ខេត្តត្បូងឃ្មុំ ៖ គ្រោះធម្មជាតិបានកើតឡើងដោយខ្យល់កន្ត្រាក់ បណ្តាលឲ្យរលំរោងដាក់ទូក.ងមានទំហំ៨គុណ៤០ម៉ែត្រនឹងកំពស់៥ម៉ែត្រ ប្រក់ក្បឿងនៅក្នុងវត្តគគី ភូមិទី២ ឃុំព្រែកអាជី ស្រុកក្រូចឆ្មារ ។ ហេតុការណ៏កើតឡើងនៅវេលាម៉ោង១និង៣០នាទីយប់ រំលងអធ្រាត្យឈានចូលព្រឹកថ្ងៃទី១៧ ខែកញ្ញា ឆ្នាំ២០១៩ ដោយបាក់ក្បាលទូក.ង១ និងបាក់សរសៃចំនួន០៣ទូក សមិទ្ធិផលក្នុងទីអារាមផ្សេងទៀតមិនមានការខូចខាតនោះទេ ហើយត្រូវបានប្រជាការពារ និងសមត្ថកិច្ចចុះទៅជួយរុះរើ ។
លោកវរសេនីយ៏ឯក សាំ ហេង អធិការនគរបាលស្រុកក្រូចឆ្មារឲ្យដឹងថា ក្នុងមួយរយៈនេះស្រុកក្រូចឆ្មារត្រូវបានរងគ្រោះដោយទឹកជំនន់ពីទន្លេមេគង្គ បណ្តាលឲ្យផ្លូវថ្នល់ និងភូមិឋានជាច្រើនត្រូវបានទឹកលិចហើយប្រជាជនមួយចំនួនត្រូវបានរុះរើផ្ទះ ទៅកាន់កន្លែងសុវត្ថិភាពពីច្រាំងទន្លេ ។ គ្រោះនេះមិនទាន់និងផុតផងក៏មានខ្យល់កន្ត្រាក់បានវាយប្រហារ បណ្តាលឲ្យរលំរោងដាក់ទូក.ងក្នុងវត្តគគីរលុះមកដល់ព្រឹកឡើងកម្លាំងសមត្ថកិច្ចជាច្រើននាក់ បានចុះទៅជួយអន្តរាគមន៏រុះរើលើកឈើបាក់បែកចេញ។
ព្រះតេជគុណ ថៃ សុខនី ចៅអធិការវត្តស្តីទីវត្តគគី មានថេរដីកាថា រោងដាក់ទូក.ងនោះត្រូវបានធ្វើជិត១០ឆ្នាំមកហើយ ដាក់ទូក.ងចំនួន០៤គ្រឿងមានឈ្មោះតែមួយ«អគ្គីនេត្រសែនជ័យ» ជាអំណោយរបស់លោក ជា សុផារ៉ា ទេសរដ្ឋមន្ត្រីបានឧបត្ថម្ភឲ្យកន្លងមក ដោយក្នុងនោះមានតែ១គ្រឿងទេនូវប្រើការអុំបានកាលឆ្នាំ២០១៨កន្លងទៅ ចំនែកទូកងចំនួន០៣ទៀតដាក់ក្នុងរោងរួមគ្នា មានសភាពចាស់ទ្រុឌទ្រោមណាស់ទៅហើយ មិនអាចប្រើការបានឡើយ ។
លុះមកដល់ព្រឹកថ្ងៃទី១៧ កញ្ញា ត្រូវបានកម្លាំងសមត្ថកិច្ចចុះមកជួយអត្តរាគមន៏រុះរើ ហើយសម្រាប់ផែនការក្នុងពេលខាងមុខដ៏ឆាប់ និងសង់រោងឈើមួយឡើងវិញសម្រាប់ដាក់ទូក.ង ដោយមានទំហំដដែល និងសង់ឲ្យរឹងមាំជាងមុនប្រើប្រាស់បានយូរអង្វែង ។ ព្រះអង្គមានការសោកស្តាយដោយខ្យល់កន្ត្រាក់បាន បោកបក់មកលើរោងដាក់ទូកងដែលសង់ជិត១០ឆ្នាំមកហើយ និងមានសភាពចាស់មិនសូររឹងមាំ ស្របពេលត្រូវខ្យល់បណ្តាលឲ្យរលំបាក់បែកឈើរួម និងខូចខាតទូកងថែមទៀតពិតជាមានការសោកស្តាយ កុដិ និងសមិទ្ធិផលក្នុងវត្តមិនមានការខូចខាតនោះឡើយ ៕
កែសម្រួលដោយ ៖ សំណាង
ចែករំលែកព័តមាននេះ