រាជធានីភ្នំពេញ ៖ សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងរវាងព្រះរាជាណាចក្រកម្ពុជា និងអង្គការហាមឃាត់អាវុធគីមីស្ដីពីបុព្វសិទ្ធិ និងអភ័យឯកសិទ្ធិរបស់អង្គការហាមឃាត់អាវុធគីមី ដែលមាន៣មាត្រា ត្រូវរដ្ឋសភាអនុម័តជាឯកច្ឆ័ន្ទ ។ សេចក្តីព្រាងច្បាប់នេះ ត្រូវបានសមាជិករដ្ឋសភាចំនួន១០៥រូប បានលើកដៃអនុម័តទាំងស្រុងនៅក្នុងសម័យលើកទី៣ នីតិកាលទី៦ ក្រោមអធិបតីភាពសម្តេច ហេងសំរិន ប្រធានរដ្ឋសភា ។
សេចក្តីព្រាងច្បាប់នេះ ត្រូវបានរដ្ឋសភាអនុម័តម្តងមួយមាត្រា ។ យោងតាមសេចក្តីថ្លែងហេតុបានឲ្យដឹងថា ព្រះរាជាណាចក្រកម្ពុជាជាសមាជិកអង្គការហាមឃាត់អាវុធគីមី ដែលបានចុះហត្ថលេខា កាលពីថ្ងៃទី១៥ ខែមករា ឆ្នាំ១៩៩៣ ដោយបានផ្តល់សច្ចាប័ន នៅថ្ងៃទី១៩ ខែកក្ក ដា ឆ្នាំ២០០៥ ។ ចំពោះកិច្ចព្រមព្រៀងរវាងព្រះរាជាណាចក្រកម្ពុជា និងអង្គការហាមឃាត់អាវុធគីមីស្ដីពីបុព្វសិទ្ធិ និងអភ័យឯកសិទ្ធិរបស់អង្គការហាមឃាត់អាវុធគីមីព្រះរាជាណាចក្រកម្ពុជាបានចុះហត្ថលេខា រួចហើយ កាលពីថ្ងៃទី១២ ខែតុលា ឆ្នាំ២០១៧ ។
ចំពោះនីតិវិធីបន្ត គឺការផ្តល់សច្ចាប័ន ដើម្បីកិច្ចព្រមព្រៀងនេះនឹងចូលជាធរមាននៅពេលដែលព្រះរាជាណាចក្រកម្ពុជាបានតម្កល់ទុកលិខិតូបករណ៍នៃការផ្តល់សច្ចាប័នជាមួយអង្គការហាមឃាត់អាវុធគីមី ។ ថ្លែងហេតុបានបន្តថា អាជ្ញាធរជាតិអាវុធគីមីនៃព្រះរាជាណាចក្រកម្ពុជាបានធ្វើទំនាក់ទំនងល្អ មានកិច្ចសហប្រតិបត្តិការយ៉ាងរលូន និងមានប្រសិទ្ធភាពជាមួយអង្គការហាមឃាត់ អាវុធគីមី ក្នុងការសិក្សាវិភាគទៅបើគោលបំណងនៃមាត្រានីមួយៗដែលមានចែងនៅក្នុងកិច្ចព្រមព្រៀងនេះដោយមិនមានផលប៉ះពាល់ដល់ច្បាប់គោលនយោបាយ និងសារៈប្រយោជន៍របស់ប្រទេសជាតិឡើយ ។
កន្លងមកប្រទេសដែលជារដ្ឋភាគីជាមួយអង្គការហាមឃាត់អាវុធគីមី មានចំនួន១៩៣ប្រទេស ដែលបានចុះកិច្ចព្រមព្រៀងមានចំនួន៥៦ ក្នុងនោះប្រទេសចំនួន៥៥ បានចុះហត្ថលេខា ប៉ុន្តែបានផ្តល់សច្ចាប័នមានចំនួន៤១ប្រទេស ។ ដោយឡែកនៅក្នុងអាស៊ានប្រទេសដែលបានចុះកិ ច្ចព្រមព្រៀងមានចំនួន៥ គឺកម្ពុជា ឡាវ ហ្វីលីពីន ថៃ និងវៀតណាម ។ ថ្លែងបញ្ជាក់ថា គោលបំណងនៃកិច្ចព្រមព្រៀងនេះមានដូចខាងក្រោម ធ្វើកិច្ចសហប្រតិបត្តិការជាមួយអង្គការហាមឃាត់អាវុធគីមី ដើម្បីសម្អាតកាកសំណល់សារធាតុ អាវុធ គីមី ដែលបានបន្សល់ទុកក្នុងព្រះរាជាណាចក្រកម្ពុជានាសម័យសង្គ្រាមពីទសវត្សរ៍៦០ និងទសវត្សរ៍៧០ ។ ហាមឃាត់ និងទប់ស្កាត់ឧក្រិដ្ឋកម្មឆ្លងដែននៃសារធាតុអាវុធគីមីនៅលើទឹកដីនៃព្រះរាជាណាចក្រកម្ពុជា ។ ចូលរួមជាមួយសហគមន៍ក្នុងតំបន់សហគមន៍អន្តរជាតិ និងអង្គការសហប្រជាជាតិក្នុងការធ្វើឱ្យពិភពលោកទាំងមូលមានសុវត្ថិភាពពីការរីកសាយភាយនៃសារធាតុអាវធគីមី ស្របតាមមាត្រា ៤៤ នៃរដ្ឋធម្មនុញ្ញនៃព្រះរាជាណាចក្រកម្ពុជា ។
ព្រះរាជាណាចក្រកម្ពុជាបានទទួលសារៈប្រយោជន៍ពីកិច្ចព្រមព្រៀងនេះមានដូចខាងក្រោម៖ ទទួលបានកិច្ចសហប្រតិបត្តិការជាមួយអង្គការហាមឃាត់អាវុធគីមី ទទួលបានជំនួយបច្ចេកទេស និងការអភិវឌ្ឍសមត្ថភាព ៕ កែសម្រួលដោយ ៖ សុឃាក់
ចែករំលែកព័តមាននេះ