ខេត្តកំពង់ធំ ៖ មានករណីប្រទះឃើញស្ត្រីចំណាស់ម្នាក់យកខ្សែចងគោមកចង.កសម្លាប់ខ្លួននៅលើដើមស្វាយ ហើយត្រូវបានគេសង្ស័យថា ស្ត្រីរងគ្រោះតូចចិត្តមានជំងឺប្រចាំកាយ ទើបសម្រេចចិត្តបញ្ចប់ជីវិតបែបនេះ ។
ហេតុការណ៍ខាងលើនេះបង្ករការភ្ញាក់ផ្អើលកាលពីវេលាម៉ោង៤និង១៥នាទីទៀបភ្លឺថ្ងៃទី២ ខែតុលា នៅភូមិអូរខ្សង់ ឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ ។
ស្ត្រីរងគ្រោះដែលស្លាប់ឈ្មោះ ជ្រូក នឿន អាយុ៦៦ឆ្នាំ រស់នៅក្នុងភូមិឃុំកើតហេតុខាងលើ។
យោងតាមការបំភ្លឺពីកូនប្រុសស្ត្រីរងគ្រោះឈ្មោះ ឈី ឈាត អាយុ៤៨ឆ្នាំ បានប្រាប់ឱ្យដឹងថា ម្ដាយរបស់គាត់មានជំងឺប្រចាំកាយរ៉ាំរ៉ៃជាយូរឆ្នាំមកហើយ ពេលជំងឺធ្វើទុក្ខម្ដងៗ ម្តាយរបស់គាត់តែងតែរកលេបថ្នាំបាញ់ស្មៅផឹកសម្លាប់ខ្លួនជាញឹកញាប់ដែរ តែត្រូវកូនៗឃើញទាន់ ។
តាមប្រភពដដែលបានបន្តថា កាលពី៤ថ្ងៃមុន ម្តាយរបស់គាត់បានកាន់ខ្សែចងគោដើរទៅក្រោយផ្ទះ ពេលនោះត្រូវកូនៗឃើញទាន់ ម្តាយរបស់គាត់ក៏ទម្លាក់ខ្សែចងគោនោះចោល ។ លុះនៅថ្ងៃកើតហេតុ ពេលព្រឹកម៉ោងប្រហែល៤ទៀបភ្លឺ ម្តាយរបស់គាត់បានក្រោកពីដេក ហើយក៏ត្រូវកូនៗឃើញចុះពីលើផ្ទះមកដី ដោយនឹកស្មានតែម្តាយរបស់គាត់ចុះមកបត់ជើងធំ គាត់មិនបានចាប់អារម្មណ៍នោះទេ រហូតដល់ពេលមិនឃើញម្តាយត្រឡប់មកវិញ គាត់ក៏ដើរទៅមើលស្រាប់តែឃើញម្ដាយរបស់គាត់យកខ្សែនីឡុងសម្រាប់ចងគោមកចង.កនៅលើដើមស្វាយស្លាប់បាត់ទៅហើយ មិនដឹងតាំងពីពេលណា ទើបបង្កការភ្ញាក់ផ្អើល និងរាយការណ៍ជូនសមត្ថកិច្ចដើម្បីឱ្យចុះមកពិនិត្យតែម្តង។
ក្រោយពេលពេលបានទទួលព័ត៌មានខាងលើនេះភ្លាម កម្លាំងជំនាញ និងប៉ុស្ដិ៍នគរបាលសាគ្រាមបានចុះដល់កន្លែងកើតហេតុ និងពិនិត្យសព បានរកឃើញថា មានស្នាមជាំជុំវិញក១កន្លែង ក្រៅពីនេះពុំឃើញមានស្លាកស្នាមអ្វីគួរឱ្យកត់សម្គាល់ឡើយ ។
តាមការស្រាវជ្រាវ ពិនិត្យ និងវិភាគ ទើបសមត្ថកិច្ចសន្និដ្ឋានថា ស្ត្រីរងគ្រោះស្លាប់ដោយសារចង.កធ្វើអត្តឃាត មិនពាក់ព័ន្ធបទល្មើសព្រហ្មទណ្ឌណាមួយឡើយ។ ក្រោយពិនិត្យរួច សពស្ត្រីរងគ្រោះត្រូវបានសមត្ថកិច្ចប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ