ខេត្តមណ្ឌលគិរី ៖ សេចក្តីរាយការណ៍បឋមបានឲ្យដឹងថា យុវជនល្មោមកាមម្នាក់ ត្រូវបានសមត្ថកិច្ចខេត្តបញ្ជូនទៅសាលាដំបូង កាលពីរសៀលថ្ងៃទី០២ តុលានេះ ក្រោយរកឃើញថា គេបានប្រព្រឹត្តអំពើអនាចារលើកុមារីវ័យ៧ឆ្នាំម្នាក់ ។
សេចក្តីរាយការណ៍បានបន្ត លោកស្រីឧត្តមសេនីយ៍ត្រី ហួន គឹមហេង ស្នងការរងទទួលបន្ទុកប្រឆាំងការជួញដូរមនុស្ស និងការពារអនីតិជនបានឲ្យដឹងថា នៅរសៀលថ្ងៃទី២៩ ខែកញ្ញា ឆ្នាំ២០១៩ ជំនាញប្រឆាំងការជួញដូរមនុស្ស និងការពារអនីតិជននៃស្នងការរដ្ឋាននគរបាលខេត្តមណ្ឌលគិរីបានទទួលពាក្យបណ្ដឹងពីម្ដាយរបស់កុមារីរងគ្រោះឈ្មោះ ហ. ស.ណ អាយុ៣២ឆ្នាំ ស្នាក់នៅស្រុកពេជ្រាដា ខេត្តមណ្ឌលគិរី ពីករណីរំលោភសេពសន្ទវៈ ។ ដែលករណីនេះកើតឡើងតាំងពីថ្ងៃទី២៨ ខែកញ្ញា វេលាម៉ោងប្រហែល៨យប់នៅឃុំប៊ូស្រា ស្រុកពេជ្រាដា ។
ក្រោយពីបានទទួលពាក្យបណ្ដឹងពីម្ដាយជនរងគ្រោះរួចកម្លាំងជំនាញប្រឆាំងការជួញដូរមនុស្ស និងការពារអនីតិជនលោកក៏ចុះចាប់ខ្លួនជនសង្ស័យនៅវេលាម៉ោង៨និង៥៦នាទីយប់ថ្ងៃដដែល ។ ជនរងគ្រោះឈ្មោះ ង ស អាយុ៧ឆ្នាំ ។ ជនសង្ស័យឈ្មោះ ផុន សុភាព អាយុ១៩ឆ្នាំ ជនជាតិខ្មែរ មុខរបរកម្មករ ស្នាក់នៅចំនុចកើតហេតុ ។
បន្ទាប់ពីស្រាវជ្រាវស៊ើបអង្កេតរួចរាល់ កម្លាំងការិយាល័យប្រឆាំងការជួញដូរមនុស្ស និងការពារអនីតិជននៃស្នងការរដ្ឋាននគរបាលខេត្តមណ្ឌលគិរីបានចាត់ការបញ្ជូនជនសង្ស័យទៅសាលាដំបូងខេត្តតាមនីតិវិធីច្បាប់នារសៀលថ្ងៃទី០២ ខែតុលានេះ ៕ កែសម្រួលដោយ ៖ សុឃាក់
ចែករំលែកព័តមាននេះ