រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ទើបតែចេញមកពីពន្ធនាគារថ្មីៗសង្ស័យបែកថ្នាំ ស្រាប់តែយកដាវសាំម៉ូរៃដេញកាប់សង្សារខ្លួនឯងឡើងផ្អើលពេញបឹងកក់ បណ្តាលសង្សារខ្លួនឯងរបួសជើងហូរឈាមផ្អើលដល់សមត្ថកិច្ចមកជួយអន្តរាគមន៍ បង្កឱ្យមានការភ្ញាក់ផ្អើលកាលពីម៉ោង11និង15នាទីយប់ ថ្ងៃទី2 ខែតុលា ឆ្នាំ2019 តាមបណ្តោយផ្លូវលំ នៅចំណុចបឹងកក់ក្រោយស្ថានទូតបារាំង ស្ថិតក្នុងសង្កាត់ស្រះចក ខណ្ឌដូនពេញ ។
តាមប្រភពពីម្តាយនារីរងគ្រោះបានឱ្យដឹងថា កូនស្រីរបស់គាត់មានឈ្មោះ ស្រីពេជ្រ អាយុ24ឆ្នាំ ស្នាក់នៅបន្ទប់ជួលគ្មានលេខ ក្នុងបឹងកក់ សង្កាត់ស្រះចក ខណ្ឌដូនពេញ ហើយរាល់ថ្ងៃនាងធ្វើការជានារីបំរើការក្នុងខារ៉ាអូខេមួយកន្លែងនៅជ្រោយចង្វារ ។
ម្តាយនារីរងគ្រោះបន្តថា ហើយមិនដឹងថាជាយ៉ាងមិចនោះទេ បានជាកូនស្រីគាត់ទៅទាក់ទងស្រលាញ់បុរសម្នាក់ធ្វើជាសង្សារនឹងគ្នាមានឈ្មោះជា ដែលទើបតែចេញមកពីពន្ធនាគារថ្មីៗនេះ ដោយជាប់ពីបទ «ប្លន់» រួចត្រូវជាប់ឃុំអស់រយៈពេលជិត៣ឆ្នាំមកហើយ ទើបតែចេញមកវិញក៏លក់ថ្នាំញៀន និងប្រើប្រាស់ថ្នាំញៀន រហូតឈានទៅដល់បែកថ្នាំរួចក៏យកដាវសាំម៉ូរៃដេញកាប់ជើងកូនស្រីរបស់គាត់ បណ្តាលឱ្យចេញឈាម ហើយស្រែកឱ្យគេជួយ ប៉ុន្តែយប់ស្ងាត់នៅក្នុងភូមិមិនមានអ្នកណាគេជួយទេ ស្រាប់តែជនបង្កត្រូវជាសង្សារនោះបានចាប់នារីរងគ្រោះចូលទៅក្នុងបន្ទប់ជួល ដោយមិនដឹងថា ចង់សម្លាប់ ឬមួយយ៉ាងណានោះទេ។
ប្រភពដដែលបន្តថា ខណៈពេលភ្លាមៗនោះដែរ គាត់ជាម្តាយនារីរងគ្រោះបានទូរស័ព្ទប្រាប់សមត្ថកិច្ចថា «កូនស្រីគាត់ អីឡូវកំពុងតែត្រូវគេកាប់ជើងហូរឈាមពេញផ្លូវហើយ» ទើបសមត្ថកិច្ចប៉ុស្តិ៍ស្រះចក បានចុះមកជួយអន្តរាគមន៍ ប៉ុន្តែពេលសមត្ថកិច្ចចុះទៅដល់ជនបង្កបាននាំនារីរងគ្រោះគេចចេញពីកន្លែងកើតហេតុបាត់ស្រមោលទៅហើយ ។
ក្រោយពេលកើតហេតុ ម្តាយរបស់នារីរងគ្រោះបានទៅដាក់ពាក្យបណ្តឹងនៅប៉ុស្តិ៍ស្រះចកដើម្បីឱ្យសមត្ថកិច្ចស្រាវជ្រាវតាមចាប់ជនសង្ស័យមកផ្តន្ទាទោសទៅតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ