រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានអះអាងថា បញ្ហាព្រំដែនភាគីកម្ពុជា វៀត ណាម និងឡាវបានឯកភាពគ្នាថា នឹងស្នើប្រធានាធិបតីបារាំងមកផ្ទេរ និងផ្តល់ឯកសារពាក់ព័ន្ធដើម្បីដោះស្រាយបន្តទៀតរហូតដល់បញ្ចប់បញ្ហាដែលនៅសេសសល់ ។ ថ្លែងក្នុងពិធីប្រគល់សញ្ញាបត្រដល់និស្សិត នៃសាកលវិទ្យាល័យប៊ែលធី (BELTEI) អន្តរជាតិនាព្រឹកថ្ងៃទី២ តុលា សម្តេចតេជោហ៊ុន សែន នាយករដ្ឋមន្ត្រី បានអះអាងថាព្រំដែនកម្ពុជា ជាមួយបណ្តាប្រទេសជាប់គ្នា នៅសល់ក្រោម១០%ប៉ុណ្ណោះមិនទាន់អភិវឌ្ឍន៍ ដោយសារនៅគ្រាប់មីន និងគ្រាប់មិនទាន់ផ្ទុះ ។
នៅមុនពេលបំពេញទស្សនកិច្ចនៅវៀតណាមនាថ្ងៃទី៤ ដល់ទី៥ តុលាខាងមុខ សម្តេចតេជោហ៊ុន សែន ថ្លែងថា៖«សមរភូមិទាំងឡាយដែលពីមុនស៊ីសាច់ហុតឈាម បានក្លាយជាតំបន់ទេសចរណ៍ ក្លាយជាតំបន់ដាំដុះ នៅសល់ ខ្ញុំថាក្រោម១០ភាគរយទៅចុះ ដែលយើងមិនទាន់ធ្វើទៅរួច ដោយសារនៅសល់គ្រាប់មីន និងគ្រាប់មិនទាន់ផ្ទុះ ។ យើងត្រូវបន្តដោះស្រាយបញ្ហានោះ ប៉ុន្តែក្រៅពីនោះអភិវឌ្ឍន៍អស់ហើយ កន្លែងធ្លាប់ដាក់កាំភ្លើង កន្លែងគេធ្លាប់វាយប្រហារគ្នាកាលពីដើម ឯព្រំដែនជាមួយប្រទេសជិតខាង ។
ចំពោះទំហំពាណិជ្ជកម្មរវាងកម្ពុជា និងថៃឡើងដល់៧ពាន់លានដុល្លារ ។ ទំហំពាណិជ្ជកម្មរវាងកម្ពុជា និងវៀតណាមឡើងដល់ប្រមាណ៤ពាន់លានដុល្លារ ហើយកម្ពុជា និងវៀតណាមសម្រេចបោះបង្គោលខ័ណ្ឌសីមាបាន៨៤%រួចហើយ ។ ហើយខ្ញុំនឹងទៅប្រទេសវៀតណាមនៅថ្ងៃខាងមុខនេះ ដើម្បីចុះហត្ថលេខាទទួលយកសមិទ្ធផល៨៤%។ ផែនទីបានបោះនៅប្រទេស ដាណឺម៉ាកបានដឹកមកដល់អស់ហើយ ។
បន្ទាប់ពីធ្វើការចរចាយ៉ាងស្វិតស្វាញពីឆ្នាំ២០០៥ រហូតដល់ឆ្នាំ២០១៦ រយៈពេល១៤ឆ្នាំ នៅសេសសល់១៦ភាគទៀតនឹងត្រូវបន្តដោះស្រាយទៀត »។
ចំណែកព្រំដែនកម្ពុជា និងឡាវវិញ សម្តេចឲ្យដឹងថាព្រំដែនកម្ពុជា និងឡាវ ដោះស្រាយបាន៨៦% ដែលថ្ងៃមុននាយករដ្ឋមន្ត្រីឡាវ មកកម្ពុជា ភាគីទាំងពីរបានឯកភាពគ្នា ធ្វើសន្ធិសញ្ញាទទួលយកនូវសមិទ្ធផល៨៦%ដែលភាគីទាំងពីរបានដោះស្រាយ ឯ១៤%ទៀតត្រូវ បន្តដោះស្រាយ ដោយមានការស្នើសុំទៅប្រធានាធិបតីបារាំង ។ ទាំងកម្ពុជា ជាមួយវៀតណាមក៏ស្នើទៅប្រធានាធិបតីបារាំងដើម្បីជួយមកផ្ទេរផែនទី ។ ទាំងកម្ពុជា ជាមួយឡាវក៏ស្នើទៅប្រធានាធិបតីបារាំង ដើម្បីមកផ្ទេរផែនទី ក៏ដូចជាផ្តល់ឯកសារ ផ្សេងៗទាក់ទងនឹងព្រំដែន ។
សម្តេចតេជោហ៊ុន សែន បញ្ជាក់ថា៖«ព្រំដែនដែលធ្លាប់មានការភ័យខ្លាចរបស់ប្រជាពលរដ្ឋ ឥលូវបានប្រែក្លាយជាតំបន់ដែលប្រជាជនរកស៊ីជាមួយគ្នា ទំហំពាណិជ្ជកម្មថៃ៧ពាន់លានមិនមែនតូចតាចនោះទេ ហើយទំហំពាណិជ្ជកម្មជាមួយវៀតណាម៤ពាន់លានក៏មិនតូចដែរ ។ យើងជាមួយឡាវមិនច្រើនោះទេ ព្រោះយើងជាមួយឡាវឆ្ងាយ ហើយឡាវក៏ឆ្ងាយដែរ ប៉ុន្តែយើងនៅតែធ្វើទៅមក» ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ