រាជធានីភ្នំពេញ ៖ នៅក្នុងឱកាសពិធីបុណ្យភ្ជុំបិណ្ឌឆ្នាំនេះ មានតារាជាច្រើនបាននាំគ្នាផ្ញើសារជូនពរដល់ប្រជាពលរដ្ឋ ជាពិសេសបណ្តាអ្នកគាំទ្រទាំងអស់នៅទូទាំងប្រទេស ក្នុងពេលដែលពួកគេក៏បានចែករំលែកនូវកុសលផលបុណ្យដែលបានធ្វើនាឱកាសកាន់បិណ្ឌផងដែរ ។
សារជូនពរត្រូវបានអ្នកសិល្បៈជាច្រើនបានបង្ហោះតាមហ្វេសប៊ុក ជាមួយនឹងខ្លឹមសារស្រដៀងៗគ្នា ពោលគឺជាការជូនពរឲ្យបងប្អូនប្រជាពលរដ្ឋបានជួបប្រទះនូវសេចក្តីសុខគ្រប់ក្រុមគ្រួសារនាឱកាសបុណ្យភ្ជុំបិណ្ឌនេះ ។
តារាចម្រៀងក្នុងផលិតកម្មសាន់ដេ កញ្ញា សុខ ពិសី បានបង្ហោះរូបភាពពេលទៅដាក់បិណ្ឌនៅឯវត្ត ជាមួយនឹងសារជូនពរថា «នាងខ្ញុំ សុខ ពិសី និងក្រុមគ្រួសារសូមជូនមគ្គផលកុសលផលបុណ្យដែលនាងខ្ញុំបានសាងសូមអោយបានដល់ប្រជាជនកម្ពុជា អោយជួបប្រទះតែសេចក្តីសុខ និងសេចក្តីចម្រើនគ្រប់ៗគ្នា» ។
តារាសម្តែងកញ្ញា ព្រះកាយច័ន្ទ ក៏បានបង្ហោះសារជូនពរស្រដៀងគ្នាផងដែរថា «ក្នុងឱកាស បុណ្យភ្ជុំបិណ្ឌ ប្រពៃណីខ្មែរ សាលា ព្រះកាយច័ន្ទ និង K-Dance Club សូមជូនពរដល់បងប្អូនប្រជាពលរដ្ឋខ្មែរធ្វើដំណើរទៅស្រុកកំណើតជួបជុំបងប្អូន សូមអោយមានសុខសុវត្ថិភាព និងសុវត្ថិភាពទាំងទៅទាំងមក» ។
តារាសម្តែងស្រីដែលកំពុងមានទីផ្សារខ្ពស់កញ្ញា សុវណ្ណាឡាង ក៏បានផ្ញើសារជូនពរផងដែរថា «នៅក្នុងឱកាសពិធីបុណ្យភ្ជុំបិណ្ឌប្រពៃណីជាតិខ្មែរយើងនេះ នាងខ្ញុំ សុវណ្ណាឡាង សូមគោរពជូន ពរដល់លោកអ្នក បងប្អូន ជនរួមជាតិខ្មែរទាំងអស់ សូមទទួលបានសេចក្តីសុខសាន្ត សប្បាយរីករាយក្នុងការជួបជុំក្រុមគ្រួសារ សូមធ្វើដំណើរទៅទីជិតឆ្ងាយសូមមានសុវត្ថិភាព» ។
ចំណែកកំពូលតារាចម្រៀងល្បីប្រចាំប្រទេសអ្នកនាង ឱក សុគន្ធកញ្ញា ក៏បានផ្ញើសារជូនពរ និងចែករំលែកបុណ្យ ដែលនាងនឹងក្រុមគ្រួសារបានធ្វើនាឱកាសបុណ្យភ្ជុំបិណ្ឌទៅដល់បងប្អូនជនរួមជាតិទាំងអស់នៅទូទាំងប្រទេសផងដែរ ។
ដោយឡែកកំពូលតារាចម្រៀងលោក ខេមរៈ សិរីមន្ត បានផ្ញើសារជូនពរដែរថា «ឱកាសបុណ្យភ្ជុំបិណ្ឌសូមបងប្អូនធ្វើដំណើរទីជិតទីឆ្ងាយបានសុខសប្បាយទាំងអស់គ្នា ។ សូមបងប្អូនប្រជា ពលរដ្ឋ និងពុទ្ធបរស័ទទូទាំងប្រទេសទទួលបាននូវបុណ្យកុសល និងជួបតែសេចក្តីសុខ សេច ក្តីចម្រើន ព្រមទាំងពរ ៥ប្រការ គឺអាយុ វណ្ណៈ សុខៈ ពលៈ និង បដិភាណ កុំបីឃ្លៀងឃ្លាតឡើយ» ។
តារាចម្រៀងអ្នកនាង សុគន្ធ នីសា ក៏បានផ្ញើសារជូនពរផងដែរថា «នាងខ្ញុំ សុគន្ធ នីសា សូមជូនពរពុកម៉ែបងប្អូនជនរួមជាតិខ្មែរ សូមអោយបានសុខសាន្ត សុភមង្គល សុខភាពល្អ និងរកទទួលទានមានបានគ្រប់ក្រុមគ្រួសារ ហើយអនុមោទនាកុសលផលបុណ្យទាំងអស់គ្នាណាបងប្អូន សូមសុវត្ថិភាពតាមដងផ្លូវតាមទីជិតទីឆ្ងាយ»។
តារាចម្រៀងប្រចាំផលិតកម្មថោនលោក ខេម បានបង្ហោះសារជូនពរតាមគណនេយ្យហ្វេសប៊ុករបស់ខ្លួនដែរថា «សូមសុខសប្បាយ ហើយពេលបងប្អូនត្រឡប់ទៅស្រុកកំណើតកុំភ្លេចត្រូវមានការប្រុងប្រយ័ត្នការបើកបរអោយបានខ្ពស់» ។
ចំណែកឯប្រធានសមាគមសិល្បៈករខ្មែរអ្នកនាង ចន ច័ន្ទលក្ខិណា ក៏បានឆ្លៀតឱកាសបុណ្យភ្ជុំបិណ្ឌនេះ បានជួបសិល្បករ សិល្បការិនី រៀមច្បងចំនួន ២៥រូប ដើម្បីទទួលការឧបត្ថម្ភពីសម្ដេច តេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ក្នុងឱកាសបុណ្យភ្ជុំ បិណ្ឌ ដោយក្នុងម្នាក់ៗ ទទួលបានថវិកា ៤០ម៉ឺនរៀល អង្ករ១បាវ មី១កេស និងត្រីខ ១យួរ តាមរយៈមូលនិធិសិល្បៈចាស់ជរា របស់សមាគមសិល្បករខ្មែរ ៕ (កែសម្រួល ៖ បុប្ផា)
ចែករំលែកព័តមាននេះ