ខេត្តសៀមរាប៖ សូមចូលរួមមរណទុក្ខផងចំពោះសពលោក មឿន គុយ ដែលបានលាចាកលោកនេះព្រោះតែមិនអាចស្រោចស្រង់ជីវិតបាន ។ អ្វីដែលកាន់តែអាណោចអាធ័មថែមទៀតនោះ គឺការស្លាប់របស់លោក មឿន…
ខេត្តសៀមរាប៖ សូមចូលរួមមរណទុក្ខផងចំពោះសពលោក មឿន គុយ ដែលបានលាចាកលោកនេះព្រោះតែមិនអាចស្រោចស្រង់ជីវិតបាន ។ អ្វីដែលកាន់តែអាណោចអាធ័មថែមទៀតនោះ គឺការស្លាប់របស់លោក មឿន គុយ បានបន្សល់ទុកនូវកូនប្រុស-ស្រីចំនួន៦នាក់ឲ្យនៅកំព្រា ។
សូមរំលឹក នៅក្នុងឧប្បត្តិហេតុផ្ទុះឆេះស្ថានីយហ្គាសកណ្តាលក្រុងសៀមរាបបានដក់ជាប់នូវទិដ្ឋភាពបុរសអ្នកបើករថយន្តដឹកហ្គាសត្រូវភ្លើងឆេះរលាកពេញខ្លួន ហើយដើរលើកដៃសំពះសុំឱ្យគេជួយជូនទៅមន្ទីរពេទ្យ ។ ពេលនេះ គាត់បានទទួលមរណភាពហើយនៅមន្ទីរពេទ្យខេត្តសុរិន្ទ នៃប្រទេសថៃ កាលពីរសៀលថ្ងៃទី២៣ ខែកញ្ញា ។
លោក ស៊ិន ចាន់ថុល អភិបាលរងស្រុកពួកបានប្រាប់ភ្នាក់ងារកោះសន្តិភាពតាមទូរស័ព្ទថា បុរសឈ្មោះ មឿន កុយ អាយុ៤៦ឆ្នាំ ជាអ្នកបើកបររថយន្តដឹកហ្គាស មានស្រុកកំណើតនៅស្រុកពួក ខេត្តសៀមរាប ដែលត្រូវភ្លើងផ្ទុះហ្គាសឆេះរលាកពេញខ្លួននោះ បានស្លាប់កាលពីវេលាម៉ោង៤និង២៥នាទីរសៀលថ្ងៃទី២៣ ខែកញ្ញា នៅមន្ទីរពេទ្យខេត្តសុរិន្ទ ប្រទេសថៃ ហើយក្រុមគ្រួសារបានបញ្ជូនសពមកធ្វើបុណ្យនៅឯស្រុកកំណើតរបស់ខ្លួន នាវេលាម៉ោងប្រមាណជិត៤រសៀលថ្ងៃទី២៤ ខែកញ្ញា ។ លោកបញ្ជាក់ទៀតថា នៅពេលដឹកសពមកដល់ផ្ទះវិញ ថ្នាក់ដឹកនាំនិងមន្ត្រីរាជការជុំវិញស្រុកនឹងជួយជ្រោមជ្រែងចូលរួមក្នុងពិធីបុណ្យសពនោះផងដែរ ។
គួររំឭកថា កាលពីវេលាម៉ោងប្រមាណ១និង១៥នាទីរសៀលថ្ងៃទី១៤ ខែសីហា ឆ្នាំ២០១៩កន្លងមកនេះ មានករណីអគ្គិភ័យមួយកើតឡើង ដោយសារការផ្ទុះធុងហ្គាសហើយឆេះនៅហាងបញ្ចូលហ្គាសរថយន្ត២៤ម៉ោងមួយកន្លែងជារបស់ឈ្មោះ ឈុក ឈុនលី ភេទប្រុស អាយុ៤៨ ឆ្នាំ មានទីលំនៅក្នុងភូមិគោកស្រុក ឃុំពួក ស្រុកពួក ខេត្តសៀមរាប ។ ហាងបញ្ចូលហ្គាសនេះ ស្ថិតនៅតាមផ្លូវលោកតាណឺយ ទល់មុខអតីតមន្ទីរពេទ្យនាគទេព ក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ហើយការផ្ទុះឆេះនេះបណ្តាលឱ្យមនុស្សប្រុសស្រីចំនួន១៤នាក់ ក្នុងនោះស្រី៤នាក់ រងរបួសធ្ងន់និងស្រាល ។
ប្រភពពីនគរបាលខេត្តឱ្យដឹងថា ដោយមានការយកចិត្តទុកដាក់និងសម្របសម្រួលពីលោក ទៀ សីហា អភិបាលខេត្ត ដែលជាជំហានដំបូង ក្រោយពីកើតហេតុ ជនរងគ្រោះទាំងអស់ត្រូវបានបញ្ជូនទៅព្យាបាលភ្លាមៗទាំងនៅមន្ទីរពេទ្យរដ្ឋ និងពេទ្យឯកជន រួចបញ្ជូនបន្តទៅព្យាបាលនៅប្រទេសថៃ រួមមាន ៖
១-ឈ្មោះ Abigail Alexander ភេទស្រីអាយុ១៨ឆ្នាំ សញ្ជាតិអាមេរិក ជាគ្រូបង្រៀនភាសាអង់គ្លេស នៅសាលា IQ ហើយបច្ចុប្បន្នកំពុងព្យាបាលនៅរាជធានីភ្នំពេញ ២-ឈ្មោះ Zoe Eleftheriou ភេទស្រី អាយុ២២ឆ្នាំ សញ្ជាតិអង់គ្លេស ជាគ្រូបង្រៀនភាសាអង់គ្លេសនៅសាលា IQ កំពុងព្យាបាលនៅប្រទេសថៃ
៣-ឈ្មោះ កែវ ប៉ុង ភេទប្រុស អាយុ៤៤ ឆ្នាំ នៅភូមិបន្ទាយចាស់ សង្កាត់ស្លក្រាម ក្រុងសៀមរាប ព្យាបាលនៅមន្ទីរពេទ្យបង្អែកខេត្តសៀមរាប ។
៤-ឈ្មោះ ឈាន ខុន ភេទប្រុស អាយុ២០ឆ្នាំ ជាជាងគំនូរ នៅភូមិបន្ទាយចាស់ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ៥-ឈ្មោះ យិន ខាន់ ភេទប្រុស អាយុ២៣ ឆ្នាំ ជាមេជាងគំនូរ នៅភូមិបន្ទាយចាស់ ព្យាបាលនៅមន្ទីរពេទ្យសង់តេ ក្នុងក្រុងសៀមរាប ៦-ឈ្មោះ ទ្រុត ម៉ៃ ភេទប្រុស អាយុ២១ឆ្នាំ ជាជាងគំនូរ នៅភូមិបន្ទាយចាស់ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ៧-ឈ្មោះ សែ សីគឹមសាន ភេទប្រុស អាយុ២១ឆ្នាំ ជាជាងគំនូរ នៅភូមិបន្ទាយចាស់ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ៨-ឈ្មោះ ហួត រ័ត្នមុនី ភេទប្រុស អាយុ៦៦ឆ្នាំ សមាជិកភូមិបន្ទាយចាស់ សម្រាកព្យាបាលនៅផ្ទះ
៩-ឈ្មោះ ហូត មុន្ទីពិសាខ ភេទប្រុស អាយុ៣៥ឆ្នាំ មន្ត្រីនគរបាលអន្តរាគមន៍ ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ
១០-ឈ្មោះ ជើងខាវ ដាង (ហៃ ខាវជាង)ភេទស្រី អាយុ៣២ឆ្នាំ បុគ្គលិកលក់ហ្គាស ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ១១-ឈ្មោះ មឿន គុយ ភេទប្រុស អាយុ៤១ឆ្នាំ អ្នកបើករថយន្តដឹកហ្គាស ទៅព្យាបាលនៅមន្ទីរពេទ្យខេត្តសុរិន្ទ ប្រទេសថៃ ១២-ឈ្មោះ តែម លាងហេង ភេទប្រុស អាយុ២៤ឆ្នាំ ជាមន្ត្រីរាជការ នៅភូមិជ្រាវ សង្កាត់ជ្រាវ ក្រុងសៀមរាប ព្យាបាលនៅមន្ទីរពេទ្យនាគទេព ក្នុងក្រុងសៀមរាប
១៣-ឈ្មោះ ឡុង រិន ភេទប្រុស អាយុ៣៦ឆ្នាំ មុខរបរលក់ស៊ុប នៅភូមិដក.ព សង្កាត់ស្លក្រាម ក្រុងសៀមរាប ព្យាបាលនៅមន្ទីរពេទ្យនាគទេព ក្នុងក្រុងសៀមរាប និង១៤-គឺស្ត្រីម្នាក់ រងរបួសស្រាល មិនបានទៅព្យាបាលនៅមន្ទីរពេទ្យទេ ។
សោកនាដកម្មដែលបានកើតឡើងកាលពីជាង១ខែមុននេះ ធ្វើឱ្យមានការរន្ធត់ជាពន់ពេកចំពោះអ្នករងគ្រោះដែលមកដល់ពេលនេះស្លាប់២នាក់ហើយ ។ មហាជនបានចោទសួរថា តើស្ថានីយប្រេងឥន្ធនៈ និងស្ថានីយហ្គាសដែលមានស្អេកស្កះនាបច្ចុប្បន្ននៅតាមដងផ្លូវនានា មានការធានាបាននូវសុវត្ថិភាពកម្រិតណាទៅ ។ បញ្ហានេះអាជ្ញាធរគប្បីកាត់តម្រឹមជាអតិបរមា ព្រោះកន្លែងចាក់ប្រេងខ្លះមិនមានស្តង់ដារទេ រាប់ទាំងការលក់សាំងផងដែរ ។ (សម្រួលដោយ៖ ស្រីណា)
ចែករំលែកព័តមាននេះ