ខេត្តព្រៃវែង ៖ ភ្លៀងមួយមេធំលាយឡំដោយខ្យល់កន្ត្រាក់ផងនោះ បានធ្វើអោយផ្ទះប្រជាពលរដ្ឋជិត៥០ខ្នង ក្នុងស្រុកចំនួន២នៅខេត្តព្រៃវែងបានដួលរលំ ប៉ើងដំបូលនិងជញ្ជាំង ព្រមទាំងបានធ្វើអោយបុរសម្នាក់ស្លាប់បាត់បង់ជីវិតដោយសារតែផ្ទះរលំសង្កត់លើ និង៦នាក់ផ្សេងទៀតបានរងរបួសធ្ងន់និងស្រាល។ ហេតុការណ៌ខាងលើនេះបានកើតឡើងកាលពីវេលាម៉ោង៦និង៤០នាទីយប់ថ្ងៃទី២៨ កញ្ញា…
ខេត្តព្រៃវែង ៖ ភ្លៀងមួយមេធំលាយឡំដោយខ្យល់កន្ត្រាក់ផងនោះ បានធ្វើអោយផ្ទះប្រជាពលរដ្ឋជិត៥០ខ្នង ក្នុងស្រុកចំនួន២នៅខេត្តព្រៃវែងបានដួលរលំ ប៉ើងដំបូលនិងជញ្ជាំង ព្រមទាំងបានធ្វើអោយបុរសម្នាក់ស្លាប់បាត់បង់ជីវិតដោយសារតែផ្ទះរលំសង្កត់លើ និង៦នាក់ផ្សេងទៀតបានរងរបួសធ្ងន់និងស្រាល។
ហេតុការណ៌ខាងលើនេះបានកើតឡើងកាលពីវេលាម៉ោង៦និង៤០នាទីយប់ថ្ងៃទី២៨ កញ្ញា នៅស្រុកចំនួន២ គឺស្រុកកំពង់ត្របែក និងស្រុកពាមជរ ។
ស្រុកកំពង់ត្របែកបានបង្កផលប៉ះពាល់ទៅលើឃុំចំនួន៣ បណ្តាលអោយផ្ទះចំនួន៣ខ្នងដួលរលំខូចខាតទាំងស្រុង និងធ្វើអោយស្រី្តម្នាក់រងរបួសបាក់ភ្លៅខាងស្តាំ ត្រូវបានក្រុមគ្រួសារនាំយកទៅសង្គ្រោះនៅមន្ទីរពេទ្យទាំងយប់។
ចំណែកនៅឯស្រុកពាមជរ ខ្យល់កន្ត្រាក់បានបោកបក់ទៅលើឃុំចំនួន៤ និងបានបណ្តាលអោយផ្ទះសម្បែងរបស់ប្រជាពលរដ្ឋជាង៤០ខ្នងរលំបាក់ ប៉ើងដំបូលនិងជញ្ជាំង ជាមួយគ្នានោះបានបណ្តាលអោយបុរសម្នាក់ឈ្មោះ ងួន ជុន អាយុ៤៧ឆ្នាំ នៅភូមិរកាដុះ ឃុំក្រាំងត្រយ៉ង ស្លាប់បាត់បង់ជីវិតភ្លាមៗដោយសារត្រូវផ្ទះរលំសង្កត់ពីលើ និងមនុស្សក្មេងចាស់ប្រុសស្រីចំនួន៥នាក់ផ្សេងទៀត បានរងរបួសធ្ងន់និងស្រាលផងដែរ។
ក្រោយពីកើតមានហេតុការណ៌ខ្យល់កន្ត្រាក់វាយប្រហារទៅលើផ្ទះសម្បែងរបស់ប្រជាពលរដ្ឋ បែបនេះ នៅព្រឹកថ្ងៃទី២៩ កញ្ញា ខាងអាជ្ញាធរស្រុកទាំង២ រួមទាំងកំលាំងសមត្ថកិច្ចផងដែរ បានចុះទៅជួយរុះរើរៀបចំផ្ទះសម្បែងអោយជនរងគ្រោះ និងបានកាប់ទាញដើមឈើធំៗដែលដួលរលំសង្កត់លើផ្ទះអ្នកស្រុក និងរលំកាត់លើផ្លូវដើម្បីសម្រួលកុំអោយមានការកកស្ទះចរាចរណ៌ ចំណែកជនរងគ្រោះទាំងអស់ ក៏ត្រូវបាននាំយកទៅព្យាបាល នៅតាមមន្ទីរពេទ្យបង្អែកស្រុកផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ