ខេត្តត្បូងឃ្មុំ ៖ សេចក្តីរាយការណ៍បឋមបានឲ្យដឹងថា ជម្លោះពាក្យសំដីគ្នារវាងប្អូន និងបងស្រីបង្កើតបានក្លាយទៅជាអំពើហិង្សាដោយប្អូនប្រុសបានយកកាំបិតចុងស្រួចមកចាក់ត្រូវចំចុងដង្ហើមបងស្រី១កាំបិត បណ្តាលឲ្យរងរបួសធ្ងន់ធ្ងរ ។ ហេតុការណ៍នេះកើតឡើងនៅវេលាម៉ោង៣និង៣០នាទីរសៀល ថ្ងៃទី២៣ កញ្ញានេះ ស្ថិតនៅភូមិដូងព្រះ ឃុំអញ្ចើម ស្រុកត្បូងឃ្មុំ ហើយបងស្រីបានស្លាប់តាមផ្លូវ ក្នុងពេលបញ្ជូនទៅសង្គ្រោះនៅមន្ទីរពេទ្យ បុរសជាប្អូនក្លាយជាឃាតករបានរត់គេចខ្លួនបាត់សមត្ថកិច្ចកំពុងតាមប្រមាញ់ចាប់ខ្លួន ។
សេចក្តីរាយការណ៍បន្តនគរបាលមូលដ្ឋានប្រាប់ថា ស្ត្រីខាងលើមានឈ្មោះ ម៉ន ធី អាយុ៤១ឆ្នាំ បាននាំគ្នាផឹកស្រាសនៅនឹងផ្ទះរបស់ខ្លួន ដោយមានប្អូនប្រុសឈ្មោះ ម៉ន យុំ អាយុ៣៥ឆ្នាំ បានផឹកជាមួយគ្នា ក្រោយពីស្រវឹងក៏បងស្រីបានឈ្លោះប្រកែកជាមួយនឹងប្អូន ហើយបានជេរប្រទេចមកលើប្អូនប្រុសនូវពាក្យអសុរស ហើយប្អូនខឹងក៏យកកូនកាំបិតចុងស្រួចមកចាក់ត្រូវចុងដង្ហើមបងស្រី១កាំបិត ហើយបានរត់គេចខ្លួនបាត់ ។
នគរបាលរូបនេះបន្តថា ភ្លាមៗនោះស្ត្រីរងគ្រោះមិនបានបញ្ជូនមកកាន់មន្ទីរពេទ្យទេ បានឡើងទៅដេកសង្ងំនៅលើផ្ទះ លុះមកដល់ល្ងាចស្របពេលដែលប្តីបានត្រឡប់មកពីស្រែវិញក៏ឮសូរប្រពន្ធរបស់ខ្លួនថ្ងូរចុកៗ ហើយបានយកដៃទៅបើកមើលឃើញមានស្នាមចាក់មួយកាំបិតក៏ប្រញាប់ដឹកតាមម៉ូតូក្នុងបំណងមកកាន់មន្ទីរពេទ្យបង្អែកស្រុកត្បូងឃ្មុំ តែមិនទាន់ដល់ពេទ្យផងបានស្លាប់តាមផ្លូវ ហើយប្តីបានដឹកត្រឡប់មកផ្ទះវិញ ។
បន្ទាប់មកនគរបាលមូលដ្ឋានបានរាយការណ៍មករូបលោកក៏បានដឹកនាំកម្លាំងនគរបាលបច្ចេកទេស ចុះទៅកាន់ផ្ទះកើតហេតុជាបន្ទាន់ ដើម្បីទៅពិនិត្យកោសល្យវិច្ច័យសពក្រោមបញ្ជារបស់លោកអធិការនគរបាលស្រុក និងលោកស្នងការរងនគរបាលខេត្ត រួចបានប្រគល់ជូនសាច់ញាតិ ដើម្បីរៀបចំធ្វើបុណ្យតាមប្រពៃណី ។
រហូតមកដល់ព្រឹកថ្ងៃទី២៤ កញ្ញា កម្លាំងសមត្ថកិច្ចចុះទៅកាន់កន្លែងកើតហេតុម្តងទៀត ដើម្បីស្រាវជ្រាវតាមរកឃាតករជាប្អូនមិនបាននៅមូលដ្ឋាននោះទេ គឺរត់គេចខ្លួនបាត់ ហើយជាមនុស្សញៀនស្រាទៀត ។ ដោយតាមបញ្ជារបស់លោកស្នងការនគរបាលខេត្តឲ្យកម្លាំងតាមប្រមាញ់ចាប់ខ្លួនឃាតករឲ្យបាន ដើម្បីនាំមកផ្តន្ទាទោសតាមច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ