ខេត្តកំពត ៖ មន្ត្រីយោធាថ្នាក់ឧត្តមសេនីយ៍ម្នាក់ បានជាប់ពាក់ព័ន្ធនឹងប្រាក់១៥មុឺនដុល្លារ ក្នុងការធានារត់ច្បាប់បើកក្លិបកម្សាន្តមួយ បែរជាយកលុយគេចាយវាយហ្មត់គ្មានបានសាច់ការណាមួយនោះទេ និងក្លាយទៅជាការប្រឈមចំពោះមុខច្បាប់ទៀតផង ។
ក្លិបកម្សាន្តដែលឱ្យលោកឧត្តមសេនីយ៍រត់ការសុំច្បាប់នោះ មានទីតាំងនៅជាប់ច្រកទ្វារព្រំដែនទ្វេភាគីតន់ហន់ ជាប់ច្រកយាុំងថាន់របស់វៀតណាម ស្ថិតក្នុងភូមិព្រែកក្រឹស ឃុំព្រែកក្រឹស ស្រុកកំពង់ត្រាច ។ ខណៈក្លិបកម្សាន្តដែលមានទីតាំងនៅកៀកព្រំដែនមួយនេះ មិនទាន់បានដំណើរការផង ក៏មានឧត្តមសេនីយ៍ម្នាក់មកទាក់ទងម្ចាស់ដីបើកក្លិប និងធានាជួយរត់ច្បាប់ ព្រមទាំងបង្គាប់ឱ្យម្ចាស់ក្លិបយកលុយចំនួន១៥មុឺនដុល្លារទៅគិតគូរថ្នាក់លើ ។
ទោះជាបែបណា ក្លិបកម្សាន្តនៅជាប់ព្រំដែនមួយនេះសាងសង់រួចរាល់ហើយ តែមិនទាន់មានច្បាប់ព្រោះម្ចាស់ក្លិបសង្ឃឹមទៅលើលោកឧត្តមសេនីយ៍ជួយរត់ច្បាប់តែរត់មិនបាន បែរជាយកលុយទៅទិញដីអស់ហើយពេលរត់ច្បាប់មិនបានមិនព្រមសងលុយមកវិញទេ ។
បើតាមការអះអាងរបស់ម្ចាស់ក្លិបកម្សាន្តដែលនៅមេម៉ាយនេះ បាននិយាយដោយមិនព្រៀងទុកថា លុយចំនួន១៥មុឺនដុល្លារគាត់បានប្រគល់ឱ្យទៅឧត្តមសេនីយ៍រូបនោះ ព្រោះតាមការបង្គាប់ ចំនួនលុយនេះគឺគាត់យកទៅជួយរត់ច្បាប់បើកក្លិប។ ម្ចាស់ក្លិបនិយាយទៀតថា គាត់មិនចង់បានអីទេគឺគាត់ចង់បានលុយនោះមកវិញ ហើយរឿងនេះបើឧត្តមសេនីយ៍រូបនោះមិនព្រមសងទេមានតែផ្លូវច្បាប់ទេ ព្រោះគាត់មានរូបថតជា
ភ័ស្ដុតាងក្នុងការទទួលលុយកាក់រត់ការ ។
មានការកត់សម្គាល់ថា នៅច្រកទ្វារទ្វេភាគីតន់ហន់នេះមានកាសុីណូមួយដែរ តែមិនសូវមានជនជាតិវៀតណាមមកលេងទេ ហើយអាចនឹងបិទទ្វារនៅពេលខាងមុខ ។ ចំណែកឯច្រកទ្វារព្រំដែនអន្តរជាតិព្រែកចាក មានកាសុីណូចំនួន៤កន្លែង តែកាសុីណូមួយបានដួលរំលំហើយព្រោះអត់មានអ្នកមកលេង និងកាសុីណូវីហ្គាហាទៀងខ្នាតធំមានជនជាតិវៀតណាមច្រើននិងពលរដ្ឋខ្មែរមួយភាគចូលលេង ។
ឯកាសុីណូជីវីម៉ាណ បានជួលទៅឱ្យជនជាតិវៀតណាមជាអ្នកគ្រប់គ្រងដែលភាគច្រើនជនជាតិខ្មែរចូលលេង តែរថយន្តនិងម៉ូតូខ្មែរមិនត្រូវគេអនុញ្ញាតឱ្យទុកក្នុងបរិវេណនោះទេ អ្នកមើលការខុសត្រូវឱ្យយកទៅទុកកន្លែងផ្សេង ៕
ចែករំលែកព័តមាននេះ