រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា បញ្ហាព្រំដែនភាគីកម្ពុជាវៀតណាម និងឡាវបានឯកភាពគ្នា ហើយនឹងស្នើប្រធានាធិបតីបារាំងមកផ្ទេរ និងផ្តល់ឯកសារពាក់ព័ន្ធ ដើម្បីដោះស្រាយបន្តទៀតរហូតដល់បញ្ចប់បញ្ហា ។ ថ្លែងក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យប៊ែលធី (BELTEI) អន្តរជាតិ នាព្រឹកថ្ងៃទី០២ ខែតុលានេះ សម្តេចតេជោ ហ៊ុន សែន នាយករដ្ឋមន្ត្រីបានអះអាងថា ព្រំដែនកម្ពុជាមួយបណ្តាប្រទេសជាប់គ្នា បើនិយាយនៅដល់ក្រោម១០%ប៉ុណ្ណោះមិនទាន់អភិវឌ្ឍន៍ ដោយសារនៅគ្រប់មីន និងគ្រាប់មិនទាន់ផ្ទុះ ។
សម្តេចបានយ៉ាងដូច្នេះថា ៖«សមរភូមិទាំងឡាយដែលពីមុនស៊ីសាច់ហុតឈាមបានក្លាយជាតំបន់ទេសចរណ៍ក្លាយជាតំបន់ដាំដុះ នៅសល់ខ្ញុំថាក្រោម១០ភាគរយទៅចុះ ដែលយើងមិនទាន់ធ្វើទៅរួចដោយសារនៅសល់គ្រាន់មីង និងគ្រាប់មិនទា ន់ផ្ទុះ ។ យើងត្រូវបន្តដោះស្រាយបញ្ហានោះ ប៉ុន្តែក្រៅពីនោះអភិវឌ្ឍន៍អស់ហើយ» ។ សម្តេចបន្តថា ៖«កន្លែងធ្លាប់ដាក់កាំភ្លើង កន្លែងគេធ្លាប់វាយប្រហារគ្នាកាលពីដើម ។ ឯព្រំដែនជាមួយប្រទេសជិតខាងទំហំពាណិជ្ជកម្មរវាងកម្ពុជា និងថៃឡើងដល់៧ពាន់លានដុល្លារ ។
ទំហំពាណិជ្ជកម្មរវាងកម្ពុជា និងវៀតណាម ឡើងដល់ប្រមាណ៤ពាន់លានដុល្លារ ហើយកម្ពុជា និងវៀតណាមសម្រេចបោះបង្គោលខ័ណ្ឌសីមាបាន៨៤% រួចហើយ ។ ហើយខ្ញុំនឹងទៅប្រទេសវៀតណាមនៅថ្ងៃខាងមុខនេះ ដើម្បីចុះហត្ថលេខាទទួលយកសមិទ្ធិផល៨៤% ។ ផែនទីបានបោះនៅប្រទេសដាណាម៉ាកបានដឹកមកដល់អស់ហើយ» ។ សម្តេចបន្ថែមថា បន្ទាប់ពីធ្វើការចរចាយ៉ាងស្វិតស្វាញពីឆ្នាំ២០០៥ រហូតដល់ឆ្នាំ២០១៦ រយៈពេល១៤ឆ្នាំ នៅសេសសល់១៦ភាគទៀតនឹងត្រូវបន្តដោះស្រាយបន្តទៀត ។
ចំណែកព្រំដែនកម្ពុជា និងឡាវវិញសម្តេចឲ្យដឹងថា ព្រំដែនកម្ពុជា និងឡាវបានដោះស្រាយបាន៨៦ % ដែលថ្ងៃមុននាយករដ្ឋមន្ត្រីឡាវមកកម្ពុជាភាគីទាំងពីរបានឯកភាពគ្នាធ្វើសន្ធិសញ្ញាទទួលយកនូវសមិទ្ធផល៨៦% ដែលភាគីទាំងពីរបានដោះស្រាយ ឯ១៤%ទៀត ត្រូវបន្តដោះស្រាយ ដោយមានការស្នើសុំទៅប្រធានាធិបតីបារាំង ។ ទាំងកម្ពុជាជាមួយវៀតណាមក៏ស្នើទៅប្រធានាធិបតីបារាំង ដើម្បីជួយមកផ្ទេរផែនទី ។ ទាំងកម្ពុជាជាមួយឡាវក៏ស្នើទៅប្រធានាធិបតីបារាំង ដើម្បីមកផ្ទេរផែនទីក៏ដូចជា ផ្តល់ឯកសារផ្សេងៗទាក់ទង និងព្រំដែន ។
សម្តេចបញ្ជាក់ថា ៖«ព្រំដែនដែលធ្លាប់មានការភ័យខ្លាចរបស់ប្រជាពលរដ្ឋឥឡូវបានប្រែក្លាយជាតំបន់ដែលប្រជាជនធ្វើការរកស៊ីជាមួយគ្នាទំហំពាណិជ្ជកម្មថៃ៧ពាន់លានមិនមែនតួចតាចនោះទេ ហើយទំហំពាណិជ្ជកម្មជាមួយវៀតណាម៤ពាន់លានក៏មិនតូចដែរ ។ យើងជាមួយឡាវមិនច្រើននោះទេ ព្រោះយើងជាមួយឡាវឆ្ងាយ ហើយឡាវក៏ឆ្ងាយដែរ ប៉ុន្តែយើងនៅតែធ្វើទៅមក» ៕ កែសម្រួលដោយ ៖ សុឃាក់
ចែករំលែកព័តមាននេះ