ខេត្តកណ្ដាល ៖ ជនសង្ស័យជាជនជាតិចិនចំនួន៥នាក់បានធ្វើសកម្មភាពយកកូនកាំបិតភ្ជង់ប្លន់បុរសជនជាតិចិនជាម្ចាស់ហាងលក់ទំនិញមួយកន្លែង និងប្រមូលយកលុយអស់ប្រហែល៣ពាន់ដុល្លារ និងទូរស័ព្ទមួយគ្រឿង រួចនាំគ្នាគេចខ្លួនបាត់ដោយសុវត្ថិភាព ។ ហេតុការណ៍ខាងលើនេះបានកើតឡើងកាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី៦ ខែតុលា ឆ្នាំ២០១៩…
ខេត្តកណ្ដាល ៖ ជនសង្ស័យជាជនជាតិចិនចំនួន៥នាក់បានធ្វើសកម្មភាពយកកូនកាំបិតភ្ជង់ប្លន់បុរសជនជាតិចិនជាម្ចាស់ហាងលក់ទំនិញមួយកន្លែង និងប្រមូលយកលុយអស់ប្រហែល៣ពាន់ដុល្លារ និងទូរស័ព្ទមួយគ្រឿង រួចនាំគ្នាគេចខ្លួនបាត់ដោយសុវត្ថិភាព ។
ហេតុការណ៍ខាងលើនេះបានកើតឡើងកាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី៦ ខែតុលា ឆ្នាំ២០១៩ ស្ថិតនៅចំណុចហាងលក់ទំនិញមួយកន្លែង យីហោ ផ្សារទំនើបសាធារណៈ ក្នុងភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល ។
តាមរបាយការណ៍ពីសមត្ថកិច្ចបានបញ្ជាក់ថា បុរសរងគ្រោះជាម្ចាស់ហាងខាងលើឈ្មោះជូ ស៊ាវឡៃ ។ ចំណែកជនសង្ស័យមានគ្នា៥នាក់មិនទាន់ស្គាល់អត្តសញ្ញាណនោះទេ គ្រាន់តែដឹងថាជាជនជាតិចិន បន្ទាប់ពីធ្វើសកម្មភាពរួច នាំគ្នារត់គេចខ្លួនបាត់ ។ រីឯសម្ភារៈដែលបាត់បង់រួមមាន លុយចំនួនប្រហែល៣០០០ដុល្លារ និងទូរស័ព្ទដៃម៉ាក iPhone X ពណ៌ខ្មៅ មួយគ្រឿង។
តាមការបំភ្លឺរបស់ជនរងគ្រោះបានឲ្យដឹងថា មុនពេលកើតហេតុ ជនរងគ្រោះ និងម្តាយ កំពុងតែនៅក្នុងហាងលក់ដូរទំនិញដូចសព្វដង ។ ចំណែកឪពុករបស់ជនរងគ្រោះបានយកទំនិញទៅឲ្យម៉ូយ(ជាជនជាតិចិនដូចគ្នា)នៅខាងក្រៅ ។
តាមប្រភពដដែលបានបន្តថា ពេលនោះមានជនសង្ស័យចំនួន៥នាក់ជាជនជាតិចិន ស្លៀកពាក់អាវដៃវែង ពណ៌ផ្សេងគ្នា ពាក់អាវមានមួកគ្របក្បាល ខ្លះពាក់ម៉ាស់សល់តែប្រឡង់ភ្នែក បានដើរចូលមកក្នុងហាងរបស់ជនរងគ្រោះ ។ ខណៈនោះជនរងគ្រោះមិនបានចាប់អរម្មណ៍ទេ ដោយស្មានតែភ្ញៀវចូលមកទិញទំនិញធម្មតា ស្រាប់តែក្រុមជនសង្ស័យបានដកកូនកាំបិតភ្ជង់ជនរងគ្រោះ រួចធ្វើសកម្មភាពប្រមូលយកលុយទុកក្នុងកេសតុអស់ចំនួនប្រហែល៣.០០០ដុល្លារ និងទូរស័ព្ទ iPhone X មួយគ្រឿង រួចនាំគ្នារត់គេចខ្លួនបាត់អស់ ។
បច្ចុប្បន្ន កម្លាំងជំនាញអធិការដ្ឋានបានកំពុងចុះសហការស៊ើបអង្កេតនិងស្រាវជ្រាវករណីនេះ ដើម្បីតាមចាប់ខ្លួនក្រុមជនសង្ស័យខាងលើយកមកផ្តន្ទាទោសតាមច្បាប់ហើយ ៕
ចែករំលែកព័តមាននេះ