ខេត្តបន្ទាយមានជ័យ ៖ ស្នងការដ្ឋាននគរបាលខេត្តបានរៀបចំសំណុំរឿងបញ្ជូនជនសង្ស័យ៣នាក់ ជាជនជាតិស៊ូដង់ ក្នុងនោះមានស្ត្រី១នាក់ រួមទាំងវត្ថុតាងរថយន្ត១គ្រឿង និងសម្ភារមួយចំនួនទៅសាលាដំបូងខេត្ត កាលពីរសៀលថ្ងៃទី៣០ ខែកញ្ញា ដើម្បីចាត់ការតាមច្បាប់ពីបទលួច ។
លោកវរសេនីយ៍ឯក ខែម សុភ័ណ នាយការិយាល័យនគរបាលព្រហ្មទណ្ឌកម្រិតស្រាលខេត្តបានឲ្យដឹងថា ជនសង្ស័យជនជាតិស៊ូដង់ទាំង៣នាក់នេះមាន ៖
១-ឈ្មោះ Muna Ramadan Rashed ភេទស្រី អាយុ៤៦ឆ្នាំ
២-ឈ្មោះ Ahmad Ramadan Rasheed Saleh ភេទប្រុស អាយុ៣១ឆ្នាំ និង
៣-ឈ្មោះ Khaled Ramadan Rasheed Saleh ភេទប្រុស អាយុ៣២ឆ្នាំ ។
កាលពីវេលាម៉ោងប្រមាណ៣រសៀលថ្ងៃទី២៨ ខែកញ្ញា ជនសង្ស័យទាំង៣នាក់នេះបានជិះរថយន្ត១គ្រឿងម៉ាកឡិចសុីស RX៣០០ ពណ៌ស ពាក់ផ្លាកលេខ ភ្នំពេញ ២T-៨៤៩០ ទៅផ្ទះរបស់ស្ត្រីឈ្មោះ សាយ សុភា អាយុ៤៤ឆ្នាំ នៅភូមិកណ្តាលលិច ឃុំស្រះជីក ស្រុកភ្នំស្រុក សួររកទិញបារី រួចដើរចូលទៅយកបារីម៉ាកCAMBOមួយសុងមកដាក់លើទូដូរប្រាក់ រួចហើយដកប្រាក់ចំនួន១០០ដុល្លារឲ្យទៅម្ចាស់ផ្ទះ ។
ខណៈម្ចាស់ផ្ទះឈ្មោះ សាយ សុភា កំពុងរកប្រាក់ដុល្លារអាប់ ជនម្នាក់ក្នុងចំណោមពួកនេះបានលូកចូលក្នុងទូប្រាក់ ឆក់យកលុយបានចំនួន១.០០០ដុល្លារ ។ ភ្លាមនោះម្ចាស់ផ្ទះឃើញទាន់ ក៏ទាញប្រវាយប្រតប់គ្នាយកលុយមកវិញ តែយកវិញមិនបាន ឯជនល្មើសបានរត់ចូលរថយន្តបើកចេញគេចខ្លួន ។
ទោះជាយ៉ាងណា ជនរងគ្រោះថតបានភិនភាគរថយន្ត និងប្តឹងនគរបាលស្រុកភ្នំស្រុកឲ្យជួយអន្តរាគមន៍ តាមចាប់បាននៅភូមិព្រៃមាន់ ឃុំរហាល ស្រុកព្រះនេត្រព្រះ នៅយប់ថ្ងៃដដែល និងបានបញ្ជូនទៅស្នងការ ដ្ឋាននគរបាលខេត្ត ៕
ចែករំលែកព័តមាននេះ