ខេត្តបន្ទាយមានជ័យ ៖ វត្តមួយនៅទិសពាយ័ព្យនៃទីរួមខេត្តបន្ទាយមានជ័យ ក្រខ្សត់ជាងគេ សូម្បីសាលាឆាន់ក៏មិនទាន់មាន ឯព្រះសង្ឃមានតែ3អង្គប៉ុណ្ណោះ។ វត្តខាងលើនេះ គឺវត្តគិរីតេជោ សែន ជ័យ…
ខេត្តបន្ទាយមានជ័យ ៖ វត្តមួយនៅទិសពាយ័ព្យនៃទីរួមខេត្តបន្ទាយមានជ័យ ក្រខ្សត់ជាងគេ សូម្បីសាលាឆាន់ក៏មិនទាន់មាន ឯព្រះសង្ឃមានតែ3អង្គប៉ុណ្ណោះ។ វត្តខាងលើនេះ គឺវត្តគិរីតេជោ សែន ជ័យ ស្ថិតនៅលើភ្នំដីឬហៅ (ភ្នំតែហាំង) ស្ថិតក្នុងភូមិចក់ពួក ឃុំស្លក្រាម ស្រុកស្វាយចេក។
វត្តនេះ មានចម្ងាយពីទីរួមខេត្តបន្ទាយមានជ័យប្រហែលជិត60គីឡូមែត្រ។ ដើម្បីទៅដល់វត្តខាងលើ ដំបូងធ្វើដំណើចេញពីទីរួមខេត្តបន្ទាយមានជ័យ តាមដងផ្លូវជាតិលេខ5 លុះទៅដល់ខាងលិចផ្សារគត្តសត ប្រហែល80ម៉ែត្របត់ទៅទិសខាងជើង(បត់ស្តាំ) តាមផ្លូវជាតិលេខ258D នៅពេលទៅដល់ចំណុចរង្វង់មូលអូរបីជាន់ ស្ថិតក្នុងភូមិ និងឃុំអូរបីជាន់ បត់ស្តាំធ្វើដំណើតាមដងផ្លូវជាតិលេខ58 លុះដល់ចំណុចផ្លូវគម្រោងបើកច្រកថ្មីកម្ពុជា-ថៃបឹងស្នោរណូនម៉ាក់ មុនបត់ស្តាំតាមផ្លូវក្រាលក្រួសក្រហម រហូតដល់វត្តមួយនេះ។
រីឯផ្លូវមួយទៀត លោកអ្នកអាចធ្វើដំណើតាមផ្លូវជាតិលេខ5 ទៅដល់ចំណុចរង្វង់មូលគ្រោងបើកច្រកអន្តរជាតិថ្មីស្ទឹងបត់ណងអៀន ក្នុងភូមិនិងសង្កាត់ផ្សារកណ្តាល ក្រុងប៉ោយប៉ែត បត់ទៅទិសខាងជើង(ខាងស្តាំ) ឡើងទៅផ្លូវជាតិលេខ58 រហូតដល់ផ្លូវគម្រោងបើកច្រកតំបន់ថ្មីបឹងស្នោរណូនម៉ាក់ មុនទើបបត់ស្តាំតាមផ្លូវក្រួសក្រហម កាត់ភូមិបឹងស្នោរ ទៅកាន់វត្តខាងលើ ក៏បាន។
បើតាមជួបសម្ភាសន៍ជាមួយអ្នកស្រុកប្រាប់ថា វត្តនេះក្រខ្សត់ជាងគេ វត្តនេះកកើតតាំងពីឆ្នាំ2010 ហើយថា អ្នកភូមិភាគច្រើនជាអ្នកក្រីក្រ ម្យ៉ាងវត្តនេះឆ្ងាយដាច់ស្រយ៉ាលពីគេទៀត ទើបជួបនៅកង្វះខាតយ៉ាងដូច្នេះ។
បើតាមដូនជីចំណាស់ម្នាក់ដែលស្នាក់នៅក្នុងវត្តគិរីតេជោសែនជ័យ ប្រាប់ថា គាត់ស្នាក់នៅបំរើការងារក្នុងវត្តនេះតាំងពីទើបកកើតដំបូងម្ល៉េះ។ ដូនជីរូបនេះត្អូញត្អែថា វត្តខាងលើខ្វះខាតខ្លាំងឈាបនដ្ឋានសម្រាប់បូជាសព ក៏មិនទាន់មាន ព្រះវិហារក៏មិនទាន់មាន ហើយសូម្បីតែសាលាឆាន់នៅមេម៉ាយ ចាប់ផ្តើមសាងសង់បានតែជើងក្រោតិចតួច(គ្រិះ) ប៉ុណ្ណោះ។
ក្រោយទទួលបានព័ត៌មានពីភាពក្រខ្សត់របស់វត្តខាងលើ ភ្នាក់ងារកោះសន្តិភាពបានចុះទៅដល់ទីតាំងកើតហេតុ ប៉ុន្តែមិនអាចសុំជួបព្រះគ្រូចៅអធិការវត្តគិរីតេជោសែនជ័យ ព្រះនាម សួស ពៅ ព្រះជន្មាយុ32ព្រះវស្សាបានទេ ដោយនេនៗតូច2អង្គ ក៏ដូចជាដូនជីចំណាស់នៅទីនោះ មានពុទ្ធដីកា និងប្រាប់ថា ចៅអធិការវត្តរវល់ទៅចូលរួមប្រជុំ។
ចំណែកលោកឆាយ សុផៃ មេភូមិចក់ពួក ប្រាប់កោះសន្តិភាពថា វត្តខាងលើមានទំហំ17000ម៉ែត្រការ៉េ (មួយម៉ឺនប្រាំពីរពាន់ម៉ែត្រការ៉េ)។ លោកមេភូមិបញ្ជាក់ថា វត្តនេះមានច្បាប់ទម្លាប់ត្រឹមត្រូវពីក្រសួង និងមន្ទីរធម្មការ។ ហើយបច្ចុប្បន្នមានព្រះសង្ឃគង់នៅ3អង្គ គ្រាន់ជាងពីមុនមានតែចៅអធិការវត្ត1អង្គគត់។
លោកមេភូមិប្រាប់ថា ពលរដ្ឋក្នុងភូមិរបស់លោកមានច្រើនគួរសម គឺ185គ្រួសារ មនុស្សរាយជិត700នាក់ ប៉ុន្តែដោយសាវត្តនេះនៅដាច់ស្រយ៉ាល ហើយអ្នកភូមិភាគច្រើនក្រីក្ររស់អាស្រ័យទៅធ្វើការស៊ីឈ្នួលគេលើដីថៃព្រឹកវិលល្ងាច ទើបវត្តនេះជួបកង្វះខាតរហូតមក។
អ្នកភូមិ ក៏ដូចជាអាជ្ញាធរបានអំពាវនាវរកសប្បុរសជនក្នុង និងក្រៅប្រទេស មេត្តាជួយធ្វើយ៉ាងណា ដើម្បីឲ្យវត្តមួយនេះ មានព្រះវិហារ ក៏ដូចជាសាលាឆាន់ស្អាតល្អផង ព្រោះដើម្បីលើកតម្កើងវិស័យព្រះពុទ្ធសាសនារបស់យើងគ្រប់គ្នា។
កោះសន្តិភាពបានព្យាយាមទាក់ទងទៅលោក យ៉ិន យឿន ប្រធានមន្ទីរធម្មការ និងសាសនាខេត្ត ដើម្បីចង់ដឹងថា តើក្នុងខេត្តបន្ទាយមានជ័យមានវត្តប៉ុន្មាន? ក៏ដូចជាចង់ដឹងពីមូលហេតុផ្សេងៗទៀត តែមិនអាចទាក់ទងបាន ដោយសារទូរស័ព្ទរបស់លោកចុចចូលជាច្រើដង តែគ្មានអ្នកទទួល។
គួរបញ្ជាក់ថា បរិវេណវត្តគិរីតេជោសែនជ័យ ស្ថិតលើកូនភ្នំមួយ ដែលមានបរិយាកាសល្អ គឺខ្យល់បក់រំភើយៗតែម្តង៕ (កែសម្រួលដោយ ៖ បុប្ផា)
ចែករំលែកព័តមាននេះ