រាជធានីភ្នំពេញ ៖ កម្មការីនីរោងចក្រកាត់ដេរម្នាក់ ពេលកំពុងតែធ្វើការសុខៗ ស្រាប់តែដួលសន្លប់ ហើយ ត្រូវបានខាងរោចក្រកាត់ដេរ ដឹកយកទៅសង្គ្រោះនៅមន្ទីរសម្រាកព្យាបាលសុខលាភទួលសង្កែ ដែលជាដៃគូសហការជាមួយ ប.ស.ស…
រាជធានីភ្នំពេញ ៖ កម្មការីនីរោងចក្រកាត់ដេរម្នាក់ ពេលកំពុងតែធ្វើការសុខៗ ស្រាប់តែដួលសន្លប់ ហើយ ត្រូវបានខាងរោចក្រកាត់ដេរ ដឹកយកទៅសង្គ្រោះនៅមន្ទីរសម្រាកព្យាបាលសុខលាភទួលសង្កែ ដែលជាដៃគូសហការជាមួយ ប.ស.ស ក្រោយមកស្ត្រីរងគ្រោះបានដាច់ខ្យល់ស្លាប់ ។ ពាក់ព័ន្ធនឹងករណីនេះ គេពុំដឹងពីមូលហេតុនៃការស្លាប់របស់ស្ត្រីរងគ្រោះឡើយ តែគេឃើញបុរសជាប្តីរបស់ស្ត្រីរងគ្រោះបានស្តីបន្ទោសទៅខាងរោងចក្រកាត់ដេរ ព្រមទាំងយំទទូចសុំដល់ថ្នាក់ដឹកនាំ ក៏ដូចជាសមត្ថកិច្ចឱ្យជួយរកមូលហេតុនៃការស្លាប់ ដើម្បីផ្តល់ភាពយុត្តិធម៌ដល់ប្រពន្ធរបស់ខ្លួនផងដែរ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ៩និង៣៥នាទីព្រឹកថ្ងៃទី២ ខែតុលា ឆ្នាំ ២០១៩ នៅមន្ទីរសម្រាកព្យាបាលសុខលាភ ដែលស្ថិតនៅក្នុងភូមិបាក់ទូក សង្កាត់ទួលសង្កែទី១ ខណ្ឌឬស្សីកែវ ។
ស្ត្រីរងគ្រោះដែលស្លាប់ឈ្មោះ ឈន ចន្ធូ ហៅឆាយ អាយុ២៣ឆ្នាំ ជាកម្មការីនីបំរើការងារក្នុងរោងចក្រកាត់ដេរ យីហោ «ហៃ តាន់អេចប៊ី (ខេមបូឌា) ឯ.ក» ស្នាក់នៅផ្ទះជួល ក្នុងភូមិបាក់ទូក សង្កាត់ទួលសង្កែទី១ ខណ្ឌឬស្សីកែវ និងមានស្រុកកំណើត ផ្ទះលេខ៧០ ភូមិព្រៃចំការខាងជើង ឃុំស្វាយជ្រុំ ស្រុកមេសាង ខេត្តព្រៃវែង ។ ចំណែកបុរសជាប្តីឈ្មោះ អិល ធុច អាយុ២៦ឆ្នាំ ជាអ្នករត់ម៉ូតូកង់៣ ។ គ្រួសារនេះមានកូនស្រីម្នាក់អាយុប្រមាណ១០ខែ។
តាមប្រភពព័ត៌មានពីកម្មករដែលធ្វើការជាមួយស្ត្រីរងគ្រោះបានអោយដឹងថា មុនពេលកើតហេតុ ខណៈពេលដែលស្ត្រីរងគ្រោះកំពុងតែអង្អុយធ្វើការសុខៗ ស្រាប់តែត្អូញប្រាប់អ្នកធ្វើការនៅជិតខាងថា ឈឺក្បាល ។ ភ្លាមនោះកម្មការីនីដែលធ្វើការជាមួយស្ត្រីរងគ្រោះបានជួយធ្វើចលនា និងប្រុងដកសក់ឱ្យ ស្រាប់តែស្ត្រីរងគ្រោះក្រដាស ហើយក៏ដួលសន្លប់តែម្តង ។
តាមប្រភពដដែលបានអោយដឹងបន្តថា ភ្លាមៗនោះ ត្រូវបានមិត្តរួមការងារជួយរឹត និងធ្វើចលនាសង្គ្រោះបឋម ព្រមទាំងបីស្ត្រីរងគ្រោះយកទៅដាក់នៅបន្ទប់ពេទ្យដែរ តែដោយសារស្ថានភាពស្ត្រីរងគ្រោះធ្ងន់ធ្ងរ ក៏ត្រូវបានគេដឹកតាមរ៉ឺម៉កម៉ូតូកង់បីបញ្ជូនទៅកាន់មន្ទីរសម្រាកព្យាបាលសុខលាភ ដែលនៅក្បែរនោះ ស្រាប់តែស្ត្រីរងគ្រោះបានដាច់ខ្យល់ស្លាប់បាត់ទៅហើយ ។
តាមប្រភពដដែលបានអោយដឹងបន្តទៀតថា បន្ទាប់ពីស្ត្រីរងគ្រោះស្លាប់ គេឃើញបុរសជាប្តីបានធ្វើដំណើរមកដល់ ហើយយំឱបសពប្រពន្ធយ៉ាងសោកសៅជាទីបំផុត។ ទន្ទឹមនោះដែរ បុរសជាប្តីក៏បានស្តីបន្ទោសខាងរោងចក្រថា ហេតុអ្វីមិនដឹកប្រពន្ធរបស់ខ្លួនទៅកាន់មន្ទីរពេទ្យកាល់ម៉ែត ដែលជាមន្ទីរពេទ្យរដ្ឋដ៏ធំដើម្បីសង្គ្រោះ។ បន្ទាប់មកបុរសជាប្តីយំទទូចសុំដល់ថ្នាក់ដឹកនាំ ក៏ដូចជាសមត្ថកិច្ចឱ្យជួយរកមូលហេតុនៃការស្លាប់ដើម្បីផ្តល់ភាពយុត្តិធម៌ដល់ប្រពន្ធរបស់ខ្លួនផងដែរ។
ទោះបីជាយ៉ាងណា ភ្លាមៗនោះគេពុំដឹងពីមូលហេតុនៃការស្លាប់របស់ស្ត្រីរងគ្រោះឡើយ តែគេមានការសង្ស័យថា បណ្តាលមកពីគាំងបេះដូង ៕ (កែសម្រួលដោយ ៖ ធីតា)
ចែករំលែកព័តមាននេះ