បុណ្យកាន់បិណ្ឌបាននិងកំពុងប្រព្រឹត្តទៅយ៉ាងគគ្រឹកគគ្រេង គ្រប់វត្តអារាមនៅទូទាំងប្រទេសកម្ពុជា ឯបរិស័ទដែលសង្វាតបុណ្យទានក៏នាំគ្នាទៅបំពេញកុសលយ៉ាសស្រាក់សស្រាំ សូមសាធុជន សប្បុរសទាំងឡាយប្រញាប់រូតរះធ្វើបុណ្យកុសលយ៉ាងហោចក៏គួរទៅឱ្យបានមួយវត្តនឹងគេ ឬច្រើនជាងនេះក៏រឹតតែប្រសើរ ដើម្បីជាប្រយោជន៍ចម្លងជីវិតយើងទៅកាន់ទីសុខសាន្តទាំងពេលបច្ចុប្បន្ន និងទៅថ្ងៃអនាគត ព្រោះវ័យរបស់យើងរមែងកន្លងផុតទៅ រាល់ៗដង្ហើម រាល់ៗវិនាទី ពុំមានសម្រាកឡើយ យើងក៏កាន់តែឈានទៅរកសេចក្តីស្លាប់បន្តិចម្តងៗហើយដែរ ។
កាលបើពេលវេលាកន្លងហួសទៅហើយ យើងមិនអាចហៅឱ្យត្រឡប់មកវិញបានទេ ឯវ័យរបស់យើងដែលឆ្លងផុតទៅហើយ ក៏មិនអាចនឹងហៅឱ្យត្រឡប់មកក្រោយវិញទៀតបានដូចគ្នា ដូច្នេះមានតែបុណ្យកុសលហ្នឹងហើយជាទីពឹងជាស្ពានពិតប្រាកដសម្រាប់ចម្លងជីវិតយើង ។
ទ្រឹស្តីពុទ្ធសាសនាបានពន្យល់ថា កាលោ យលតិ ភូតានិ លព្វានេវ លហត្តនា កាលវេលារមែងទំពាស៊ីនូវសព្វសត្វ ព្រមជាមួយនឹងខ្លួនរបស់វាផង បើសាធុជនយល់ច្បាស់យ៉ាងនេះហើយគប្បីប្រញាប់ប្រញាល់សាងសន្សំនូវអំពើល្អ នូវអ្វីដែលមានផលប្រយោជន៍ទុកសម្រាប់ខ្លួននិងបច្ឆាជនកុំឱ្យពេលវេលាទំពាស៊ីនូវប្រយោជន៍របស់យើងទៅទទេៗឥតការ ។ (ដោយសាន សារិន)
ចែករំលែកព័តមាននេះ