ខេត្តមណ្ឌលគិរី ៖ សិស្សដែលប្រលងជាប់និទ្ទេសA ប្រចាំខេត្តមណ្ឌលគិរីតែម្នាក់គត់ ត្រូវបានទទួលការឧបត្ថម្ភម៉ូតូ និងថវិកាជាច្រើនពីសប្បុរសជន ខណៈអ្នកមាននិទ្ទេស B C បានជួបសំណេះសំណាល និងទទួលរង្វាន់លើកទឹកចិត្តពីអភិបាលខេត្តមណ្ឌលគិរី និងសប្បុរសជនធ្វើឡើងនៅមន្ទីរអប់រំយុវជននិងកីឡាខេត្តមណ្ឌលគិរី កាលពីល្ងាចថ្ងៃទី២០ កញ្ញា ។
ប្រធានមន្ទីរអប់រំយុវជន និងកីឡាខេត្តមណ្ឌលគិរីបានថ្លែងថា សិស្សប្រឡងបាក់ឌុបសម្រាប់ឆ្នាំនេះ មានចំនួន៤០១នាក់ ស្រី២២១នាក់ ចំណែកសិស្សដែលប្រឡងជាប់ មានចំនួន៣៥៧នាក់ ស្រី២០០នាក់ ក្នុងនោះ ជាប់និទ្ទេសA ១នាក់ និទ្ទេសB ៣នាក់ និទ្ទេសC ៣៦នាក់ និទ្ទេសD ១១២នាក់ និងនិទ្ទេសE ២០៥នាក់ ជារួមសិស្សប្រឡងជាប់ គឺមាន៨៩.០៣% ស្រី៩០.៥០% ។
លោក ទឹម សង្វាត បញ្ជាក់ថា សម្រាប់បេក្ខជនដែលប្រឡងជាប់នៅខេត្តមណ្ឌលគិរី គឺទទួលបានការយកចិត្តដាក់ពីវិស័យអប់រំនៅប្រទេសវៀតណាម និងប្រទេសថៃ ដោយផ្ដល់អាហាររូបករណ៍១០០%ឲ្យពួកគាត់ទៅបន្តការសិក្សា ប្រសិនពួកគាត់ចាប់អារម្មណ៍ ។
សិស្សឆ្នើមនិទ្ទេសA ឈ្មោះ មាស រតនា ក៏បានប្ដេជ្ញាថា នឹងបន្តខិតខំរៀនសូត្របន្ថែមទៀត ប្រឹងប្រែងយកចំណេះ វិជ្ជាមកបម្រើដល់សង្គមជាតិវិញនាពេលអនាគត ។ សិស្សឆ្នើម មាស រតនា រូបនេះបន្តថា ប្អូនពិតជាអរគុណដល់សម្ដេច តេជោ និងក្រសួងអប់រំយុវជននិងកីឡា ដែលផ្ដល់ជាអាគារសិក្សាថ្មី កំណែទម្រង់ការៀនសូត្ររឹតបណ្ដឹងការប្រលង ដែល បានធ្វើឲ្យសិស្សានុសិស្សប្រឹងរៀនរហូតទទួលបានលទ្ធផលល្អស្ទើគ្រប់ៗគ្នា ។ សិស្សនិទ្ទេសAបានចែករំលែកថា ចំពោះ រូបប្អូនផ្ទាល់ប្រសិនបើខ្សោយមុខវិជ្ជាណា គឺត្រូវដាក់កាលវិភាគរៀនសូត្របំប៉នមុខវិជ្ជានោះ ដើម្បីឲ្យមានភាពសមស្រប ជាមួយមុខវិជ្ជាដទៃទៀត ។
លោកស្វាយ សំអ៊ាង អភិបាលខេត្តមណ្ឌលគិរីបានលើកឡើងថា លោកពិតជាមានមោទនភាពដែលឆ្នាំនេះ ខេត្តមណ្ឌលគិរី មានសិស្សប្រឡងជាប់និទ្ទេសAសារជាថ្មី ជាពិសេសគឺមានអាត្រាសិស្សប្រឡងជាប់ច្រើន មានលេខរៀងទី ២នៅទូទាំងប្រទេស ។ ឯកឧត្ដមបន្តថា លទ្ធផលល្អប្រសើរទាំងនេះគឺបានមកពីការខិតខំប្រឹងប្រែងរបស់រាជរដ្ឋាភិបាល ក្រសួងនិងមន្ទីរអប់រំយុវជននិងកីឡា មជ្ឈដ្ឋាននានាដែលគាំទ្រ ជាពិសេសនោះគឺលោកគ្រូ អ្នកគ្រូ ដែលខិតខំបង្រៀន សិស្សនុសិស្សបានយ៉ាងល្អ ទើបខេត្តមណ្ឌលគិរីមានកិត្តិយសទទួលបានការរីកចម្រើននៃវិស័យអប់រំដូចសព្វថ្ងៃ ។
សូមបញ្ជាក់ថា ក្នុងឱកាសនោះ សិស្សនិទ្ទេសAទទួលបានរង្វាន់ម៉ូតូ១គ្រឿង ពីលោកឧកញ៉ា អ៊ឹង ស៊ីតាតវីរៈ និងទូរសព្ទ១គ្រឿង ពីឯកឧត្ដម អ៊ឹម ឈុនលឹម ព្រមទាំងថវិកា 1250 $ ពីសប្បុរសជននានា ចំណែកសិស្សនិទ្ទេសB ៣នាក់ ទទួលបានថវិកាម្នាក់ 200$ និងសិស្សនិទ្ទេសC ៣៦នាក់ ទទួលបានថវិកាម្នាក់ ១៥ម៉ឺនរៀល ទាំងនេះជាថវិកា របស់អភិបាលខេត្តមណ្ឌលគិរី និងសប្បុរសជន ។ ជាមួយគ្នានេះ លោកគ្រូ អ្នកគ្រូ ១២នាក់ ឯកឧត្ដមអភិបាលខេត្ត មណ្ឌលគិរី បានជូនថវិកាម្នាក់២០ម៉ឺនរៀលផងដែរ ។ (សម្រួលដោយ៖ ស្រីណា)
ចែករំលែកព័តមាននេះ