រាជធានីភ្នំពេញ ៖ នារីបុគ្គលិកបេឡារបស់ក្រុមហ៊ុនមិត្តហ្វូន២នាក់ ត្រូវក្រុមចោរមានគ្នា២នាក់ ធ្វើសកម្មភាព ឆក់យកស្បោងប្រាក់អស់៣៥.០០០ដុល្លារ ខណៈធ្វើដំណើរមកពីបើកប្រាក់នៅធនាគារអេស៊ីលីដា ដែលមានទីតាំងនៅទល់មុខពហុកីឡដ្ឋានជាតិអូឡាំពិក ដែលពេលនោះគឺនារីបុគ្គលិកមិត្តហ្វូន២នាក់ឡើងជិះរថយន្តរបស់ខ្លួនធ្វើដំណើរត្រឡប់ទៅដល់ក្រុមហ៊ុនវិញទៅហើយ លុះពេលបើកទ្វារចុះចេញស្រាប់តែពួកចោរជិះម៉ូតូឆាបឆក់វឹងតែម្តង ។
អំពើឆក់នេះត្រូវសមត្ថកិច្ចឱ្យដឹងថា កើតឡើងកាលពីវេលាម៉ោង១១និង២០នាទីថ្ងៃត្រង់ថ្ងៃទី៩ កុម្ភៈ ២០១១ នៅតាមផ្លូវលេខ១៨៨ សង្កាត់ផ្សារដេប៉ូទី១ ខណ្ឌទួលគោក ត្រង់ផ្លូវចូលខាងក្រោយក្រុមហ៊ុនមិត្តហ្វូនតែម្តង ។ បុគ្គលិកដែលត្រូវបានចោរឆក់នេះ សមត្ថកិច្ចឱ្យដឹងថា ១-ឈ្មោះជា សំនៀង ភេទស្រី អាយុ២៤ឆ្នាំ ជាបុគ្គលិកផ្នែកបេឡារបស់ក្រុមហ៊ុនមិត្តហ្វូន មានទីលំនៅសង្កាត់ទឹកថ្លា ខណ្ឌសែនសុខ ២-ឈ្មោះវិសិដ្ឋ សាដួង ភេទស្រី អាយុ២៨ឆ្នាំ មានទីលំនៅផ្ទះលេខ១៤B ផ្លូវលេខ៤៦៨ សង្កាត់ទួលទំពូងទី១ ខណ្ឌចំការមន ។
តាមព័ត៌មានឱ្យដឹងថា ក្រុមចោរឆក់មានគ្នា២នាក់ ជិះម៉ូតូម៉ាកហុងដា ពណ៌ខ្មៅ បិទស្លាកលេខ បានធ្វើសកម្មភាពឆក់ស្បោងប្រាក់របស់ស្ត្រីបុគ្គលិកមិត្តហ្វូន ខណៈចុះចេញពីរថយន្តប្រុងចូលទៅក្នុងក្រុមហ៊ុនទៅហើយ ។ មុនពេលកើតហេតុ ស្ត្រីជាបេឡាក្រុមហ៊ុនមិត្តហ្វូន២នាក់ខាងលើបានជិះរថយន្តម៉ាកកូរ៉ូឡា ពណ៌សំបកឪឡឹក មានស្លាកលេខ ភ្នំពេញ 2C-7829 មួយគ្រឿង ធ្វើដំណើរទៅបើកប្រាក់ធនាគារអេស៊ីលីដា ដែលមានទីតាំងដូចខាងលើ។ នៅពេលបើកប្រាក់បានហើយក៏ជិះរថយន្តត្រឡប់មកក្រុមហ៊ុនវិញ ដោយឈប់តាមផ្លូវលេខ១៨៨ សង្កាត់ផ្សារដេប៉ូទី១ ខាងក្រោយស្នាក់ការក្រុមហ៊ុនតែម្តង ។ ពេលស្ត្រីឈ្មោះជា សំនៀង បានបើកទ្វាររថយន្តចុះមកស្រាប់តែពួកចោរដែលតាមតាំងពីដើមទីមកនោះ ជិះម៉ូតូមកឆក់ស្បោងប្រាក់យកទៅវឹងតែម្តង ៕
ចែករំលែកព័តមាននេះ