ខេត្តបន្ទាយមានជ័យ ៖ បុរសម្នាក់បានលង់ទឹកស្លាប់ ខណៈស្រវឹងស្រាចុះទៅលេងទឹកប្រឡាយដែលកំពុងឡើងខ្លាំង ហេតុការណ៍បង្កឲ្យមានការភ្ញាក់ដល់កងកម្លាំងនគរបាលបានចុះរាវរកប្រមាណជាកន្លះម៉ោងទើបរកឃើញ ។ ករណីលង់ទឹកប្រឡាយនេះបានកើតឡើងនៅវេលាម៉ោង៥ល្ងាច ថ្ងៃទី៣០ ខែកញ្ញា ឆ្នាំ២០១៩ នៅចំណុចផ្លូវលំពីសង្កាត់ភ្នៀត ទៅផ្លូវជាតិលេខ៦ ស្ថិតក្នុងភូមិអ្នកតា សង្កាត់ភ្នៀត ក្រុងសិរីសោភ័ណ ខេត្តបន្ទាយមានជ័យ ។
ប្រភពព័ត៌មានពីនគរបាលមូលដ្ឋានបានឲ្យដឹងថា ជនរងគ្រោះឈ្មោះ យ៉ាន់ យឿត ភេទប្រុស អាយុ៣០ឆ្នាំ មុខរបរមិនពិតប្រាកដ រស់នៅភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
មុនពេលកើតហេតុជនរងគ្រោះបានផឹកស្រាស្រវឹងហើយចុះទៅលេងទឹកប្រឡាយដែលកំពុងឡើងខ្លាំង ហើយជាកន្លែងផ្លូវដាច់មានទឹកហូរបណ្តាលឲ្យលង់ទឹក ក្រោយពីមានកើតហេតុកងកម្លាំងនគរបាល និងប្រជាពលរដ្ឋនៅទីនោះបាននាំគ្នាចុះជួយរាវរកប្រហែលជាកន្លះម៉ោងទើបរកឃើញ និងបានដឹកយកទៅសង្គ្រោះនៅមន្ទីរពេទ្យបង្អែកក្រុងសិរីសោភ័ណ តែជាអកុសលមកដល់មន្ទីរពេទ្យត្រូវបានគ្រូពេទ្យនិយាយជនរងគ្រោះបានស្លាប់ទៅហើយ ។
ប្រភពដដែលបានបញ្ជាក់ថា សពជនរងគ្រោះបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
កែសម្រួលដោយ ៖ សំណាង
ចែករំលែកព័តមាននេះ