ទីភ្នាក់ងារព័ត៌មានចិនស៊ីនហួបានចេញផ្សាយព័ត៌មានដោយដកស្រង់សម្តីរដ្ឋមន្ត្រីការពារប្រទេសជប៉ុន លោក Toshimi Kitazawa ដែលថ្លែងកាលពីថ្ងៃទី១៩ មីនា ថា លក្ខខណ្ឌ និងស្ថានភាពនៃម៉ាស៊ីនរ៉េអាក់ទ័រចំនួន៤នៅរោងចក្រថាមពលនុយក្លេអ៊ែរ ហ្វូគូស៊ីម៉ា ដែលរងផលប៉ះពាល់ដោយការរញ្ជួយដីកម្រិត៨,៩រិចស្ទ័រ បង្កឱ្យកើតមានរលកយក្សស៊ូណាមីនោះកំពុងមានភាពល្អប្រសើរវិញហើយ ។ លោក Kitazawa ថ្លែងថា ប្រតិបត្តិការនៃការទប់ស្កាត់ការបញ្ចេញវិទ្យុសកម្មនៅរោងចក្រនុយក្លេអ៊ែរនោះទទួលបានជោគជ័យយ៉ាងធំធេង ក្រោយពីកងកម្លាំងស្វ័យការពារជាតិ និងអ្នកពន្លត់អគ្គីភ័យបាញ់ទឹកដាក់ម៉ាស៊ីនរ៉េអាក់ទ័រលេខ៣ ដែលរងផលប៉ះពាល់ធ្ងន់ធ្ងរជាងគេកាលពីរសៀលថ្ងៃទី១៩ មីនា ។
ថ្លែងនៅក្នុងឱកាសសន្និសីទកាសែតមួយ លោក Toshimi Kitazawa ថ្លែងថា ស្ថានការណ៍ម៉ាស៊ីនរ៉េអាក់ទ័រលេខ៧ និងលេខ៤ មានស្ថិរភាពជាងការរំពឹងទុក ចំណែកសីតុណ្ហភាពម៉ាស៊ីនរ៉េអាក់ទ័រទាំង៤ គឺក្រោម១០០អង្សា
សេ ។
នាយករដ្ឋមន្ត្រីជប៉ុន លោកណាអូតូ កាន បានណែនាំឱ្យលោក Toshimi Kitazawa តាមដានស្ថានការណ៍នៅរោងចក្រនុយក្លេអ៊ែរហ្វូគូស៊ីម៉ា ឱ្យបានដិតដល់ ។ ប៉ុន្តែទោះបីជាបែបណា អ្នកនាំពាក្យរដ្ឋាភិបាលជប៉ុនថ្លែងថា គេមិនមានកំណត់ពេលជាក់លាក់ថាតើនៅពេលណាទើបបណ្តាញថាមពលអគ្គិសនីនៅរោងចក្រនុយក្លេអ៊ែរហ្វូគូស៊ីម៉ា ត្រូវជួសជុលឱ្យដំណើរការពេញលេញដើម្បីឱ្យប្រព័ន្ធត្រជាក់អាចដំណើរការបានដោយស្វ័យប្រវត្តិនោះទេ ប៉ុន្តែស្ថានការណ៍នៅរោងចក្រនេះកំពុងមានភាពល្អប្រសើរឡើងវិញគួរឱ្យកត់សម្គាល់ ។
ក្នុងប្រតិបត្តិការបាញ់ទឹកបញ្ចុះកម្តៅម៉ាស៊ីនរ៉េអាក់ទ័រនៅរោងចក្រនុយក្លេអ៊ែរហ្វូគូស៊ីម៉ា រថយន្តគ្មានមនុស្សបើកមួយគ្រឿងត្រូវបានយកមកប្រើប្រាស់ ដើម្បីកុំឱ្យអ្នកពន្លត់អគ្គីភ័យប៉ះវិទ្យុសកម្ម ៕
ចែករំលែកព័តមាននេះ