វិស័យពាណិជ្ជកម្មលើប្រព័ន្ធអេឡិចត្រូនិក ឬ E-commerce នៅអាស៊ីអាគ្នេយ៍កំពុងតែលូតលាស់រីកចម្រើនយ៉ាងលឿន ហើយអ្នកវិភាគរបស់ Google និង Temasek បានព្យាករណ៍មកថាទីផ្សារតំបន់នេះអាចនឹងកើនដល់ ៨៨ប៊ីលានដុល្លារក្នុងឆ្នាំ ២០២៥ ។
លោក Nguyen Quang Thuat ដែលជាប្រធានផ្នែកដឹកជញ្ជូនប្រចាំក្រុមហ៊ុន Sendor និងជានាយកមួយរូបរបស់ SenMall បានឲ្យដឹងថា អតិថិជននៅអាស៊ីអាគ្នេយ៍ភាគច្រើនមានវ័យក្មេង និងតែងតែប្រើអ៊ីនធើណេតច្រើនជាងមនុស្សជំនាន់មុនៗ ។ កត្តានេះ គឺជាអ្វីដែលអាជីវកម្មក្នុងតំបន់មិនគួរមើលរំលង ហើយលោក Thuat បានផ្តល់គន្លឹះខាងក្រោមនេះសម្រាប់ឲ្យអាជីវកម្មអនុវត្តដើម្បីទាក់ទាញអតិថិជនខាងលើ ។
១. ទូរស័ព្ទដៃជាកត្តាសំខាន់ ៖ អតិថិជនក្នុងប្រទេសម៉ាឡេស៊ី ថៃ និងវៀតណាម មានការប្រើប្រាស់អ៊ីនធើណេតតាមទូរស័ព្ទដៃច្រើនជាងមនុស្សក្នុងតំបន់ដទៃដល់ទៅ ១០% ។ មូលហេតុ គឺមកពីមានកង្វះហាងលក់ទំនិញ ជាពិសេសតាមបណ្តាក្រុងតូចៗជាដើម ។ ដោយហេតុដូចនេះអាជីវកម្មត្រូវតែធានាថា បទពិសោធន៍ក្នុងការទិញទំនិញអនឡាញមានភាពងាយស្រួល និងគួរឲ្យពេញចិត្ត ។
២. យល់ដឹងពីភាពស្មុគស្មាញនៃការដឹកជញ្ជូន៖ អ្នកលក់រាយអនឡាញដែលចង់ផ្គត់ផ្គង់ទំនិញដល់អតិថិជនក្នុងតំបន់នេះត្រូវដោះស្រាយបញ្ហាដឹកជញ្ជូនព្រោះតំបន់នេះជួបប្រទះនឹងការពន្យាពេលព្រោះតែចរាចរណ៍ ផ្លូវថ្នល់ និងកង្វះការរៀបចំទីក្រុងជាដើម ។ លោក Kaittichai Pitpreecha ដែលជាប្រធានគ្រប់គ្រងនៅ DHL eCommerce Solutions ក្នុងអាស៊ីអាគ្នេយ៍បានឲ្យដឹងថា វាមិនគ្រាន់តែជាការដឹកជញ្ជូនទេ ។ ដើម្បីរក្សាភាពប្រកួតប្រជែង ក្រុមហ៊ុនត្រូវតែរៀបចំទំនិញក្នុងស្តុករបស់ខ្លួន និងសហការជាមួយដៃគូដឹកជញ្ជូនដែលត្រឹមត្រូវដើម្បីធានាថាអតិថិជនពេញចិត្តនឹងសេវាកម្មរបស់ខ្លួន ។
៣. ផ្តល់ជម្រើសបង់ប្រាក់ដែលមានភាពបត់បែន៖ អ្នកទិញជាច្រើនក្នុងអាស៊ីអាគ្នេយ៍មិនអាចប្រើសេវាបង់ប្រាក់បែបអេឡិចត្រូនិចឡើយ ជាពិសេសអ្នកដែលរស់នៅតាមជនបទ ឬជាយក្រុងជាដើម ។ ដោយហេតុដូចនេះ អាជីវកម្មគួរតែផ្តល់ជម្រើសក្នុងការបង់ប្រាក់ច្រើនដល់អ្នកទិញទាំងនេះ ៕ កែសម្រួលដោយ ៖ សុឃាក់
ចែករំលែកព័តមាននេះ