មិនមាននរណាម្នាក់មានសមត្ថភាពក្នុងការបំពេញការងារដោយមានប្រសិទ្ធិភាព ទាំងមិនបានរៀនសូត្រ ឬទទួលបានការណែនាំ និងបង្វឹកពីមុនមកទេ ។ ប្រសិនបើអ្នកមានតំណែងជានាយក ឬម្ចាស់ក្រុមហ៊ុន អ្នកត្រូវតែសួរខ្លួនឯងថា តើប្រធានក្រុមដែលធ្វើការឲ្យអ្នកកំពុងតែបង្វឹកកូនក្រុមរបស់ខ្លួន ឬទេ?
ប្រសិនបើអ្នកចង់ទទួលបានលទ្ធផលល្អសម្រាប់ក្រុមហ៊ុន ឬអាជីវកម្ម អ្នកត្រូវតែបង្វឹកអ្នកបង្វឹកក្នុងក្រុមហ៊ុនរបស់អ្នក ហើយខាងក្រោមនេះគឺជាវិធីសាស្ត្រមួយចំនួនដែលអ្នកអាចអនុវត្តបាន៖
១. ឲ្យពួកគេទទួលខុសត្រូវលើការងារ ៖
អ្នកត្រូវតែឲ្យអ្នកគ្រប់គ្រង ឬប្រធានក្រុមអ្នកដឹងថាអ្នកចង់ឲ្យពួកគេបង្រៀនដល់កូនក្រុមជាប្រចាំ និងជាប់លាប់ ។ តើកូនក្រុមមានសក្តានុពលបែបណាខ្លះដែលពួកគេអាចរីកចម្រើនបាន? អ្នកត្រូវឲ្យអ្នកគ្រប់គ្រងដឹងថាពួកគេមានទំនួលខុសត្រូវក្នុងការជួយឲ្យកូនក្រុមរីកចម្រើន ហើយអ្នកត្រូវតែសួរនាំជារៀងរាល់ខែ ឬឆ្នាំ ។
២. ផ្តល់ការហ្វឹកហាត់៖
អ្នកដឹកនាំក្រុមមួយចំនួនមិនមានសមត្ថភាពក្នុងការបង្រៀនដល់កូនក្រុមឡើយ ដូចនេះការបង្ខំឲ្យពួកគេផ្ទេរចំណេះដឹងខ្លួនទៅឲ្យអ្នកដទៃអាចបង្កឲ្យមានបញ្ហាផ្សេងៗ ឬជម្លោះក្នុងក្រុមជាដើម ។ ដោយហេតុដូចនេះ ការហ្វឹកហាត់គឺពិតជាសំខាន់ណាស់ដើម្បីបង្កើតបានគ្រូបង្វឹកដែលមានសមត្ថភាព និងមានជំនឿចិត្ត ។
៣. ផ្លាស់ប្តូរគំនិត៖
ពេលដែលប្រធានក្រុមហៅកូនក្រុមទៅជួប កូនក្រុមតែងតែគិតថាពួកគេប្រហែលជាបានធ្វើអ្វីខុសជាក់ជាមិនខានព្រោះពីមុនមក ការសន្ទនារវាងថ្នាក់លើ និងថ្នាក់ក្រោមគឺតែងតែទាក់ទិននឹងការស្តីបន្ទោស ។ ដូច្នេះអ្នកត្រូវតែផ្លាស់ប្តូរគំនិតនេះចេញ និងជំរុញឲ្យមានការសន្ទនាដែលជួយដល់កូនក្រុមរីកចម្រើនទាំងលក្នុងផ្នែកជំនាញ និងចំណេះដឹង ។
៤. ការលើកទឹកចិត្ត៖
មនុស្សលោកតែងតែចូលចិត្តពេលដែលពួកគេទទួលបានរង្វាន់លើកទឹកចិត្តបន្ទាប់ពីធ្វើអ្វីមួយ ហើយប្រធានក្រុម ឬអ្នកគ្រប់គ្រងរបស់អ្នកក៏ដូចគ្នាដែរ ។ ដើម្បីលើកទឹកចិត្តពួកគេឲ្យផ្តល់ការបង្វឹកដល់កូនក្រុមអ្នកគួរតែផ្តល់ជាថវិកា ឬរង្វាន់ផ្សេងៗជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ