រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងកងកម្លាំងប្រដាប់អាវុធនិងកងទ័ពបានត្រៀមរួចហើយក្នុងការបង្ក្រាប ប្រសិនមានករណីបះបោរនៅថ្ងៃ៩ វិច្ឆិកាខាងមុខនេះ ។ សម្តេចតេជោបានបញ្ជាក់នៅថ្ងៃទី០៧…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងកងកម្លាំងប្រដាប់អាវុធនិងកងទ័ពបានត្រៀមរួចហើយក្នុងការបង្ក្រាប ប្រសិនមានករណីបះបោរនៅថ្ងៃ៩ វិច្ឆិកាខាងមុខនេះ ។ សម្តេចតេជោបានបញ្ជាក់នៅថ្ងៃទី០៧ ខែតុលាយ៉ាងដូច្នេះថា «រឿងនេះ ឃើញត្រង់ណាវៃត្រង់នឹងហើយ មិនចាំបាច់មានដីកាចាប់ខ្លួន ឬមិនចាប់ខ្លួននោះទេ ឃើញត្រង់ណាវៃត្រង់ហ្នឹងតែម្តង ផ្តល់ឱកាសឲ្យកម្លាំងប្រដាប់អាវុធ ក្នុងនោះមានទាំងកងទ័ពចេញធ្វើប្រតិបត្តិការ ។
កងទ័ពត្រូវដឹងតួនាទីនៅពេលសភាពការណ៍ធម្មតាកងទ័ពអត់ចេញទេ គឺចេញតែសមត្ថកិច្ចប៉ូលិស ដែលគេហៅនគរបាលយុត្តិធម៌ ប៉ុន្តែបើប្រកាសបែបនេះហើយបានសេចក្តីថា កងទ័ពបានចាប់ផ្តើមពង្រាយ ហើយប្រើអាវុធគ្រប់ធន់ ព្រោះវាមិនមែនជាបាតុកម្មទាមទារទេ តែវា ចូលដល់ការប្រដាប់អាវុធ» ។ សម្តេចក៏បានលើកឡើងថា ចំពោះកម្លាំងគាំទ្រនៅក្នុងស្រុកនៅពេលឃើញពេលចាប់ពេលនឹងតែម្តង ។ ជាមួយគ្នានោះដែរ សម្តេចតេជោក៏បានអះអាងថា ពិធីបុណ្យអ៊ុំទូកអកអំបុកសំពះព្រះខែនៅតែធ្វើជាធម្មតា ទោះបីជាទឹកស្រកសល់មួយ១ម៉ែត្រក៏ដោយ ។
សម្តេចបន្តថា នៅថ្ងៃទី៩ វិច្ឆិកា ជាថ្ងៃអកអំបុកទូទាំងប្រទេសតែម្តង ហើយនៅថ្ងៃទី៩ និង១០វិច្ឆិកា ព្រះមហាក្សត្រ យាងរួចពិធីបុណ្យអ៊ុំទូកដោយនៅពេលល្ងាចប្រទានភ្លើងចាប់ផ្តើមប្រទីបនៃពិធីបុណ្យអ៊ុំទូក ថ្ងៃទី១១ ពេលល្ងាចព្រះមហាក្សត្រយាងមកពន្លត់ទៀនជ័យ និងល្ងាចទី១២ យាងទៅកាត់ព្រាត់ពិធីអ៊ុំទូក ។ សម្តេចតេជោ ក៏ផ្តាំទៅក្រុមប្រឆាំងថា «អ្នកនៅខាងក្នុងប្រទេសត្រូវចាំឲ្យច្បាស់ថា គេចាប់ផ្តើមធ្វើហើយរហូតដល់ថ្ងៃនឹង (៩វិច្ឆិកា) ហើយជនបរទេសទាំងឡាយត្រូវយល់ឲ្យបានថា ផែនការរដ្ឋប្រហារមិនអាចទុកឲ្យសម្រេចបាននោះទេ» ។
សម្តេចបញ្ជាក់ ថា ផែនការឈានដល់ការផ្ទុះអាវុធរហូតដល់ផ្តួលរំលំរដ្ឋមិនអាចអនុញ្ញាតបានទេ ។ អ្នកបង្ហោះហ្វេសប៊ុកនៅក្នុងយុទ្ធនាការនឹងក៏ត្រូវច្បាប់ខ្លូនដែរ ព្រោះមិនមែនជាសិទ្ធិបញ្ចេញមតិទេ គឺជាការចូលរួមអំពើ«ក្បត់» ដើម្បីផ្តួលរំលំតាមរយៈកម្លាំងប្រដាប់អាវុធ យើងមិនយល់ព្រមឲ្យអ្នកឯងធ្វើរឿងនេះ» ។ សម្តេចក៏អះអាងថា អ្នកដែលចូលរួមជាមួយយុទ្ធនាការផែនការរបស់ឧន្ទាមក្រៅច្បាប់ ទោះបីជារត់ដល់ទីណាក៏មិនអាចរួចខ្លួនដែរ ព្រោះអ្វីដែលត្រូវដឹងអស់ហើយ ជាក់ស្តែងនោះអ្នកធ្វើនៅខេត្តត្បូងឃ្មុំ និងកំពង់ចាមហើយរត់ត្រូវចាប់នៅប៉ោយប៉ែត ហើយអ្នកដែលរត់នៅបាងកកក៏មិនប្រាកដថា មានសុវត្ថិភាពនោះទេ គឺត្រូវចាប់ខ្លួនទៀតព្រោះកម្ពុជា និងថៃមានសហប្រតិបតិ្តការនឹងគ្នា ៕ កែសម្រួលដោយ ៖ សុឃាក់
ចែករំលែកព័តមាននេះ