ស្រុកសន្ទុក ៖ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានសង់ផ្ទះថ្មីចំនួន៣ខ្នងបន្ថែមជូនប្រជាពលរដ្ឋខ្វះខាតនិងចាស់ជរាចំនួន៣ គ្រួសាររស់ក្នុងភូមិត្បូងក្រពើ ឃុំកកោះស្រុកសន្ទុក ខេត្តកំពង់ធំ តាមរយៈលោក ជំទាវ ខៀវ ស៊ីណា ជា ចាន់តូ អនុប្រធានកិត្តិយសសាខាកាកបាទក្រហមកម្ពុជាខេត្តកំពង់ធំ។
ផ្ទះថ្មីដែលជាអំណោយដ៏ថ្លៃថ្លារបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នេះត្រូវបានលោក ជំទាវ ខៀវ ស៊ីណា ជា ចាន់តូអញ្ជើញទៅប្រកាសសាងសង់ជាជូនជាផ្លូវការប្រជាពលរដ្ឋកាលពីរសៀលថ្ងៃទី២៤ខែកញ្ញាឆ្នាំ២០១៩។
ប្រជាពលរដ្ឋខ្វះខាត និង ចាស់ជរាដែលទទួលបានផ្ទះថ្មីទាំង៣គ្រួសារនេះទី១គឺ លោកយាយ ទិត គា,ទី២ បងស្រី អិត អ៊ន និង គ្រួសារទី៣ គឺបងប្រុស ស្រី ម៉ឺន ហើយគ្រួសារទាំង៣គ្រួសារនេះគឺរស់នៅក្នុងភូមិត្បូងក្រពើ ឃុំកកោះដូចគ្នា។ ផ្ទះដែលសាងសង់ជូននេះគឺសង់ពីឈើប្រក់ស័ង្កសី មានបណ្ដោយ ៦ម៉ែត្រទទឹង៤ម៉ែត្រ ដែលមួយខ្នងមានតម្លៃ១ពាន់២រយដុល្លាអាមេរិក។
ក្នុងនាមសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន លោកជំទាវ ខៀវ ស៊ីណា បានបញ្ជាក់ថា៖ជាការពិតសម្ដចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត តែងតែយកចិត្តទុកដាក់និងគិតគូដល់សុខទុក្ខប្រជាពលរដ្ឋដែលជួបការលំបាកខ្វះខាត ជានិច្ច ពិសេស គ្រួសារជាស្ត្រីមេម៉ាយ ចាស់ជរា និង កុមារកំព្រា ។
ជាក់ស្ដែងដូចផ្ទះ៣ខ្នងដែលត្រូវសាងសង់ជូនប្រជាពលរដ្ឋនៅពេលនេះជាសក្ខីភាពស្រាប់ដែលបង្ហាញឲ្យឃើញយ៉ាងច្បាស់ថា គ្រប់ពេលវេលាសម្ដេចទាំង២គឺរស់នៅជាមួយសុខទុក្ខរបស់ជាពលរដ្ឋយើងគ្រប់កាលៈទេសៈ។ ដូចនេះបងប្អូនត្រូវតែរស់នៅក្នុងក្ដីសង្ឃឹងនិងត្រូវខិតខំតស៊ូជាបន្ត ទៀតដ៏រាបណានៅតែមានសម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិតប្រធានកាកបាទ ក្រហមកម្ពុជានោះ។ ហើយអ្វីដែលសំខាន់ចំពោះមុខនោះគឺត្រូវចេះថែរក្សាសុខភាព គឺរស់នៅឲ្យមានអនាម័យ ។ជាមួយនេះដែរក៏ត្រូវខិតខំបង្កបង្កើនផលនិងចិញ្ចឹមសត្វលើកផ្ទៃដីដែលមានឲ្យអស់លទ្ធភាព។
នៅក្នុងឱកាសនោះលោកជំទាវ បានឧបត្ថម្ភថវិកាមួយចំនួនដល់ប្រជាពលរដ្ឋទាំ៣គ្រួសារនិងចែកសារុងជូនដល់អ្នកភូមិផងដែរ។
សូមបញ្ជាក់ថា៖គិតចាប់ត្រឹមឆ្នាំ២០០៨មកដល់ពេលនេះតាមរយៈលោកជំទាវ ខៀវ ស៊ីណាសម្ដេចកិត្តិព្រឹទ្ធបណ្ឌិតបានជួយសាងសង់ផ្ទះជូនប្រជាពលរដ្ឋ ជាអ្នកក្រីក្រ ចាស់ជរា និង គ្រួសារស្ត្រីមេម៉ាយនៅក្នុងស្រុកសន្ទុកគឺមានចំនួន៣៣៦ខ្នងហើយ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ