ខេត្តកំពង់ធំ ៖ សត្វព្រៃចម្រុះជាង២០០គីឡូក្រាម ដឹកតាមរថយន្ដក្រុងមួយគ្រឿងរបស់ក្រុមហ៊ុនបូព៌៌ាអាស៊ី បានត្រូវសមត្ថកិច្ចខេត្ត បង្ក្រាបពាក់ព័ន្ធនឹងការដឹកជញ្ជូនសត្វព្រៃដោយខុសច្បាប់ កាលពីព្រឹកថ្ងៃទី២២ ខែកញ្ញា នៅភូមិស្លាកក្រាញ់ ឃុំសំព្រោជ ស្រុកស្ទោង ។
ប្រតិបត្តិការរបស់សមត្ថកិច្ចនាព្រឹកថ្ងៃនោះស្ថិតក្រោមការសម្របសម្រួលនីតិវិធីពីលោក អុិត សុធា ព្រះរាជអាជ្ញាអមសាលាដំបូងខេត្ត និងមានការចូលរួមពីកម្លាំងកងរាជអាវុធហត្ថជាច្រើននាក់ ដឹកនាំដោយលោកវរសេនីយ៍ទោ ឃុន ប៊ុនហូ មេបញ្ជាការរងកងរាជអាវុធហត្ថខេត្ត ។
នៅក្នុងការបង្ក្រាបនេះ សមត្ថកិច្ចបានឃាត់ខ្លួនអ្នកបើករថយន្តឈ្មោះ ងន វុនរ៉ា អាយុ២៧ឆ្នាំ រស់នៅភូមិប្រមោយ ឃុំប្រមោយ ស្រុកវាលវែង ខេត្តពោធិ៍សាត់ រួមជាមួយរថយន្តក្រុងមួយគ្រឿងម៉ាក KIA ពណ៌ស្លាទុំលាយស ពាក់ផ្លាកលេខ ភ្នំពេញ ៣D-២៤១៧ ជារបស់ក្រុមហ៊ុនបូព៌៌ាអាស៊ី ដឹកអ្នកដំណើរ ។
ក្នុងប្រតិបត្តិការនេះដែរ សមត្ថកិច្ចដកហូតបានអណ្តើកសង្កល់២៨ក្បាលស្មើនឹង១៧៩គីឡូក្រាម ពស់ចាន់តាមម៨២ក្បាលស្មើនឹង៤៥គីឡូក្រាម និងទន្សង៤ក្បាលស្មើនឹង៨គីឡូក្រាម។ វត្ថុតាង ត្រូវបានសមត្ថកិច្ចប្រគល់ជូននាយសង្កាត់រដ្ឋបាលព្រៃឈើស្ទោង ដើម្បីចាត់ការបន្តទៅតាមនីតិវិធី ៕
ចែករំលែកព័តមាននេះ