រាជធានីភ្នំពេញ ៖ សេចក្តីរាយការណ៍បឋមបានឲ្យដឹងថា មានការភ្ញាក់ផ្អើលមួយបានកើតឡើងកាលពីវេលាម៉ោង៧ព្រឹក ថ្ងៃទី២២ ខែកញ្ញានេះ នៅក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ បន្ទាប់ពីកម្មករសំណង់១ក្រុម ប្រទះឃើញបុរសជាសន្តិសុខម្នាក់ដេកស្លាប់ក្នុងអង្រឹង ដោយមិនដឹងមូលហេតុ ។
សេចក្តីរាយការណ៍បុរសរងគ្រោះឈ្មោះ ពុត ភេន អាយុ៥១ឆ្នាំ មានប្រពន្ធ និងកូនប្រុសស្រី៥នាក់ នៅក្នុងបន្ទុកគ្រួសារ មានទីលំនៅបច្ចុប្បន្ននៅក្នុងភូមិកូនក្អែក ឃុំសំបូរណ៍ ស្រុកប្រាសាទសំបូរ ខេត្តកំពង់ធំ និងបានមកស្នាក់នៅធ្វើជាសន្តិសុខយាមឃ្លាំងនៅទីតាំងកើតហេតុខាងលើ ។
តាមប្រភពព័ត៌មានបានឲ្យដឹងថា នៅមុនពេលមានការភ្ញាក់ផ្អើលកម្មករសំណង់បានទៅធ្វើការនៅឃ្លាំងមួយនោះ ហើយពេលទៅដល់បានឃើញជនរងគ្រោះដេកមិនក្រោកសោះក៏បាននាំគ្នាស្រែកហៅឲ្យក្រោក ដើម្បីបើកទ្វារចូលធ្វើការ ។ ប៉ុន្តែទោះហៅយ៉ាងណាក៏មិនឆ្លើយតប ហើយមិនឃើញភ្ញាក់ទៀតក៏បាននាំគ្នាចូលទៅអង្រួន ស្រាប់តែម្នាក់ៗមានភាពស្រឡាំងកាំងយ៉ាងខ្លាំង ព្រោះជនរងគ្រោះបានស្លាប់មានសភាពរឹងទៅហើយ ។ ទើបស្រែកប្រាប់គ្នាបង្កឲ្យមានការភ្ញាក់ផ្អើលឆោឡោដល់អ្នកភូមិ និងរាយការណ៍ជូនអាជ្ញាធរមូលដ្ឋាននិងនគរបាលចុះទៅពិនិត្យមើលភ្លាមៗតែម្ដង ។
ប្រភពដដែលបានបន្តថា បុរសរងគ្រោះខាងលើទើបមកធ្វើជាសន្តិសុខបានរយៈពេល១ខែទេ ហើយគាត់បានយាមនៅទីនោះតែម្នាក់ឯងប៉ុណ្ណោះ គឺយាមទាំងយប់ទាំងថ្ងៃពេញ២៤ម៉ោងតែម្ដងគ្មានអ្នកប្ដូរវេន និងគ្មានពេលឈប់សម្រាកឡើយ ។ នេះ គឺជាការធ្វើការហួសកម្លាំងដែលបានធ្វើឲ្យសុខភាពគាត់ទន់ខ្សោយ ម្យ៉ាងគាត់តែងដេកលើអង្រឹងបែបនេះរាល់ថ្ងៃ ហើយការស្លាប់នេះត្រូវបាននគរបាលសន្និដ្ឋានថា បណ្ដាលមកពីខ្យល់គ ។
ក្រោយពីការពិនិត្យកោសល្យវិច្ច័យរួចនគរបាលបានប្រគល់សពជូនក្រុមគ្រួសារ ដើម្បីចាត់ចែងធ្វើបុណ្យតាមប្រពៃណី ៕ កែសម្រួលដោយ ៖ សុឃាក់
ចែករំលែកព័តមាននេះ