ខេត្តមណ្ឌលគិរី ៖ ឈ្មួញដុះស្លែជួញដូរសត្វព្រៃម្នាក់ ត្រូវបានព្រះរាជអាជ្ញាររងអមសាលាដំបូងខេត្តមណ្ឌល គិរីបញ្ជាឱ្យមន្ត្រីជំនាញដោះលែងមានសេរីភាពវិញ ដោយដោះស្រាយត្រឹមមន្ទីរបរិស្ថានប៉ុណ្ណោះ ក្រោយរងការឃុំខ្លួនអស់រយៈពេល២ថ្ងៃបន្ទាប់ពីចាប់ខ្លួនបាន ជាក់ស្តែងជាមួយសត្វស្វាព្រៃ១៣ក្បាល។គួររំលឹកថា៖ ក្របួចចាប់ទាំងមនុស្ស ទាំងស្វា និងទាំងឡាន
សេចក្តីរាយការណ៍បានឲ្យដឹងថា ឈ្មួញជួញដូរសត្វស្វាស្រូវចំនួន១៣ក្បាល ត្រូវបានដោះលែងវិញ នៅថ្ងៃទី០៧ ខែតុលា នេះ។ ឈ្មួញជួញដូរសត្វព្រៃខាងលើ ត្រូវបានឃុំខ្លួននៅមន្ទីរបរិស្ថានរយៈពេល២ថ្ងៃប៉ុណ្ណោះ និងពុំត្រូវបញ្ជួនដល់ស្ថាប័នតុលាការទេ ។
ជាការកត់សម្គាល់ នៅព្រឹកថ្ងៃទី០៧ តុលា ដដែល ក្រោយចេញពីកន្លែងសមត្ថកិច្ចជំនាញ ជននេះបានជិះរថយន្តដែលធ្លាប់ដឹកសត្វព្រៃកន្លងមក និងត្រូវចាប់បង្ក្រាបកាលពីប៉ុន្មានថ្ងៃមុនទៅឌឺដង សមត្ថកិច្ចចម្រុះនៅគោលដៅចរាចរណ៍ក្នុងភូមិឆ្នែង ឃុំស្រែខ្ទុម ស្រុកកែវសីមា ដែលជាអ្នកចាប់ជនសង្ស័យពេលដឹកស្វា។
ប្រភពពីមន្ទីរបរិស្ថានខេត្តមណ្ឌលគិរីបានឲ្យដឹងថា ពិតជាដោះលែងជនសង្ស័យរូបនោះមែន ខណៈបានធ្វើការពិន័យតាមច្បាប់ ស្តីពីបទល្មើសសត្វព្រៃ។ជនសង្ស័យ គឺដោះលែងនៅត្រឹមតែមន្ទីរបរិស្ថានតែប៉ុណ្ណោះ មិនបានបញ្ជួនទៅស្ថាប័នតុលាការខេត្តមណ្ឌលគិរីឡើយ ត្បិតព្រះរាជអាជ្ញារងម្នាក់ លោកឲ្យដោះស្រាយតែត្រឹមមន្ទីរបរិស្ថាន។
សូមរំលឹកថា កាលពីព្រឹកថ្ងៃទី០៥ តុលា កន្លងទៅ អាជ្ញាធរស្រុកកែវសីមា ស្ទាក់ចាប់បានបុរសម្នាក់ឈ្មោះ ហ៊ុយ ហួរ អាយុ៣៤ឆ្នាំ ជាជនជាតិខ្មែរ បើកបររថយន្តម៉ាកឡិចស៊ីស៣៣០ ពាក់ស្លាកលេខ2R-8247 រកឃើញសត្វស្វាច្រកក្នុងថង់ចំនួន១៣ក្បាលក្នុងរថយន្ត ដែលដឹកមកតាំងពីស្រុកកោះញែក ។
ចែករំលែកព័តមាននេះ