ខេត្តកណ្ដាល ៖ បើតាមសេចក្តីរាយការណ៍បឋមបានឲ្យដឹងថា បុរសម្នាក់ត្រូវកម្លាំងសមត្ថកិច្ចនគរបាលស្រុកកៀនស្វាយ ឃាត់ខ្លួនកាលពីថ្ងៃទី២១ ខែកញ្ញា ឆ្នាំ២០១៩ ពាក់ព័ន្ធករណីគំរាមកំហែងថា «នឹងសម្លាប់» ដោយបើករថយន្តដេញបុកបុរសម្នាក់ទៀត ដែលសង្ស័យថា គេលួចមានសហាយស្មន់ជាមួយប្រពន្ធរបស់ខ្លួន ។
សេចក្តីរាយការណ៍បន្តថា ជនសង្ស័យខាងលើនេះឈ្មោះ ឆាយ សំណាង ភេទប្រុស អាយុ៣៤ឆ្នាំ រស់នៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល មុខរបរបើករថយន្តដឹកដី (ឃាត់ខ្លួន) ជាមួយរថយន្ត១គ្រឿង ។ ចំណែកជនរងគ្រោះឈ្មោះ សូ រាប ភេទប្រុស អាយុ៣១ឆ្នាំ រស់នៅភូមិ-ឃុំជាមួយគ្នា មុខរបរជាកសិករ ។
សេចក្តីរាយការណ៍បន្តថា មុនពេលកើតហេតុ ដោយសារតែជនសង្ស័យប្រចណ្ឌប្រពន្ធរបស់ខ្លួន លុះនៅម៉ោង៦និង៣០នាទីល្ងាច នាថ្ងៃទី១៦ ខែកញ្ញា កន្លងទៅ ជនសង្ស័យបានដើរចូលមកក្រោមផ្ទះជនរងគ្រោះ រួចនិយាយទៅកាន់ជនរងគ្រោះថា «ហ្អែងសហាយស្មន់ជាមួយប្រពន្ធអញ» ។ ពេលនោះជនរងគ្រោះក៏ឆ្លើយតបទៅវិញថា «ខ្ញុំមិនបានទាក់ទងប្រពន្ធបងទេ បងឯងទៅផ្ទះវិញទៅ» ។ ភ្លាមៗនោះជនសង្ស័យក៏បានបោះពាក្យសំដីថា «អញនឹងសម្លាប់ហ្អែង និងប្រពន្ធអញចោលទាំងពីរនាក់។ បើហ្អែងនៅតែទាក់ទងគ្នា» ពេលនិយាយហើយជនសង្ស័យក៏ដើរទៅផ្ទះទៅ ។
សេចក្តីរាយការណ៍បន្តទៀតថា លុះនៅថ្ងៃទី២០ ខែកញ្ញា វេលាម៉ោង៨និង៣៥នាទីព្រឹក ខណៈជនរងគ្រោះកំពុងកិនស្រូវនៅផ្ទះឈ្មោះ ហៃ ដែលនៅភូមិ-ឃុំជាមួយគ្នានោះ ស្រាប់តែជនសង្ស័យជិះម៉ូតូទៅរករឿងជនរងគ្រោះម្តងទៀតដោយនិយាយថា «ហ្អែងត្រូវតែទទួលខុសត្រូវលើប្រពន្ធរបស់អញ» ហើយក៏បបួលជនរងគ្រោះស្បថនៅវត្ត ។ ពេលនោះជនរងគ្រោះបានតបវិញថា «ទៅមុនទៅ ចាំខ្ញុំទៅតាមក្រោយ» រួចជនសង្ស័យក៏បានជិះម៉ូតូចេញទៅបាត់ទៅ ។
សេចក្តីរាយការណ៍បន្តថា ហើយនៅព្រឹកថ្ងៃទី២១ ខែកញ្ញា ជនរងគ្រោះក៏បានជិះម៉ូតូម្នាក់ឯងតាមទំនប់ស្រែអំពិលជាប់ប្រឡាយវរៈប្រាំ ក្នុងគោលដៅទៅកន្លែងចិញ្ចឹមជ្រូក តែពេលនោះជនសង្ស័យបានបើករថយន្តដឹកដីរបស់ខ្លួនដេញតាមបុកជនរងគ្រោះតែម្តង ។
ដោយឃើញដូច្នោះជនរងគ្រោះក៏ជិះម៉ូតូផ្តួលខ្លួនចូលទៅវាលស្រែ ចំណែកជនសង្ស័យក៏បើករថយន្តជ្រុលហួសទៅមុខ រួចស្រែកឲ្យជនរងគ្រោះថា «កុំតែហ្អែងជិះម៉ូតូចូលវាលស្រែទាន់ កុំអីអញបុកហ្អែង ឲ្យងាប់តែម្តង»។ ដោយឮពាក្យដូចនេះជនរងគ្រោះក៏ទុកម៉ូតូនៅវាលស្រែ រួចរត់ទៅប្រាប់បងប្អូនជួយ និងបាននាំទៅប្តឹងនគរបាលប៉ុស្តិ៍ឈើទាល ចំពោះការប្រមាថអាយុជីវិតខ្លួននោះ ។
ក្រោយពីទទួលបានពាក្យបណ្តឹង កម្លាំងនគរបាលប៉ុស្តិ៍បានចុះទៅដល់កន្លែងកើតហេតុ និងឃាត់ខ្លួនជនសង្ស័យខាងលើដើម្បីសាកសួរតែម្តង ។ នៅចំពោះមុខសមត្ថកិច្ចជនសង្ស័យបានសារភាពថា ខ្លួនពិតជាបានធ្វើសកម្មភាពដូចខាងលើពិតប្រាកដមែន និងធ្លាប់ប្រើប្រាស់គ្រឿងញៀនទៀតផង ។
ក្រោយពីសាកសួរនាំរួចហើយ ជនសង្ស័យត្រូវបានសមត្ថកិច្ចកសាងសំណុំរឿង ដើម្បីចាត់ការតាមនីតិវិធី ។ (កែសម្រួលដោយ ៖ បុប្ផា)
ចែករំលែកព័តមាននេះ