ខេត្តកំពង់ឆ្នាំង ៖ បុរសម្នាក់ជាកម្មករបើករថយន្តក្រឡុកបេតុងមិនស្គាល់អត្តសញ្ញាណបានបើករថយន្តក្រឡុកបេតុងរបស់ក្រុមហ៊ុនចិន ខណៈបើកសុខៗស្រាប់តែបែកកង់រេចង្កូតបុកនឹងខឿនពុះចែកទ្រូងផ្លូវបណ្តាលឱ្យរងការខូចខាតខ្ទេចយ៉ាងដំណំ ហើយបុកបាក់បង្គោលភ្លើងមួយដើមទៀត ។ ហេតុការណ៍នេះបានកើតឡើងកាលពីវេលាម៉ោង2រំលងអធ្រាត្រឈានចូលថ្ងៃទី3 ខែតុលា ឆ្នាំ2019 តាមបណ្តោយផ្លូវជាតិលេខ៦ ។
តាមប្រភពពីសាក្សីដែលឃើញហេតុការណ៍បានឱ្យដឹងថា មុនពេលកើតហេតុខាងលើនេះគេបានឃើញបុរសម្នាក់មិនស្គាល់អត្តសញ្ញាណជាកម្មករបើករថយន្តក្រឡុកបេតុងម៉ាកHOWO ពណ៌ស ពាក់ផ្លាកលេខ ភ្នំពេញ 5A-2113 របស់ក្រុមហ៊ុនឈ្មោះ ចិនស៊ីងសេងកម្ពុជាលាយក្រឡុកបេតុង បើកបរតាមបណ្តោយផ្លូវជាតិលេខ៦ក្នុងទិសដៅពីជើងទៅត្បូងបើកក្នុងល្បឿនយ៉ាងលឿនដូចហោះប្រញាប់យកបេតុងទៅចាក់នៅម្តុំជ្រោយចង្វារ។
ចៃដន្យបែកកង់ខាងមុខផ្នែកខាងឆ្វេងរេចង្កូតមកឆ្វេងដៃបុកនឹងខឿនពុះចែកទ្រូងផ្លូវបណ្តាលឱ្យហោះរំលងទៅផ្លូវម្ខាងទៀត15ម៉ែត្ររងការបាក់ខូចខាតខ្ទេចអស់សួនច្បារពុះចែកទ្រូងនិងបាក់ខឿនរួមនឹងបង្គោលភ្លើងថែមទាំងស្លាកពាណិជ្ជកម្មមួយបណ្តាលឱ្យដាច់ចរន្តអគ្គិសនីថែមទៀត ចំណែកឯរថយន្តបង្កវិញគឺរងការខូចខាតដាច់បែកកង់ខាងមុខផ្នែកខាងឆ្វេង និងបែកចង្កៀងមុខទៅមុខលែងរួច ។
ភ្លាមៗនោះអ្នកបើកបររថយន្តបានបើកទ្វារត់គេចខ្លួនបាត់ស្រមោលបន្សល់ទុកនៅតែរថយន្តបង្កតែប៉ុណ្ណោះនៅកន្លែងកើតហេតុ ។ ក្រោយពេលកើតហេតុរថយន្តបង្កត្រូវបានសមត្ថកិច្ចធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍ផ្លូវគោកនៃសង្នការរាជធានីភ្នំពេញដើម្បីចាត់ការទៅតាមនីតិវិធី៕
កែសម្រួលដោយ ៖ សំណាង
ចែករំលែកព័តមាននេះ