ខេត្តត្បូងឃ្មុំ ៖ បើតាមសេចក្តីរាយការណ៍បឋមបានឱ្យដឹងថា ស្របពេលដែលទឹកទន្លេមេគង្គបានចាប់ផ្តើមស្រកទៅវិញជាបណ្តើរៗហើយនោះ ដោយនៅព្រឹកថ្ងៃទី២៨ ខែកញ្ញា ឆ្នាំ២០១៩ ទឹកបានស្រកនៅ១១,៤៤ម៉ែត្រ បានធ្វើឲ្យច្រាំងត្រង់ចំណុចមាត់ព្រែកចុងភូមិទី៦ (ព្រែកជ្រឹង)…
ខេត្តត្បូងឃ្មុំ ៖ បើតាមសេចក្តីរាយការណ៍បឋមបានឱ្យដឹងថា ស្របពេលដែលទឹកទន្លេមេគង្គបានចាប់ផ្តើមស្រកទៅវិញជាបណ្តើរៗហើយនោះ ដោយនៅព្រឹកថ្ងៃទី២៨ ខែកញ្ញា ឆ្នាំ២០១៩ ទឹកបានស្រកនៅ១១,៤៤ម៉ែត្រ បានធ្វើឲ្យច្រាំងត្រង់ចំណុចមាត់ព្រែកចុងភូមិទី៦ (ព្រែកជ្រឹង) ឃុំស្វាយឃ្លាំង ស្រុកក្រូចឆ្មារ បានស្រុតបាក់គួរឲ្យព្រួយកង្វល់ ដោយក្នុងនោះលំនៅឋានរបស់ប្រជាពលរដ្ឋចំនួន៥ខ្នង ប្រឈមនឹងការរុះរើផងដែរ។
លោកវរសេនីយ៍ទោ អ៊ុក ពៅ អធិការរងនគរបាលស្រុកក្រូចឆ្មារស្តីទី ឲ្យដឹងថា ក្នុងមួយរយៈកន្លងមក ពេលដែលទឹកទន្លេមេគង្គហក់ឡើងនោះបានធ្វើឲ្យលំនៅឋានរបស់ប្រជាពលរដ្ឋរស់នៅតាមដងទន្លេ ត្រូវបានរុះរើអស់ជាច្រើនខ្នង ដោយចល័តទៅកាន់កន្លែងសុវត្ថិភាព ហើយក៏មិនមានអ្នកណាម្នាក់រងគ្រោះថ្នាក់នោះទេ ហើយយោងតាមបញ្ជាររបស់លោកឧត្តមសេនីយ៍ទោ បែន រ័ត្ន ស្នងការនគរបាលខេត្ត គឺត្រូវយកចិត្តទុកដាក់ក្នុងការសង្គ្រោះពលរដ្ឋ ។
លោកអធិការស្តីទីស្រុកក្រូចឆ្មារ បន្តថា ក្នុងពេលដែលទឹកព្រែកបានស្រកនោះ ក៏បានធ្វើឲ្យលំនៅឋានរបស់ពលរដ្ឋនៅតាមមាត់ព្រែកចំនួន៥ខ្នង ក្នុងនោះមាន ១-ផ្ទះឈ្មោះ យាង ខេមរា ភេទស្រី អាយុ៤៥ឆ្នាំ មានទំហំ៦គុណ៥ម៉ែត្រ ធ្វើពីឈើប្រក់ស័ង្កសី ២-ផ្ទះឈ្មោះ ពាង ម៉ុន ភេទប្រុស អាយុ៧១ឆ្នាំ សង់ពីឈើប្រក់ដែក ៣-ផ្ទះឈ្មោះ សេង គឿន ភេទស្រី អាយុ៧០ឆ្នាំ ទំហំ៥គុណ៨ម៉ែត្រធ្វើពីឈើ ប្រក់ស័ង្កសី ៤-ផ្ទះឈ្មោះ ង៉ន ស៊ាងលី ភេទប្រុស អាយុ៦៦ឆ្នាំ ឈើប្រក់ដែកស័ង្កសី និង៥-ផ្ទះឈ្មោះម៉ែន សុធន់ ភេទប្រុស អាយុ៤៨ឆ្នាំ ឈើប្រក់ស័ង្កសី ផ្ទះទាំងអស់ជាប្រភេទផ្ទះតៀមសង់ផ្ទាល់ដី ។
លោកវរសេនីយ៍ទោបញ្ជាក់ថា សម្រាប់លំនៅឋានចំនួន៥ខ្នងខាងលើនេះ ត្រូវបានកម្លាំងអធិការដ្ឋាននគរបាលស្រុកក្រូចឆ្មារ នៅរសៀលថ្ងៃដដែលទី២៨ ខែកញ្ញា ចុះទៅជួយរុះរើចេញ ដើម្បីចៀសវាងកុំឲ្យកើតមានគ្រោះថ្នាក់ណាមួយកើតឡើងជាយថាហេតុលើម្ចាស់ផ្ទះ ៕ (កែសម្រួលដោយ ៖ បុប្ផា)
ចែករំលែកព័តមាននេះ