ខេត្តសៀមរាប ៖ វត្តមនី្នសង្ឃ ហៅវត្តពើងព្រួត មួយនៅដាច់ស្រយ៉ាល ហើយក្រខ្សត់ជាងគេ ក្បែរជើងភ្នំ គ្មានព្រះវិហារ គ្មានសាលាឆាន់ និងគ្មានកុដិសម្រាប់ព្រះសង្ឃគង់នៅនោះ…
ខេត្តសៀមរាប ៖ វត្តមនី្នសង្ឃ ហៅវត្តពើងព្រួត មួយនៅដាច់ស្រយ៉ាល ហើយក្រខ្សត់ជាងគេ ក្បែរជើងភ្នំ គ្មានព្រះវិហារ គ្មានសាលាឆាន់ និងគ្មានកុដិសម្រាប់ព្រះសង្ឃគង់នៅនោះ មានតែអាស្រមធ្វើពីឈើប្រក់សង្ក័សី ដែលក្រខ្សត់ជាងគេ ហើយសូម្បីចង្ហាន់ក៏មិនសូវសម្បូរណ៍ ដូចវត្តផ្សេងៗក្នុងចំណោមវត្តជាច្រើនក្នុងភូមិសាស្ត្រស្រុកបន្ទាយស្រី ខេត្តសៀមរាប ផងដែរ។
វត្តមនី្នសង្ឃ ហៅវត្តពើងព្រួត មានដីទំហំចំនួន១១ហិកតា ហើយមានចម្ងាយពីទីរួមខេត្តសៀមរាប ប្រមាណជាង៥០គីឡូម៉ែត្រ ស្ថិតនៅតំបន់អូរប៉ោង ក្នុងភូមិកំព្រហ្ម ឃុំឃុនរាម ស្រុកបន្ទាយស្រី ខេត្តសៀមរាប ។ ហើយវត្តមួយនេះ ដែលមានទីតាំងនៅក្នុងបរិវេណដីសម្បទារបស់សម្តេចតេជោ ចែកជូនឱ្យអតីតយុវជន បង្កើតជាសមាគម ហើយធ្វើផ្ទះជូនពួកគាត់ក្នុង១គ្រួសារៗផងដែរ។
ហើយវត្តនេះទើបកសាងបានរយៈពេល១ឆ្នាំ ដែលមានលោកគង់នៅចំនួន២អង្គ ក្នុងនោះមានចៅអធិការ១ព្រះអង្គ ដែលទើបចេញមកពីវត្តនៅក្នុងខេត្តកំពង់ចាម បានមកគង់នៅបានរយៈពេលជិត១ឆ្នាំប៉ុណ្ណោះ មានព្រះនាម ស៊ីម សឿង ព្រះជន្ម៤៦ព្រះវស្សា (ក្នុងវត្តមុន្នីសង្ឃ ហៅវត្តពើងព្រួត) ដើម្បីជួយកសាងវត្តនេះ ឱ្យក្លាយទៅជាវត្តមានព្រះវិហារ សាលាឆាន់ និងកុដិ សម្រាប់ព្រះសង្ឃគង់នៅ ព្រមទាំងសម្រាប់ពុទ្ធបរិស័ទជិតឆ្ងាយចូលមកសុំសីល និងតាំងសម្មាធិ។
ហើយបច្ចុប្បន្នមានលោកតាអាចារ្យ និងគណៈកម្មធិការវត្តចំនួន១១នាក់ ,យាយៗមានចំនួន៨នាក់ ដូច្នេះពួកគាត់លើកដៃទាំងទ្វេ សូមអំពាវនាវដល់អាជ្ញាធរស្រុក ក៏ដូចជាអាជ្ញាធរខេត្ត ព្រមទាំងសប្បុរសជន ក្រៅប្រទេស និងក្នុងស្រុក មេត្តាជួយដល់វត្តមួយនេះឱ្យកើតទៅមុខផងដែរ។
សូមបញ្ជាក់ផងដែរថា បើយើងជិះទៅដល់ស្រុកបន្ទាយស្រី ហួសសាលាស្រុកបន្តិច ហើយយើងបត់ឆ្វេង តាមផ្លូវក្រួសក្រហម ទៅប្រហែល១៣គីឡូម៉ែត្រ ឃើញមានផ្ទះជាច្រើនរបស់អតីតយុវជន បង្កើតជាសមាគមដែលឧបត្ថម្ភដោយសម្តេចតេជោ ហ៊ុន សែន ចែកជូនឱ្យពួកគាត់ ហើយឃើញមានវិហារមួយទើបនឹងកសាងនៅក្បែរជើងភ្នំ នៅខាងស្តាំដៃនោះ គឺជាវត្ត ហើយ ព្រោះវត្តមួយនេះ មិនទាន់មានធ្វើក្លោងទ្វារដាក់ឈ្មោះវត្តនៅឡើយទេ ដោយសារខ្វះមុខ ខ្វះក្រោយ ។
បើតាមសង្ឃដីការចៅអធិការ ព្រះនាម ស៊ីម សឿង ព្រះជន្ម៤៦ព្រះវស្សា មានស្រុកកំណើតនៅភូមិថ្មី ឃុំទួលព្រះឃ្លោង ស្រុកស្ទឹងត្រង់ ខេត្តកំពង់ចាម អតីតចៅអធិការវត្តពោធិ៍មង្គល បច្ចុប្បន្នព្រះអង្គមកគង់នៅវត្តមនី្នសង្ឃ ហៅវត្តពើងព្រួត បានរយៈជិត១ឆ្នាំ មានសង្ឃដីកាប្រាប់ភ្នាក់ងារកោះសន្តិភាពថា មុនព្រះអង្គមកគង់នៅវត្តនេះ ជាចៅអធិការវត្ត ព្រោះមានពុទ្ធបរិស័ទ ប្រាប់ថា មានដី១កន្លែងដែលសម្តេចតេជោបានចែកដី និងធ្វើផ្ទះឱ្យអតីតយុវជននៅដែលពួកគាត់គ្មានលំនៅ ហើយក្នុងបរិវេណដីនោះ មានទុកសម្រាប់កសាងសាលារៀន មន្ទីរពេទ្យ វត្តអារាម និងប៉ុស្តិ៍នគរបាលផងដែរ។
ខណៈពេលនោះ ព្រះអង្គក៏បានសុំយោបល់ទៅអនុគណៈស្រុកបន្ទាយស្រី និងមន្ទីរធម្មការខេត្ត ហើយអនុគណៈ និង ប្រធានមន្ទីរ ព្រមទាំងបងប្អូនពុទ្ធបរិស័ទ សម្រេចឱ្យអាត្មាមកគង់នៅទីនេះចុះ ព្រោះនៅទីនោះគ្មានវត្តអារាមទេ មានតែនៅជិតសាលាស្រុក ហើយនៅឆ្ងាយៗផង ។
ព្រះអង្គមានសង្ឃដីកាបន្តថា ព្រះអង្គ ក៏សម្រេចចិត្តមកគង់នៅវត្តនេះ ដើម្បីរៀបចំឱ្យក្លាយទៅជាវត្តមួយនៅជាប់នឹងជើងភ្នំ គ្រាន់បានពុទ្ធបរិស័ទដែលនៅជិតឆ្ងាយមកបានសុំសីល៍ និង តាំងសម្មាធិផងដែរ។ នៅក្នុងវត្តនេះ មុនដំបូងមានតែព្រះអង្គ២ព្រះអង្គ ទាំងអាត្មាគត់ និង បង្កើតគណៈកម្មធិការ និងតាអាចារ្យសរុបចំនួន១១នាក់ និងយាយជីចំនួន៨នាក់ ហើយក្នុងបរិវេណវត្តនោះ ទើបអាត្មាបង្កើតឡើងនេះពុំទាន់មានអ្វីទាំងអស់ សូម្បីតែព្រះវិហារសុំសីល្បិ៍សាលាឆាន់ បន្ទប់ទឹក និងកុដិសម្រាប់ព្រះសង្ឃគង់ក៏គ្មានដែរ។
គឺមានតែអាស្រមធ្វើពីឈើប្រក់ស័ង្កសីទុកសម្រាប់ឱ្យលោកតា លោកយាយ សម្រាប់មកសុំសីល៍ ដែលជាវត្តក្រខ្សត់ជាងគេហើយ សូម្បីចង្ហាន់ក៏មិនសូវសម្បូរណ៍ ដូចវត្តផ្សេងៗក្នុងចំណោមវត្តជាច្រើនក្នុងភូមិសាស្ត្រស្រុកបន្ទាយស្រី ខេត្តសៀមរាប ផងដែរ។
ព្រះចៅអធិការវត្ត មានសង្ឃដីកាបន្ថែមថា មូលហេតុ ដោយសារគ្មានមនុស្សមកសុំសីល្ប៍ និង យកចង្ហាន់មកប្រគេននោះ គឺស្ថានភាពផ្លូវពិបាកក្នុងការធ្វើដំណើរ របស់ពុទ្ធបរិស័ទ ក៏ដូចជាប្រជាពលរដ្ឋ ដែលរស់នៅទីជិតឆ្ងាយដែរ ។ដូច្នេះព្រះអង្គសូមអំពាវនាវដល់អាជ្ញាធរស្រុក/ខេត្ត និងសប្បុរសជនជិតឆ្ងាយ មេត្តាជួយដល់វត្តអាត្មាផង ដើម្បីគ្រាន់បានពុទ្ធបរិស័ទមកបុណ្យទានឱ្យបានច្រើន ព្រោះនៅទីនោះមានធម្មជាតិ ស្រស់បំព្រង និងខ្យល់បរិសុទ្ធផងដែរ ដោយសារនៅជិតជើងភ្នំ។
ចំណែកលោក ខ្វាន់ វណ្ណៈ អាយុ៥៣ឆ្នាំ មុខងារជំនួយការភូមិកំព្រហ្ម និងជាគណៈកម្មាការវត្ត បច្ចុប្បន្នរស់នៅក្នុងភូមិកំព្រហ្ម ឃុំឃុនរាម ស្រុកបន្ទាយស្រី ខេត្តសៀមរាប បានរៀបរាប់ប្រាប់ថា ក្នុងវត្តមុន្នីសង្ឃ ហៅវត្តពើងព្រួតនេះ មានផ្ទៃដីទំហំ១១ហិកតា និងមានលោក២អង្គ គណៈកម្មការ និងតាអាចារ្យ សរុបចំនួន១១នាក់, យាយៗ ចំនួន៨នាក់ ហើយវត្តនេះពុំសូវមានមនុស្សចេញ-ចូល យកចង្ហាន់មកប្រគេនលោកទេ ដោយសារវានៅឆ្ងាយដាច់សង្វែងកណ្តាលព្រៃ ពិបាកធ្វើដំណើរខ្លាំងពេក។
លោកបានរៀបរាប់បន្តថា ចំពោះថ្ងៃបុណ្យទាន ក៏មិនសូវសម្បូរណ៍ដូចវត្តផ្សេងៗដែរ ព្រោះគេអត់ទាន់ដឹង។ ហើយលោកក៏បានសំណូមពរ ដល់អាជ្ញាធរស្រុក/ខេត្ត ព្រមទាំងពុទ្ធបរិស័ទ ជិតឆ្ងាយ និងសប្បុរសជន ក្នុង និងក្រៅស្រុក មេត្តាជួយដល់វត្តមួយនេះផង៕ (កែសម្រួលដោយ ៖ បុប្ផា)
ចែករំលែកព័តមាននេះ