនេះ ។
សម្តេចតេជោបានបញ្ជាក់ថា ៖ «រឿងនេះ ឃើញត្រង់ណាវ៉ៃត្រង់ហ្នឹងហើយ មិនចាំបាច់មានដីកាចាប់ខ្លួនឬមិនចាប់ខ្លួននោះទេ តែឃើញត្រង់ណាវៃ៉ត្រង់ហ្នឹងតែម្តង ផ្តល់ឱកាសឲ្យកម្លាំងប្រដាប់អាវុធ ក្នុងនោះមានទាំងកងទ័ពចេញធ្វើប្រតិបត្តិការ ។ កងទ័ពត្រូវដឹងតួនាទី នៅពេលសភាពការណ៍ធម្មតាកងទ័ពអត់ចេញ
ទេ គឺចេញ តែសមត្ថកិច្ចប៉ូសិលដែលគេហៅថានគរបាលយុត្តិធម៌ ។ ប៉ុន្តែបើប្រកាសបែបនេះហើយបានសេចក្តីថា កងទ័ពបានចាប់ផ្តើមពង្រាយហើយប្រើអាវុធគ្រប់ធុន ព្រោះវាមិនមែនជាបាតុកម្មទាមទារទេ
តែវាចូលដល់ការប្រដាប់អាវុធ» ។
សម្តេចបានលើកឡើងថា ចំពោះកម្លាំងគាំ ទ្រនៅក្នុងស្រុក នៅពេលឃើញពេលណាចាប់ពេលហ្នឹងតែម្តង ។
ជាមួយគ្នានេះ សម្តេចតេជោក៏បានអះអាងថា ពិធីបុណ្យអុំទូក អកអំបុក សំពះព្រះខែ នៅតែធ្វើជាធម្មតា ទោះបីជាទឹកស្រកសល់ត្រឹម១ម៉ែត្រក៏ដោយ ។ នៅថ្ងៃទី៩ ខែវិច្ឆិកា ជាថ្ងៃអកអំបុកទូទាំងប្រទេសតែម្តង ហើយនៅថ្ងៃទី៩ និង១០ ខែវិច្ឆិកា ព្រះមហាក្សត្រយាងរួច ពិធីបុណ្យអុំទូក ដោយនៅពេលល្ងាចប្រទានភ្លើងចាប់ផ្តើមប្រទីបនៃពិធីបុណ្យអុំទូក ។ ថ្ងៃទី១១ ខែវិច្ឆិកា ពេលល្ងាចព្រះមហាក្សត្រយាងមកពន្លត់ទៀនជ័យ និងល្ងាចទី១២ ខែវិច្ឆិកា យាងទៅកាត់ព្រ័ត្រពិធីអុំទូក ។
សម្តេចតេជោ បានផ្តាំទៅក្រុមប្រឆាំងថា៖ «អ្នកនៅខាងក្នុងប្រទេសត្រូវចាំឲ្យច្បាស់ថា គេ ចាប់ផ្តើមធ្វើហើយរហូតដល់ថ្ងៃទី៩ ខែវិច្ឆិកាហើយជនបរទេសទាំងឡាយត្រូវយល់ឲ្យបានថា ផែនការរដ្ឋប្រហារមិនអាចទុកឲ្យសម្រេចបាននោះទេ» ។ សម្តេចតេជោបញ្ជាក់ថា ផែនការឈានដល់ការផ្ទុះអាវុធរហូតដល់ផ្តួលរំលំមិនអាចអនុញ្ញាតបានទេ ។
អ្នកបង្ហោះហ្វេសប៊ុកនៅក្នុងយុទ្ធនាការហ្នឹងក៏ត្រូវចាប់ខ្លូួនដែរ ព្រោះមិនមែនជាសិទ្ធិបញ្ចេញមតិទេ គឺជាការចូលរួមអំពើ«ក្បត់»ដើម្បីផ្តួលរំលំតាមរយៈកម្លាំងប្រដាប់អាវុធ ។ យើងមិនយល់ព្រមឲ្យអ្នកឯងធ្វើរឿងនេះ» ។ សម្តេចតេជោអះអាងថា អ្នកដែលចូលរួមជាមួយយុទ្ធនាការផែនការរបស់ឧទ្ទាមក្រៅច្បាប់ទោះបីជារត់ដល់ទីណាក៏មិនអាចរួចខ្លួនដែរ ព្រោះអ្វីៗត្រូវដឹងអស់ហើយ ។
ជាក់ស្តែងនោះ អ្នកធ្វើនៅខេត្តត្បូុងឃ្មុំ និងកំពង់ចាមហើយរត់ត្រូវចាប់នៅប៉ោយប៉ែត ហើយអ្នកដែលរត់ ទៅនៅបាងកកក៏មិនប្រាកដថាមានសុវត្ថិភាពនោះទេ គឺត្រូវចាប់ខ្លួនទៀត ព្រោះកម្ពុជានិងថៃមានសហប្រតិបតិ្តការនឹងគ្នា ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ