ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា ភ្លៀវធ្លាក់១មេធំ បានធ្វើឱ្យផ្ទះប្រជាពលរដ្ឋជាច្រើនខ្នងនៅក្នុងស្រុកសាលាក្រៅ ត្រូវបានទឹកហូរចូល និងលិចដល់ពាក់កណ្តាលសសរខាងក្រោមផ្ទះ កាលពីរសៀលថ្ងៃទី២២ ខែកញ្ញា ឆ្នាំ២០១៩…
ខេត្តប៉ៃលិន ៖ បើតាមសេចក្តីរាយការណ៍បឋមបានឱ្យដឹងថា ភ្លៀវធ្លាក់១មេធំ បានធ្វើឱ្យផ្ទះប្រជាពលរដ្ឋជាច្រើនខ្នងនៅក្នុងស្រុកសាលាក្រៅ ត្រូវបានទឹកហូរចូល និងលិចដល់ពាក់កណ្តាលសសរខាងក្រោមផ្ទះ កាលពីរសៀលថ្ងៃទី២២ ខែកញ្ញា ឆ្នាំ២០១៩ ហើយត្រូវបានលោកអភិបាលខេត្តប៉ៃលិន ដឹកនាំកម្លាំងក្រោមឱវាទចុះពិនិត្យមើលស្ថានភាពជំនន់ ដោយសារទឹកភ្លៀងជន់លិចនៅចំណុចផ្លូវជាតិលេខ៥៩ និងផ្លូវក្រាលក្រួសក្រហម ឆ្ពោះទៅផ្សារឃែរ ។
សេចក្តីរាយការណ៍បន្តថា អាជ្ញាធរបានអន្តរាគមន៍ជួយសង្គ្រោះប្រជាពលរដ្ឋដែលទទួលរងផលប៉ះពាល់នៅចំណុចផ្លូវជាតិលេខ៥៩ ចាប់ពីរង្វង់មូលស្រុកសាលាក្រៅ ដល់ផ្សារសាលាក្រៅ ស្ថិតក្នុងភូមិបឹងត្រកួន ឃុំអូរអណ្ដូង ស្រុកសាលាក្រៅ ខេត្តប៉ៃលិន ដែលស្ថានភាពទឹកមានការជន់ឡើងខ្លាំង រហូតហូរកាត់ផ្លូវថ្នល់ និងបណ្តាលឲ្យលិចផ្ទះប្រជាពលរដ្ឋមួយចំនួននៅក្បែរៗនោះផងដែរ ។ លុះរហូតមកដល់ម៉ោងប្រមាណ៤និង៣០នាទីរសៀល ថ្ងៃដដែលនោះ ទឹកនៅចំណុចនេះក៏បានស្រកចុះអស់វិញ ។
សេចក្តីរាយការណ៍បន្តទៀតថា ខណៈពេលដែលទឹកបានស្រកនៅចំណុចខាងលើនេះ ស្រាប់តែទឹកជំនន់បន្តទៅចំណុចផ្លូវក្រាលក្រួសក្រហមនៅផ្សារឃែរ ស្ថិតក្នុងភូមិទំនប់ ឃុំស្ទឹងត្រង់ ស្រុកសាលាក្រៅ មានសភាពទឹកឡើងខ្លាំងរហូតហូរកាត់ផ្លូវថ្នល់ចម្ងាយប្រហែល២០០ម៉ែត្រ ជម្រៅប្រហែល០.៥ ម៉ែត្រ បណ្តាលឱ្យលិចចំការរបស់ប្រជាពលរដ្ឋនៅតំបន់នោះ រហូតមកទល់ពេលយប់នៅបន្តលិចនៅឡើយ ។
ទោះបីជាយ៉ាងណាក៏ដោយ កម្លាំងចម្រុះរបស់ស្នងការដ្ឋាននគរបាលខេត្តប៉ៃលិន បានជួយសម្រួលចរាចរណ៍ជូនប្រជាពលរដ្ឋ ក៏ដូចជា ចម្លងអ្នកដែលជួបបញ្ហានៅចំណុចខាងលើ និងបានផ្អាកយានជំនិះមួយចំនួនឱ្យត្រឡប់ក្រោយវិញ ដើម្បីបញ្ជៀសនៅគ្រោះថ្នាក់ណាមួយដែលកើតឡើងដោយយថាហេតុ ។ (កែសម្រួលដោយ ៖ បុប្ផា)
ចែករំលែកព័តមាននេះ