ខេត្តកំពង់ធំ ៖ សេចក្តីរាយការណ៍បឋមបានឲ្យដឹងថា យុវជនម្នាក់លង់ទឹកស្លាប់ នៅចំណុចទំនប់ទឹកបង្ហៀរ ៦មករា ក្នុងភូមិក្បាលបី ឃុំទីពោ ស្រុកសន្ទុក ខេត្តកំពង់ធំ បាត់ពីរយប់ទើបរកសពឃើញអណ្តែតទឹក កាលពីព្រឹកថ្ងៃទី០១ ខែតុលានេះ ។
សេចក្តីរាយការណ៍បានបន្តថា សពជនរងគ្រោះឈ្មោះ គុយ កង អាយុ១៧ឆ្នាំ មុខរបរសិស្ស រស់នៅភូមិស្រយ៉ូវ សង្កាត់ស្រយ៉ូវ ក្រុងស្ទឹងសែន ។
តាមការឲ្យដឹងពីឈ្មោះ ឯម គង់ ភេទប្រុស អាយុ៤៨ឆ្នាំ និងឈ្មោះ ឆឹង ហៃ ភេទស្រី អាយុ៤២ឆ្នាំ ត្រូវជាឪពុកម្តាយបង្កើតជនរងគ្រោះប្រាប់ថា កូនរបស់គាត់មិនចេះហែលទឹកទេ ។ មុនពេលកើតហេតុកូនគាត់បានសុំទៅលេងនៅចំណុចកើតហេតុខាងលើ ពួកគាត់ជាឪពុកម្តាយមិនចង់អោយកូនទៅទេ តែអាងអ្នកទៅជាមួយនោះសុទ្ធជាបងប្អូនកូនក្មួយក៏យល់ព្រមអោយកូនទៅជាមួយ ហើយក៏ជួបរឿងបែបនេះ ។
បើតាមការរៀបរាប់របស់មិត្តភក្តិដែលទៅជាមួយប្រាប់ថាពួកគេមានគ្នា៨នាក់ ទាំងជនរងគ្រោះបាននាំគ្នាជិះម៉ូតូឌុបគ្នាឆ្ពោះទៅលេងនៅតំបន់បង្ហៀរទឹក៦មករា កាលពីវេលាម៉ោងប្រហែល១៣និង៣០នាទីរសៀល ថ្ងៃទី២៩ ខែកញ្ញា ក៏បានជួលកញ្ចុះបណ្តែតលើទឹកមួយ ហើយនាំគ្នាឡើងលើរោងបណ្តែតទឹកនោះ ដោយអោយម្ចាស់រោងដាក់ស្រា និងទឹកក្រូចឲ្យផឹកផង រួចពួកគេទាំងអស់គ្នាក៏បានទាញខ្សែរបណ្តែតទៅកណ្ដាលទឹក ចម្ងាយពីមុខទឹកប្រហែល៤០ម៉ែត ហើយនាំគ្នាអង្គុយផឹកស្រានៅទីនោះ រីឯជនរងគ្រោះមិនចេះផឹកស្រាទេ ក៏បានផឹកទឹកស្ទីង ហើយអង្គុយសំយ៉ុងជើងបែរមុខទៅជើង រីឯពួកគេនាំគ្នាផឹកស្រាដល់អស់សាច់ក្លែមក៏នាំគ្នាទាញរោងខ្យូសតាមខ្សែមកច្រាំងវិញទៅមកៗដោយពួកគេមិនបានដឹងថា ជនរងគ្រោះធ្លាក់ចូលក្នុងទឹកតាំងពីពេលថ្មើរណានោះទេ ។
លុះដល់ម៉ោង១៥និង៣០នាទីទើបដឹងថា បាត់ជនរងគ្រោះពីលើរោងក៏នាំគ្នាឆោឡោមុជទឹករាវរកតែរកមិនឃើញក៏បានរាយការណ៍ជូនសមត្ថកិច្ចនៅទីនោះភ្លាមៗក៏បានចាត់ចែងរករហូត តែរកមិនឃើញសាកសពរហូតដល់ព្រឹកថ្ងៃទី០១ ខែតុលាបានប្រទះឃើញសាកសពអណ្ដែតលើផ្ទៃទឹកផ្កាប់មុខនៅចំពីមុខទឹកបង្ហៀរចម្ងាយពីទំនប់ប្រហែល៥០ម៉ែត្រ ទីនោះមានទឹកជម្រៅ៧ម៉ែត្រ ។
ក្រោយដឹងព័ត៌មានកម្លាំងសមត្ថកិច្ចជំនាញយើងបានសហការជាមួយនឹងប៉ុស្តិ៍រដ្ឋបាលរដ្ឋអំណាចភូមិ និងក្រុមគ្រួសារសពនាំគ្នាយកទូកអូសសពមកដាក់លើគោក ដើម្បីពិនិត្យនៅក្នុងមាត់ និងច្រមុះសពមានហូរទឹកលាយភក់ លាយឈាម ដៃទាំងពីរក្តាប់នៅលើដងខ្លួន ពុំមានស្លាកស្នាមអ្វីកត់សម្គាល់ឡើយក៏បានធ្វើកំណត់ហេតុប្រគល់សពជូនសាច់ញាតិ យកទៅធ្វើបុណ្យតាមប្រពៃណី ដំណឹងនេះក៏ជាការអំពាវនាវដល់បងប្អូនប្រជាពលរដ្ឋ បើមានបំណងទៅលេងទឹក សូមឲ្យមានការប្រុងប្រយ័ត្នជានិច្ចកុំឲ្យដូចជា ករណីខាងលើនេះ ពីព្រោះកន្លែងកម្សាន្តខាងលើនេះតែងតែឆក់យកជីវិតមនុស្សជារៀងរាល់ឆ្នាំមិនសូវលួសឆ្នាំណានោះទេ ៕ កែសម្រួលដោយ ៖ សុឃាក់
ចែករំលែកព័តមាននេះ