ខេត្តកំពង់ធំ ៖ ស្ត្រី៥នាក់បានស្លាប់ទាំងអស់ក្នុងហេតុការណ៍ក្រឡាប់រថយន្តកាមរីបាឡែននៅវេលាម៉ោង៤និង២០នាទីទៀបភ្លឺថ្ងៃទី២ តុលា នៅចំណុចផ្លូវកោង(ផ្លូវអាស៊ានវាងក្រុងស្ទឹងសែន) ក្នុងភូមិព្រៃតាហ៊ូ សង្កាត់ព្រៃតាហ៊ូ ក្រុងស្ទឹងសែន ។ ជាទូទៅការបើកបរផ្លូវវាងក្រុងនេះ អ្នកបើកបរតែងបើកក្នុងល្បឿនលឿនណាស់ គឺលឿនផ្តាច់ព្រលឹង ដែលបញ្ហានេះប្រឈមនឹងគ្រោះថ្នាក់ជាយថាហេតុ ។
រថយន្តម៉ាកកាមរីបាឡែន ដែលជួបឧបទ្ទវហេតុនេះ ពណ៌ស ពាក់ស្លាកលេខភ្នំពេញ 2AS6715 ខណៈបើកបរក្នុងទិសដៅពីត្បូងទៅជើងក្នុងល្បឿនយ៉ាងលឿន ។ លុះមកដល់ចំណុចផ្លូវកោងទំនងបត់មិនទាន់ រថយន្តក៏បានរេចង្កូតមកឆ្វេងដៃធ្លាក់ផ្លូវក្រឡាប់ជាច្រើនត្រឡប់ បណ្តាលឲ្យអ្នកជិះខាងក្នុងរថយន្តមានគ្នា៥នាក់ ត្រូវស្លាប់ទាំងអស់ ។ ចំណែករថយន្តបែកបាក់រយះរយាយមើលទៅគួរឱ្យព្រឺខ្លាំងណាស់ មិនអាចឱ្យមានជីវិតរស់បានឡើយ ។
អ្នកបើកបររថយន្តជាស្រី្តមិនស្គាល់អត្តសញ្ញាណ(ស្លាប់) និងអ្នករួមដំណើរចំនួន៤នាក់សុទ្ធតែស្រី្តរួមមាន
១-ឈ្មោះ អួន ចាន់ធារី អាយុ៣៤ឆ្នាំ រស់នៅភូមិទី៤ ឃុំស្វាយលួង ស្រុកកណ្តៀង ខេត្តពោធិ៍សាត់(ស្លាប់)។ ២-ឈ្មោះ ឡាច ស្រីម៉ុម អាយុ២៦ឆ្នាំ រស់នៅភូមិជំរៅ ឃុំពារាម ស្រុកបាទីខេត្តតាកែវ(ស្លាប់) ។៣-អ្នករួមដំណើរឈ្មោះ ដុក ចាន់វលក្ខ័ណ៍ អាយុ២៦ឆ្នាំ នៅសង្កាត់បឹងកេងកងទី៣ ខណ្ឌចំការមន រាជធានីភ្នំពេញ(ស្លាប់) ។ ៤-អ្នករួមដំណើរម្នាក់ទៀតមិនស្គាល់អត្តសញ្ញាណ(ស្លាប់) ។ ៥-អ្នកបើកបរជាស្ត្រីមិនមានអត្ត សញ្ញាណសម្គាល់បានស្លាប់ដែរ ។មូលហេតុបឋមត្រូវបានមន្ត្រីប៉ូលិសចរាចរណ៍ប្រាប់ថា បង្កឡើងដោយអ្នកបើកបររថយន្តក្នុងល្បឿនលឿន ហើយពេលមកដល់ផ្លូវកោងបត់តាមផ្លូវមិនទាន់ក៏រេចង្កូតខុសផ្លូវក្រឡាប់ច្រើនត្រឡប់លាន់ដូចរន្ទះ ។
អ្នកបើកបរគប្បីមើលស្លាកសញ្ញាចរាចរណ៍ដែលបានដាក់នៅតាមដងផ្លូវដែលប្រាប់ជាមុនពីផ្លូវបត់ឆ្វេង បត់ស្តាំ ឬស្ពានឬការកំណត់ល្បឿននៃការបើកបរ ។ល។ គួរឱ្យសោកស្តាយជាពន់ពេកដែលស្ត្រីទាំង៥នាក់ស្លាប់ក្នុងហេតុការណ៍ដ៏រន្ធត់នេះ ។
នារីម្នាក់ក្នុងចំណោមអ្នកស្លាប់៥នាក់ ២ខែទៀតចូលរោងការពិតជារឿងដ៏គួរឱ្យសោកសៅ និងរន្ធត់ជាពន់ ពេក ពេលដែលទទួលបានដំណឹងថា នារីម្នាក់ដែលជាជនរងគ្រោះ ក្នុងចំណោមជនរងគ្រោះទាំង៥នាក់ដែលបានជួបគ្រោះថ្នាក់ចរាចរណ៍ ស្លាប់បាត់បង់ជីវិត គឺនៅសល់តែ២ ខែទៀតប៉ុណ្ណោះនាងនឹងចូលរោង ការ ។
យោងតាមគណនីហ្វេសប៊ុករបស់គូដណ្ដឹងនារីរងគ្រោះ ឈ្មោះ Madara Tobe បានបង្ហោះសារហើយត្រូវបានគេហទំព័រប្រជាប្រិយដកស្រង់មកផ្សាយថា៖ «អូនអេីយអូន ឆាប់ក្រោកឡេីងអូន បងមកយកអូនទៅផ្ទះយេីងវិញហេីយ បងមិនអាចទទួលយកបានទេ ម្តេចឆាប់ទៅចោលបងយ៉ាងនេះ ក្រែងពួកយេីងសន្យាថានឹងដេីរផ្លូវរួមគ្នាអស់មួយជីវិតអី នៅសល់តែ២ខែទៀតទេពួកយេីងដល់ថ្ងៃចូលរោងការហេីយម្តេចអូនទៅចោលបងចឹង តោះពួកយេីងទៅផ្ទះណាអូនណា» ។
បើតាមប្រភពឱ្យដឹងថា នារីរងគ្រោះ មាន ឈ្មោះថា ឡាច ស្រីមុំ អាយុ២៦ឆ្នាំ រស់នៅខេត្តតាកែវ ។ក្រោយ បង្ហោះសារបែបនេះហើយ មានអ្នកលេងបណ្ដាញហ្វេសប៊ុកមិត្តភក្ដិ ព្រមទាំងបងប្អូនជាច្រើនបានបង្ហាញក្ដីស្រណោះអាណិតអាសូរបុរសគូដណ្ដឹងជាពន់ពេក ។
បើមិនជឿកុំប្រមាថ!ស្ត្រីអ្នកបើករថយន្តចរិតប្រុសបង្ហោះសារមុនស្លាប់ករណីគ្រោះថ្នាក់ចរាចរណ៍កាលពីវេលាទៀបភ្លឺនៅក្រុងស្ទឹងសែននេះពិតជាបានធ្វើឲ្យកក្រើកដល់អ្នកលេងបណ្តាញសង្គមហ្វេសប៊ុក ព្រោះតែស្រី្ត៥នាក់បានស្លាប់ភ្លាមៗ ក្រោយពីគ្រោះថ្នាក់ក្រឡាប់រថយន្តនេះ ។
អ្វីដែលធ្វើឲ្យមហាជនជាច្រើនចាប់ អារម្មណ៍ថ្មីៗនេះទៀត គឺក្រោយពីបានចូលទៅមើលក្នុងគណនីហ្វេស
ប៊ុក របស់ស្ត្រីអ្នកបើកបររថយន្ត ដែលជាមន្ត្រីម្នាក់នៅក្រសួងមហាផ្ទៃនោះ នាងបានបង្ហោះសារមួយមុនពេលកើតហេតុនេះ១ថ្ងៃ ដោយបាននិយាយថា «ចង់ហក់តែខ្លាចងាប់» ។
ពាក្យមួយឃ្លាដែលនាងបានបង្ហោះ បានធ្វើឲ្យបងប្អូនញាតិមិត្ត ជាពិសេសមហាជនដែលជឿលើអបិយជំនឿ បាននឹកដល់ប្រផ្នូលមួយដែលពាក្យនេះគេបានគិតថា ជាពាក្យចុងក្រោយដែលមនុស្សភាគច្រើនតែងនិយាយប្លែកៗ មុនពេលមានគ្រោះថ្នាក់ផ្សេងៗ ហើយចាស់ៗតែងតែផ្តាំដល់ក្មេងជំនាន់ក្រោយថា បើមិនជឿ កុំប្រមាថ ៕
ចែករំលែកព័តមាននេះ