ខេត្តត្បូងឃ្មុំ ៖ ដោយមានការយកចិត្តទុកដាក់ពីសំណាក់លោកឧត្តមសេនីយ៍ទោបែន រ័ត្ន ស្នងការនគរបាលខេត្តបានបញ្ជាឲ្យកម្លាំងសមត្ថកិច្ចក្រោមឱវាទ នៅតាមដងទន្លេមេគង្គត្រូវបន្តការបង្ក្រាបបទល្មើសនេសាទក្នុងរដូវហាមឃាត់ ។ រយៈពេល០៣ថ្ងៃជាប់ៗគ្នា ចាប់ពី១៥ ដល់១៧កញ្ញានេះ ក្នុងភូមិសាស្ត្រឃុំប៉ើស២ ឃុំកំពង់ទ្រាស និងឃុំរកាខ្នុរ ស្រុកក្រូចឆ្មារ បង្ក្រាបបានស្បៃមុងរាប់ពាន់ម៉ែត្រ និងចាក់លែងកូនត្រីចំរុះទៅក្នុងបឹងធម្មជាតិរាប់គីឡូក្រាម ។
លោកវរសេនីយ៍ឯកសាំ ហេង អធិការនគរបាលស្រុកក្រូចឆ្មារប្រាប់ឲ្យដឹងថា យោងតាមបញ្ជារបស់លោកឧត្តមសេនីយ៍ទោបែន រ័ត្ន ស្នងការនគរបាលខេត្តកាលពីវេលាម៉ោង២រសៀល ថ្ងៃទី១៥ កញ្ញា កម្លាំងប៉ុស្តិ៍រដ្ឋបាលឃុំប៉ើស២ បានចុះបង្ក្រាបលបស្បៃមុងត្រង់ចំនុចក្រោយភូមិទួលសម្បត្តិ បានលបស្បៃមុងចំនួន០៤មាត់ ស្មើ១៥០ម៉ែត្រ បង្គោលឫស្សីចំនួន៥៥ដើម សម្ភារៈត្រូវបានដុតបំផ្លាញចោល និងបានចាក់លែងកូនត្រីទង្ងន់១៥គីឡូក្រាម ។
អធិការនគរបាលស្រុកក្រូចឆ្មារបន្តថា នៅថ្ងៃទី១៦ កញ្ញានេះ កម្លាំងអធិការដ្ឋាននគរបាលស្រុកបានសហការជាមួយនឹងគណៈបញ្ជាការឯកភាពរដ្ឋបាលស្រុកបានចុះបង្ក្រាបបទល្មើសនេសាទលបស្បៃមុងនៅឃុំកំពង់ទ្រាស បានចំនួន៣៥មាត់ របាំងព្រួលស្បៃមុង ប្រវែង២.៧០០ម៉ែត្រ បង្គោលឫស្សីចំនួន២.៥០០ដើម លបយាំងកាវ ចំនួន០៧មាត់ របាំងព្រួលប្រវែង៧៥០ម៉ែត្រ សម្ភារៈទាំងនេះត្រូវបានដុតបំផ្លាញចោល នៅកន្លែងបង្ក្រាបតែម្តង និងបានចាក់លែងកូនត្រីចម្រុះទង្ងន់១៥០គីឡូក្រាម ។
ចំពោះករណីទី៣វិញ នៅវេលាម៉ោង២និង២០នាទីរសៀលថ្ងៃទី១៧ កញ្ញា កម្លាំងប៉ុស្តិ៍រដ្ឋបាលរកាខ្នុរបានចុះបង្ក្រាបបទល្មើសនេសាទលបស្បៃមុងខុសច្បាប់ ត្រង់ចំនុចទួលទន្សោងក្រោយភូមិទី៤ ឃុំរកាខ្នុរ ស្រុកក្រូចឆ្មារ ដោយបង្ក្រាបបានលបស្បៃមុងប្រវែង១.៦១០ម៉ែត្រ បង្គោលឫស្សីចំនួន១៤៥ដើម សម្ភារៈទាំងនេះត្រូវបានដុតបំផ្លាញចោល និងបានចាក់លែងកូនត្រីចំរុះទង្ងន់៤២គីឡូក្រាម ។
លោកវរសេនីយ៍ឯក សាំ ហេង អធិការនគរបាលស្រុកក្រូចឆ្មារបញ្ជាក់ថា យោងតាមបញ្ជារបស់លោកស្នងការនគរបាលខេត្ត រូបលោកប្តេជ្ញាចិត្តក្នុងរដូវបិទនេសាទ និងបន្តខិតខំចុះបង្ក្រាបបទល្មើសនេសាទបន្តទៀតនៅតាមភូមិឃុំមួយចំនួនក្នុងស្រុកក្រូចឆ្មារជាប់ដងទន្លេមេគង្គឲ្យបានផុលផុស ។ ក្នុងនាមអាជ្ញាធរស្រុកក៏ដូចស្ថាប័នជំនាញ សូមឲ្យប្រជាពលរដ្ឋមេត្តាបញ្ឈប់នេសាទប្រើប្រាស់ឧបករណ៍ខុសច្បាប់ចាប់យកត្រីក្នុងរដូវហាមឃាត់នេះបន្តទៀត ងាកមកប្រើប្រាស់ឧបករណ៍នេសាទលក្ខណៈគ្រួសារវិញ ដើម្បីឲ្យសំបូរធនធានធម្មជាតិ ៕ កែសម្រួលដោយ ៖ សុឃាក់
ចែករំលែកព័តមាននេះ