ខេត្តកំពង់ចាម ៖ វត្តតាយ៉ើត ស្ថិតក្នុងនៅភូមិត្រពាំងស្វាយ ឃុំត្រពាំងព្រះ ស្រុកព្រៃឈរ ក្នុងតំបន់ជនបទដាច់ស្រយាល ហើយក៏ជាកំសត់ និងល្បីមានព្រះសង្ឃចំនួនតែ២អង្គគត់គង់នៅ សូម្បីតែចង្ហាន់ក៏ខ្វះខាតថែមទៀត កម្រឃើញអ្នកមានទ្រព្យធន់សំបូរ ចូលមកធ្វើបុណ្យនៅទីនេះណាស់។
បើតាមអ្នកស្រី យូ សាវឿន អាយុ៤២ឆ្នាំ រស់នៅមិនឆ្ងាយពីវត្តបានប្រាប់ឲ្យដឹងថា ចាប់តាំងពីក្រោយឆ្នាំ១៩៧៩ មក វត្តតាយ៉ើតនេះ ក្នុងគ្រាដែលកសាងដំបូងៗមិនមានអ្វីគួរឲ្យចាប់អារម្មណ៍នោះទេ ហើយមានព្រះសង្ឃចំនួន២អង្គពិតមែន។ មួយវិញទៀតប្រជាជននៅក្នុងភូមិភាគច្រើនមានជីវភាពខ្វះខាត ហេតុដូច្នេះហើយការកសាងវត្តបានដំណើរការទៅមុខដោយយឺតយាវ ។
អ្នកស្រីបានប្រាប់បន្តថា ក្នុងពេលមានរដូវបុណ្យទានម្តងៗ នៅវត្តផ្សេងក្នុងស្រុកព្រៃឈរ ដែលគាត់ធ្លាប់បានទៅនោះ ១វេនទទួលបានបច្ច័យប្រមាណ៣ទៅ៤លានរៀល ចំណែកវត្តក្នុងភូមិវិញបុណ្យ ១វេនរាប់ទៅបច្ច័យបានជាង៣០ម៉ឺនរៀលតែប៉ុណ្ណោះ។ លុះមកដល់សព្វថ្ងៃ ប្រជាជនមានជីវភាពរាងគ្រាន់បើបន្តិច ហើយក្នុង១ឆ្នាំទៅ២ឆ្នាំរូបគាត់បានចូលស៊ីម៉ងតិ៍១តោន សម្រាប់កសាងព្រះវិហារ ប្រសិនណា បើពឹងលើប្រជាជននៅក្នុងភូមិនោះ ការកសាងមិនបានលឿនទៅមុខឡើយ ដែលទាមទារឲ្យមានសប្បុរសជនជិតឆ្ងាយចូលរួមបរិច្ចាគធនធានផងដែរ។
អ្នកស្រីបន្តទៀតថា មួយវិញទៀតក៏គាត់ចង់ឲ្យមានការបង្កើតសាលារៀនៅក្នុងវត្ត ដើម្បីងាយឲ្យក្មេងៗបានរៀនសូត្ររាល់ថ្ងៃ កូនគាត់និងក្មេងផ្សេងទៀតក្នុងភូមិត្រូវបានដើរ ឬជិះកង់ទៅរៀននៅសាលាផ្សេងឆ្ងាយពីភូមិ ។
ចំណែកលោកតាអាចារ្យ ខែក យ៉ាន វ័យ៧៧ឆ្នាំ មានប្រសាសន៍ថា វត្តតាយ៉ើត ត្រូវបានកសាងក្នុងសម័យសង្គមរាស្ត្រនិយម កាលពីដំបូងមានតែកុដិឈើ ស្ថិតនៅលើផ្ទៃដីជាង៥ហិកតា ដោយឆ្លងកាត់ភ្ល៉ើងសង្គ្រាមនោះ សមិទ្ធផលក្នុងវត្តត្រូវបំផ្លាញទាំងស្រុងដោយរបប៣ឆ្នាំ៨ខែនិង២០ថ្ងៃ លុះក្រោយថ្ងៃជ័យជំនះ៧មករា ឆ្នាំ១៩៧៩ ត្រូវបានពុទ្ធបរិស័ទចំណុះជើងវត្តយកឈើចាស់ៗមកកសាងចេញជាសាឡុំ១ កកើតវត្តឡើងវិញ។
លោកតាអាចារ្យបន្តថា ចំពោះព្រះចៅអធិការវត្តដំបូងព្រះនាមលោកតានេត និងបន្តបន្ទាប់មក ព្រះនាម គួន គឹន, មុត ទូច និងអ៊ា សុខន ហើយសព្វថ្ងៃចៅអធិការវត្តព្រះនាម ជុំ ស៊ីណេត បានគ្រប់គ្រង ទើបបាន៣ព្រះវស្សាប៉ុណ្ណោះ ។ ដោយព្រះអង្គមានចរិកស្លូតបូត ហើយបានប្រឹងប្រែងកសាងសមិទ្ធផលបន្ត ក្នុងនោះមាន ព្រះវិហារដែលបានកសាងរយៈពេល៧ឆ្នាំមកហើយមិនទាន់រួច គឺកសាងបានប្រមាណ៥០ភាគរយ នៅខ្វះបច្ច័យសរុបប្រមាណ៦៥.៥០០ដុល្លារទៀត សម្រាប់បង្ហើយព្រះវិហារ ដូច្នេះសូមបងប្អូនពុទ្ធបរិស័ទជិតឆ្ងាយទាំងក្នុង និងក្រៅប្រទេស សូមចូលបុណ្យតាមសទ្ធារជ្រះថ្លា។
ដោយឡែកក្នុងឆ្នាំ២០០១ សម្តេចអគ្គមហាពញាចក្រ ហេង សំរិន និងលោកជំទាវក៏បានផ្តល់អំណោយនូវឧបដ្ឋានសាលាម១ខ្នង កន្លងមក វត្តនេះមានព្រះសង្ឃចំនួន២អង្គពិតមែន ហើយរហូតមកដល់សព្វថ្ងៃមានចំនួន៧អង្គ ក្នុងនោះ២អង្គបាននិមន្តទៅរៀនព្រះធម៌ នៅសល់តែ៥អង្គប៉ុណ្ណោះ សម្រាប់ចង្ហាន់វិញក៏មានការខ្វះខាត ដោយសារអ្នកភូមិមានជីវភាពខ្វះខាត៕ (កែសម្រួលដោយ ៖ បុប្ផា)
ចែករំលែកព័តមាននេះ