រាជធានីភ្នំពេញ ៖ ដោយសារតែបញ្ហាជីវភាពនិងអាកាសធាតុរាំងស្ងួត តម្រួវឱ្យពួកគាត់បានចាកចេញ
ពីស្រុកកំណើតមកភ្នំពេញ ធ្វើជាកម្មករស៊ីឈ្មួលអូសរទេះបន្លែនៅផ្សារនាគមាស ដោយគ្មានទីជម្រកពិតប្រាកដទេ ស្នាក់នៅតែតាមសំយាបផ្ទះនិងអគារម៉ុងឌីយ៉ាល់ដែលទុកចោល ដើម្បីខិតខំរកលុយសន្សំប្រាក់ ទុកយកទៅចិញ្ចឹមប្រពន្ធកូន ឪពុកម្តាយចាស់ជរា ដែលកំពុងតែទន្ទឹងរង់ចាំនៅឯស្រុកកំណើត ។ នេះជាការរៀបរាប់ពីខ្សែជីវីតពិតរបស់កម្មករអូសរទេះបន្លែ និងផ្លែឈើជាច្រើននាក់ នៅផ្សារនាគមាសនិងផ្សារដើមគរ ដែលកំពុងតែស៊ីឈ្មួលទាំងយប់ទាំងថ្ងៃ សូម្បីតែភ្លៀងក៏មិនហ៊ានឈប់សម្រាកដែរដើម្បីប្រាក់។
ជួបជាមួយកម្មករម្នាក់ឈ្មោះ វ៉ាន់ វ៉ុន ភេទប្រុស អាយុ៤០ឆ្នាំ មានលំនៅភូមិម៉ឺនពួក ឃុំជ្រៃ ស្រុកស្វាយ
អន្ទរ ខេត្តព្រៃវែង បានឱ្យដឹងថា ដោយសារតែនៅស្រុកគ្មានភ្លៀងអត់ទឹកធ្វើស្រែ គាត់និងប្អូនប្រុសឈ្មោះ វ៉ាន់ ចាន់ដាអាយុ៣២ឆ្នាំ បានធ្វើដំណើរចាកចោលស្រុកកំណើររយៈពេលប្រមាណ២ខែ មកធ្វើជាកម្មករអូសរទេះបន្លែនិងផ្លែឈើនៅភ្នំពេញនេះ ដើម្បីរកប្រាក់ផ្គត់ផ្គង់ជីវភាពគ្រួសារចិញ្ចឹមប្រពន្ធកូន និងឪពុកម្តាយចាស់ជរា ។ គាត់ថាមិនចង់ទៅក្រៅស្រុកទេ នៅក្នុងស្រុកងាយស្រួលទៅផ្ទះ ។
លោក វ៉ាន់ វ៉ុន បានត្អួញត្អែរថា ការប្រកបមុខរបរធ្វើជាកម្មករនេះ មានការលំបាកណាស់ រកមិនស្រូវបាននោះទេ ដោយឥឡូវនេះមានអ្នកស្រុកជាច្រើន បាននាំគ្នាមកធ្វើជាកម្មករអូសរទេះបន្លែនិងផ្លែឈើនេះ ។ ជារៀងរាល់ថ្ងៃ គាត់បានរកស៊ីស្ទើរតែគ្មានថ្ងៃសម្រាកសូម្បីតែភ្លៀងក៏មិនសម្រាកដែរ ។
គាត់ថាជាទូទៅក្រោកពីម៉ោងប្រមាណ១ទៅ២យប់ ដើម្បីរកម៉ូយរហូតម៉ោងប្រមាណ៦ទៅ៧ព្រឹកឈប់សម្រាកហូបបាយ ហើយម៉ោងប្រមាណ១០ព្រឹក ក៏បានបន្តទៀត រហូតដល់ម៉ោងប្រមាណ៥រសៀល ជួនកាលមិនហ៊ានសម្រាកនោះទេ ព្រោះខ្លាចម៉ូយគេខឹង គេរកមិនឃើញ ឬយឺតយ៉ាវ ក្នុងការចល័តបន្លែ ។ នៅក្នុងការអូសរទេះម្តងៗបានប្រមាណ២ទៅ៣ពាន់រៀលទៅតាមជិតឬឆ្ងាយ ។
កម្មកររូបនោះក៏បានបន្តទៀតថា កន្លងមក នៅក្នុងមួយថ្ងៃ រកបានប្រមាណ៥ទៅ៦ម៉ឺនរៀល តែឥឡូវមានកម្មករច្រើន ដោយផាត់ថ្លៃបាយ ថ្លៃរទេះ ជួលគេ២ពាន់រៀលក្នុងមួយថ្ងៃ និងថ្លៃបង្គន់ ងូតទឹកជាដើម នៅសល់តែប្រមាណ២ទៅ៣ម៉ឺនរៀលតែប៉ុណ្ណោះអត់មានឈ្មួលផ្ទះទេ ។ កម្មកររូបនោះបានឱ្យដឹងទៀតថា គាត់មករកស៊ីនេះ គ្មានផ្ទះសម្បែងស្នាក់នៅទេ ដេកតែតាមសំយាបផ្ទះនិងក្រោមអគាររបស់មជ្ឈមណ្ឌលម៉ុងឌីយ៉ាល់ដែលស្ងប់ស្ងាត់ ។
គាត់ថា ងូតទឹក១០០០រៀល, បត់ជើង៥០០រៀល និងបោកខោអាវ១.៥០០រៀល ។ បើចំណាយប្រាក់ជួលផ្ទះគ្មានលទ្ធភាពទេ គឺរកអោយតែថ្លៃផ្ទះ ពេលនេះខំសន្សំហើយ រយៈពេលប្រមាណកន្លះខែឬ១ខែ ទៅស្រុកម្តង សល់ប្រាក់ប្រមាណ៥០ទៅ៦០ម៉ឺនរៀលដែរយកទៅផ្ទះ ។ ឈ្មោះភៀន ភា អាយុ៤៤ឆ្នាំ ដែលជាកម្មករដូចគ្នា មានលំនៅភូមិក្រាំងចំបក់ ឃុំពានរោង ស្រុកស្វាយអន្ទរ ខេត្តព្រៃវែង បានឱ្យដឹងដូចគ្នាដែរ ។
លោក ភៀន ភា បានឱ្យដឹងថា គាត់មានដីស្រែ២ហិកតាធ្វើស្រែមិនបាននោះទេ ដោយសារតែអត់ភ្លៀង ។ នៅឆ្នាំកន្លងមកអត់ភ្លៀង ស្រូវងាប់អស់ហើយឆ្នាំនេះមិនទាន់មានទឹកគ្រប់គ្រាន់នៅឡើយ ។ ដោយសាតែអាកាសធាតុរាំងស្ងួត អ្នកភូមិរបស់គាត់ប្រមាណ១០នាក់ បានចាកចោលស្រុកកំណើត បោះបង់ដីស្រែនាំគ្នាមកធ្វើជាកម្មករ អូសរទេះបន្លែនិងផ្លែឈើនៅផ្សារដើមគរនិងនាគមាស ដេកតាមសំយ៉ាបផ្ទះគេសន្សំប្រាក់ដើម្បីជួយសម្រួលដល់ជីវភាពគ្រួសារ ។
គួរបញ្ជាក់ថា ផ្សារនាគមាស និងផ្សារដើមគរ ស្ថិតនៅក្នុងសង្កាត់ផ្សារដើមគរខណ្ឌទួកគោក រាជធានីភ្នំពេញ ជាទីផ្សារបន្លែនិងផ្លែឈើយ៉ាងធំដែលនាំចូលពីប្រទេសថៃនិងវៀតណាមព្រមទាំងតំបន់នានាក្នុងប្រទស ហើយបានចែកចាយទៅតាមទីផ្សារនានានៅក្នុងរាជធានីភ្នំពេញនិងតាមបណ្តាខេត្ត នៅទូទាំងរាជាណាចក្រកម្ពុជា ៕ (សម្រួលដោយ៖ ស្រីណា)
ចែករំលែកព័តមាននេះ