រាជធានីភ្នំពេញ ៖ ពាក្យមួយនិយាយថា ឆក់គេបានវាគ្រាន់ គេទាន់ទោះសម្ងំក្នុងលូក៏គេចមិនរួចដែរ ។ ទាក់ទិននឹងបញ្ហានេះជនសង្ស័យ២នាក់ ដែលធ្វើសកម្មភាពឆក់តែមិនដឹងថា ឆក់កាបូបឬទូរស័ព្ទទេ បាន
ជិះម៉ូតូរត់គេចខ្លួន ប៉ុន្តែដោយសារភ័យស្លន់ស្លោភ្នែកនៅកញ្ចឹង.កក៏ជ្រុលទៅបុកម៉ូតូស្គូពី១គ្រឿង ដែលកំពុងធ្វើដំណើរតាមផ្លូវពេញទំហឹងបណ្តាលឱ្យដួលហើយបានព្យាយាមរត់គេចខ្លួនដោយជើង ត្រូវបានកម្លាំងខណ្ឌ៧មករា ដេញតាមចាប់ក្របួចជាប់ទាំង២នាក់យកទៅសួរនាំ ។
ហេតុការណ៍នេះបានកើតឡើងកាលពីវេលាម៉ោង១០និង៣០នាទីយប់ថ្ងៃទី៣ តុលា តាមបណ្តោយផ្លូវលេខ១១៣ នៅចំណុចមន្ទីរសម្រាកព្យាបាលយីហោហ្វអេវើយុំាង ស្ថិតនៅក្នុងសង្កាត់បឹងកេងកង២ ខណ្ឌចំការមន ។
សាក្សីដែលឃើញហេតុការណ៍ផ្ទាល់ភ្នែកបានឱ្យដឹងថា មុនពេលកើតហេតុគេបានឃើញសមត្ថកិច្ចខណ្ឌ៧មករា កំពុងតែល្បាតនៅក្នុងមូលដ្ឋាន ក៏ស្រាប់តែប្រទះឃើញជនសង្ស័យ២នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ សេរី២០១៩ ពាក់ស្លាកលេខភ្នំពេញ 1HJ1380 បើកបរតាមបណ្តោយផ្លូវលេខ១០៥ ក្នុងទិសដៅពីជើងទៅត្បូងមិនដឹងថា ជនសង្ស័យខាងលើ២នាក់នោះឆក់ទូរស័ព្ទដៃឬកាបូបនោះទេ ពីស្ត្រីម្នាក់ជិះម៉ូតូម៉ាក Today មិនចាំពណ៌មិនចាំស្លាកលេខបានសម្រេចហើយបម្រុងនឹងបើករត់គេចខ្លួន ។
ប៉ុន្តែព្រះមិនជួយដោយចៃដន្យអាក្រក់ក៏ត្រូវបានសមត្ថកិច្ចប្រទះឃើញដេញតាមចាប់ ធ្វើឱ្យជនសង្ស័យភ័យស្លន់បានបើករត់គេចខ្លួន ក៏ជ្រុលទៅបុកនឹងម៉ូតូមួយគ្រឿងទៀតម៉ាកហុងដាស្គូពី ពណ៌ខ្មៅ ពាក់ស្លាកលេខភ្នំពេញ 1BQ4450 បើកបរតាមបណ្តោយផ្លូវ២៧៨ ក្នុងទិសដៅពីលិចទៅកើតបណ្តាលឱ្យម៉ូតូស្គូពីខូចអស់មួយកំណាត់ខាងមុខ ។
ចំណែកឯជនសង្ស័យបានព្យាយាមស្ទុះរត់ទាំងត្រដាបត្រដួសហើយជនម្នាក់ក៏បានលោតចូលទៅពួនសម្ងំក្នុងលូទឹកស្អុយដែលមានជម្រៅជាង១ម៉ែត្រ ។ ទោះបីចូលលាក់ខ្លួនក្នុងលូទឹកស្អុយយ៉ាងណាក៏គេចមិនរួចដែរត្រូវបានប៉ូលិសជួយទាញដៃឡើងមកលើ និងម្នាក់ទៀតបានរត់ទៅដល់ផ្លូវលេខ១១៣ ទើបសមត្ថកិច្ចខណ្ឌ៧មករាបានក្របួចជាប់ យកមកសួរនាំទាំង២នាក់ ។
ក្រោយពេលកើតហេតុខាងលើនេះជនសង្ស័យទាំង២នាក់ត្រូវបានកម្លាំងសមត្ថកិច្ចកសាងសំណុំរឿងបញ្ចូនទៅកាន់តុលាការដើម្បីចាត់ការទៅតាមនីតិវិធី ៕
ចែករំលែកព័តមាននេះ