ខេត្តកណ្តាល ៖ បុរសម្នាក់បែកកង់រថយន្ត លុះឃើញរថយន្តរបស់ក្រុមជនសង្ស័យបើកឆ្លងកាត់ ក៏បក់ដៃហៅក្នុងគោលបំណងសុំខ្ចីសោ និងដែកដូយ ដើម្បីដូរកង់ តែចៃដន្យកង់សាគួនោះខូចទៀត ទើបបុរសរងគ្រោះបានពឹងក្រុមជនសង្ស័យឱ្យជួយយកកង់ទៅសប់នៅក្បែរនោះ និងឱ្យទូរស័ព្ទមួយទៀតដើម្បីទុកចុចបំភ្លឺផ្លូវ…
ខេត្តកណ្តាល ៖ បុរសម្នាក់បែកកង់រថយន្ត លុះឃើញរថយន្តរបស់ក្រុមជនសង្ស័យបើកឆ្លងកាត់ ក៏បក់ដៃហៅក្នុងគោលបំណងសុំខ្ចីសោ និងដែកដូយ ដើម្បីដូរកង់ តែចៃដន្យកង់សាគួនោះខូចទៀត ទើបបុរសរងគ្រោះបានពឹងក្រុមជនសង្ស័យឱ្យជួយយកកង់ទៅសប់នៅក្បែរនោះ និងឱ្យទូរស័ព្ទមួយទៀតដើម្បីទុកចុចបំភ្លឺផ្លូវ ស្រាប់តែក្រុមជនសង្ស័យយកទូរស័ព្ទនោះរួចឡើងជិះរថយន្តគេចបាត់ ។ បន្ទាប់មកបុរសរងគ្រោះក៏រាយការណ៍ប្រាប់សមត្ថកិច្ចពីភិនភាគរថយន្តរបស់ក្រុមជនសង្ស័យ ទើបឃាត់ខ្លួនជនសង្ស័យបានទាំង៣នាក់តែម្តង ។
ករណីឃាត់ខ្លួនក្រុមជនសង្ស័យទាំង៣នាក់ខាងលើនេះធ្វើឡើងកាលពីវេលាម៉ោង១និង៤០នាទីថ្ងៃទី២៣ ខែកញ្ញា ឆ្នាំ២០១៩ នៅចំណុចផ្លូវជាតិលេខ៤ ក្នុងភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល ។
តាមប្រភពពីសមត្ថកិច្ចស្រុកអង្គស្នួលបានឱ្យដឹងថា ជនរងគ្រោះឈ្មោះ ហូយ តាក់ ភេទប្រុស អាយុ២៧ឆ្នាំ មុខរបរបើកបររថយន្ត នៅភូមិតាងូវ ឃុំទឹកល្អក់ ស្រុកគងពិសី ខេត្តកំពង់ស្ពឺ ។ ចំណែកជនសង្ស័យទាំង៣នាក់ខាងលើ រួមមាន ១-ឈ្មោះប៉ុល បូរិន ភេទប្រុស អាយុ៣៤ឆ្នាំ មុខរបរមិនពិតប្រាកដ ស្នាក់នៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល ២-ឈ្មោះ វ៉ុន គារ៉ាន ភេទប្រុស អាយុ១៧ឆ្នាំ មុខរបរមិនពិត ស្នាក់នៅភូមិព្រៃមាន ឃុំព្រៃពួច ស្រុកអង្គស្នួល ខេត្តកណ្តាល និង៣-ឈ្មោះ ឈាង ម៉េងហុក ភេទប្រុស អាយុ៣៥ឆ្នាំ មុខរបរជាងពិតាន រស់នៅភូមិត្បូងអង្គ ឃុំព្រៃញាតិ ស្រុកគងពិសី ខេត្តកំពង់ស្ពឺ ។
តាមប្រភពពីសមត្ថកិច្ចស្រុកអង្គស្នួលបានឱ្យដឹងបន្តថា មុនពេលកើតហេតុ ជនរងគ្រោះបានបើកបររថយន្តមួយគ្រឿងម៉ាកសាំយ៉ុង លុះពេលធ្វើដំណើរមកដល់ចំណុចភូមិកែវឧត្តម ឃុំត្រពាំងគង ស្រុកសំរោងទង ស្រាប់តែរថយន្តបានបែកកង់ក្រោយ ហើយជនរងគ្រោះគ្មានសោ និងគ្មានដែកដូយសម្រាប់ដូរកង់នោះទេ ។
តាមប្រភពដដែលបានបន្តទៀតថា ភ្លាមៗនោះជនរងគ្រោះក៏ឃើញក្រុមជនសង្ស័យចំនួន៣នាក់ជិះរថយន្តមួយគ្រឿង ម៉ាកហុងដាមីនី ពណ៌ស ពាក់ផ្លាកលេខ ភ្នំពេញ ២AF-៨៣០៥ បើកទៅហួសបន្តិច រួចបកក្រោយមកវិញ ពេលនោះជនរងគ្រោះក៏បានបក់ដៃក្នុងគោលបំណងសុំខ្ចីសោ និងដែកដូយ ដើម្បីដូរកង់រថយន្ត ។ ខណៈកំពុងដោះដូរនោះ ចៃដន្យកង់សាគួរខូចទៀត ទើបជនរងគ្រោះក៏ពឹងឱ្យក្រុមជនសង្ស័យយកកង់ទៅសប់នៅក្បែរនោះ ដោយជនរងគ្រោះបានឱ្យទូរស័ព្ទមួយគ្រឿងទៅជនសង្ស័យឈ្មោះ វ៉ុន គារ៉ាន ទុកចុចបំភ្លឺផ្លូវដើម្បីទៅសប់កង់ ពេលជនសង្ស័យបានទូរស័ព្ទរួចក៏រត់ឡើងជិះរថយន្តគេចបាត់តែម្តង ។
ក្រោយមកជនរងគ្រោះបានទូរស័ព្ទទៅវិទ្យុមួយប្រាប់ពីភិនភាគរថយន្តរបស់ក្រុមជនសង្ស័យ ដើម្បីឱ្យសមត្ថកិច្ចជួយស្ទាក់ឃាត់ លុះពេលសមត្ថកិច្ចស្រុកអង្គស្នួលកំពុងល្បាត ក៏ប្រទះឃើញរថយន្តមួយគ្រឿងដូចភិនភាគខាងលើ ទើបជិះដេញតាមទាន់នៅចំណុចកើតហេតុខាងលើ ហើយឆែកឆេររកឃើញទូរស័ព្ទរបស់ជនរងគ្រោះ ព្រមទាំងឃាត់ខ្លួនក្រុមជនសង្ស័យទាំង៣នាក់។
ក្រោយពេលឃាត់ខ្លួន ជនសង្ស័យឈ្មោះ វ៉ុន គារ៉ាន បានសារភាពថា ខ្លួនពិតជាបានយកទូរស័ព្ទពីជនរងគ្រោះរត់ឡើងរថយន្ត ហើយប្រគល់ទូរស័ព្ទនោះទៅឱ្យមិត្តភក្តិរបស់ខ្លួនប្រាកដមែន ហើយខ្លួនធ្លាប់ធ្វើសកម្មភាពបែបនេះច្រើនដងរួចមកហើយ ដើម្បីយកលុយទិញថ្នាំញៀនមកប្រើប្រាស់ ។
បច្ចុប្បន្ន ជនសង្ស័យទាំង៣នាក់ ត្រូវបានបញ្ជូនទៅស្នងការដ្ឋាននគរបាល និងកសាងសំណុំរឿង ដើម្បីចាត់ការតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ